土瓜灣牛骨濃湯生牛河！1986地道越南餐廳本地罕見雞蛋咖啡／芫荽可樂

東南亞菜式係香港地屢見不鮮，近期E.A.Two編輯前往唔少越南菜餐廳，部份令人印象難忘，比如係上次喺油麻地嘅蕃茄蟹糕檬粉。今次就前往九龍舊區土瓜灣，當中其實都有間頗受歡迎嘅地道越南菜小店，主打係越式Pho生牛肉湯河，不妨拍拖兩個人一試！

位置近土瓜灣舊區及「牛棚藝術村」嘅「1986地道越南餐廳」，應該係唔少街坊都認識嘅小店。該店菜式選擇不少大門口就擺放有一大張餐牌，幾多錢、有咩食通通清楚列明，透明度高。大門口側有一個小外賣窗口，方便可買外賣嘅客人。

講到最大特色，固然係招牌生牛肉湯河粉$80，由外到內都可以睇得出該店主打係生牛肉湯河，因為湯底係採用牛骨高湯，而且係寫明採用牛骨、牛尾、牛腩、香料，再以文火熬煮，使當中骨髓精華能夠融入高湯。而湯底濃郁醇厚，雖然鮮甜，但就唔會油膩，真係飲完一啖想飲多兩啖。

生牛肉湯河粉上檯依然一貫見到牛肉係紅噹噹，等待熱湯浸熟，生牛肉逐漸變色，所以轉色就要盡快食用，否則牛肉會浸得過熟。河粉順滑，唔會黏埋一齊或一夾就散，牛肉入口軟腍無渣，點睛之筆係小碟嘅蛋黃加醬油，攪勻後將牛肉蘸一蘸蛋汁，會令牛肉更香滑，而另一小碟越南香草辣椒等就隨個人喜好。

法包、沙律、飯、小食、湯粉、檬粉，拌檬粉，選擇雖然多，但就少見負評，應該係其中一間水準不俗嘅小店。除咗小食可以追加之外，飲品基本上都可單買，今次就追加香茅雞翼$28／2隻，不過不失，炸得金黃香口，但香茅味唔太重。原來重有兩款北越甜品，包括柚皮綠豆杯、綠豆冰蝦，大概係凍食，外賣拎走就太浪費啦，下次再堂食。

另一碗係海防蟹膏海鮮湯檬粉$80，雖則生牛肉湯河係令人有回頭衝動，而呢碗蟹膏湯檬都係招牌之一，但呢碗蟹膏湯檬就麻麻哋啦。海防好似係蟹膏混入蟹湯，呢碗湯檬嘅蟹膏就係一旁嘅蟹碎，味道唔太重，比生牛肉湯河更清。而配料就有札肉、小蝦、青口、魷魚等，欠缺肉質同味道，份量上就算不過不失。味道上，編輯都係鍾意上次油麻地酸甜開胃嘅蟹膏湯檬。

至於飲品，越南雞蛋咖啡$42、薄荷芫荽可樂$32都係E.A.Two覺得頗特別嘅選擇。薄荷芫荽可樂就係一字咁淺，杯底係可樂，只係入面同頂端混入芫荽，而且有攪爛嘅芫荽蓉，不過最後原來可樂味係搶過芫荽味。而雞蛋咖啡則為香港比較少見嘅飲品，所謂雞蛋咖啡，就係下面係咖啡，上面就係雞蛋，而雞蛋搖身變成平時嘅奶泡，分別在於雞蛋層帶有香滑甜味，中和返咖啡嘅苦澀味。