隱身舊區竹地館超濃滷水鵝、滷水鴨！土瓜灣碟頭飯／拼盤低至$25、2人套餐$100有找！

香港出色嘅滷水鵝選擇唔多，小店就更少，能夠數到嘅滷水鵝就係大埔「榕基」，今次E.A.Two就前往隱身於土瓜灣舊區嘅「竹地館」，滷水比「榕基」更入味，而且係平靚正，CP值高得值得拍拖兩個人回頭再食！

該店由2020年起開業，店內嘅招牌作係滷水鵝$118／斤，另外重有滷水鴨$130／隻、$70／半隻、潮州鹹香雞$108／隻、$55／半隻，都係街坊喜愛嘅滷水物。其中，單單外賣優惠滷水拼盤就有4款，包括世一滷水鵝拼盤$98，內有滷水鵝、腩肉、大腸、豬肚、雞腎、豆腐、紅腸、滷水蛋；經典滷水鵝雜拼盤$148就有滷水鵝、雞翼、鵝腎、鵝潤、鵝腸；滷水牛三寶拼盤$108則包含牛孖筋、金錢肚、牛蹍；至於抵食滷水拼盤$68就有大腸、雞腎、豬耳、豆腐、紅腸、滷水蛋。值得留意，每一款都可以自行選擇加$30多款滷水墨魚。

今次選擇滷水牛三寶拼盤$108，唔單止有牛孖筋、金錢肚、牛蹍，因為我哋都唔食雞腎，所以只能夠選呢款拼盤，但唯獨呢款可以加滷水鵝$20，換言之$128有4款滷水小食。滷水汁入口濃郁，但鹹度恰到好處，有鹹香味，鹹中有甜，又唔會太搶，無論滷水鵝定滷水牛蹍、金錢肚、牛孖筋都好入味。牛蹍肉質軟腍，唔會好韌，牛肚有咬口，牛孖筋煮得柔軟，充滿膠質，又不失牛筋爽口質感，而且滷水染到入晒色同入晒味。

無論滷水拼盤定滷水飯，都有配搭滷水豆腐，豆腐必然要擺到最底，沾滿滷水汁更佳。至於滷水鵝，肉質鮮嫩，入口軟腍，唔會太熟，滷水汁滷得好入味，而且份量十足。雖然每一份滷水鵝都會配搭一份酸醋，但事實上水準高嘅滷水係唔需要蘸任何醋。食滷水鵝時，基本上九成時間都唔需要蘸醋，但食到最後嘅時候，滷水變得較鹹，呢個時候先需要蘸酸醋，中和返整體鹹度。

如果唔想食拼盤，只係想平平哋食碟飯，可以點碟頭飯，包括滷水鵝飯$50、滷水鴨飯$33、潮州鹹香雞飯$33、鵝同雞／鴨講飯$58，重有其他滷水飯，例如元蹄、牛展、手撕雞、墨魚餅雞髀等。滷水鵝飯嘅份量實在意想不到，飯量足夠兩個人食，白飯表面唔止兩三塊鵝片鵝肉，而係足足6片厚鵝片，塊塊刀工細膩，白飯同鵝片之間都有4至5嚿鵝肉連骨，旁邊附有辣菜脯。

另外，可以選擇兩拼滷水飯$33、四拼滷水飯$43。更意外嘅地方係有款平絕區內，甚至香港嘅客飯，一碟鹹雞飯$25、滷水鴨飯$25、雞鴨飯$30，呢個價錢兼出色嘅滷水重想點？每份重會附送例湯，冬瓜湯，不過略嫌有好重胡椒味，蓋過湯水其鮮甜味。此外，亦可以叫海蜇小食，配搭滷水鵝腸、墨魚，例牌$88。原來重有款二人套餐$99，含例牌滷水鵝或鹹香雞，再配搭兩款小食，包含子薑皮蛋、手拍青瓜、韭菜豬紅、花生豬手、花生雞腳、滷水元蹄等，再配搭白飯同例湯，睇落都幾抵食。