隱身太子街市轉角位！晉家門炭燒工房午市激平特價餐$48意粉／香草燒春雞、香口串燒任揀

香港有唔少餐廳都係隱藏於市區內，而且係鮮為人知，比大街大巷人氣餐廳更值得去拍拖兩個人支持。今次E.A.Two前往一間匿埋太子街市轉角處嘅小店，本身以炭燒小食、香草燒春雞為主打，午餐特別重有一款超平價套餐，人址僅$48，無需加一！

位於太子一隅小街道上嘅「晉家門炭燒工房」，其實距離界限街或荔枝角道不遠，直接啲就係基隆街、白楊街交界，週邊可以見到街市檔口。從知名古蹟景點「雷生春」出發，2分鐘步程可以直達。

該店本身就如店名一樣，以炭燒小食為主，亦都係一間小型西餐廳。店內裝潢雖然偏向中式風格，古色古香，同主打菜式有啲背道而馳，但中式裝飾配西餐或者對大家嚟講係有新鮮感嘅。餐牌上唔單止有意粉、扒類、pizza，亦有意大利飯、串燒等，應有盡有，店內更特別提供有好幾款手工啤酒，如果單單想飲杯酒，都可以選擇呢間小店。

講到店內招牌作，必然係香草燒春雞$228，寫明採用鹽、香草、黑胡椒醃製調味，再加蒜頭、洋蔥、薯仔，入焗爐用高溫烤製。不過，燒春雞即叫即做，需時要40分鐘，咁先可以做到皮脆而肉質鮮嫩，香氣均勻滲入雞肉內，更加惹味。

今次午後前後「晉家門炭燒工房」，被店內午市一款特價餐吸引，雖然只有兩個餐，供應至下午4點，但堂食、外賣都得。價錢上，兩個餐一律只係$48，而且並無加一服務費，加埋嘢飲都平過連鎖店，真係CP值頗高！

A餐係火腿什菌忌廉意粉，B餐係茄汁辣腸太陽蛋意粉，另加$8有凍熱飲品，但都係檸茶檸水奶茶咖啡。兩款意粉就好似平常cafe食到嘅意粉，份量適中，但價錢就平得多。簡單嚟講，一款係白汁意粉，另一款就係茄汁意粉，醬汁量並非太黏稠，只係恰好與意粉混合，意粉應有嘅乾爽彈性辣肉腸份量都唔少。

店內有款全新推介嘅鹽燒白鱔$38，即管試試，燒烤係需要時間，而且串燒係手工之作，要用心先可以燒得好。平常鹽燒白鱔比較難自己炮製，魚皮燒得焦香十足，入口脆卜卜，唔會好鹹，魚肉則保持軟嫩。將串燒上檯時，發現該店將檸檬茶淨返嘅檸檬頭用於串燒上，並無浪費。因為一個檸檬中間切開嘅檸檬片係用於檸檬茶內，而檸檬頭就用於配搭串燒，皆因串燒本身只係需要少量檸檬汁，提鮮而唔會搶過本身食材味道，而檸檬頭亦用易攞上手，唔會成手都係檸檬味。呢嚿檸檬選得好好，檸檬茶都有陣陣清香味。