攞籌機制有漏洞？荃灣超人氣煲仔飯江湖小棧排隊1.5小時值唔值得？

冬天氣溫下降，最適合拍拖兩個人去搵間煲仔飯食吓，一齊暖笠笠食餐飯。講到煲仔飯，人氣選擇不少，荃灣「江湖小棧」絕對係超人氣選擇，到底值唔值得前往？呢間小店往往都要大排長龍，甚至需要等候一小時先可以有機會入座。不過，據親身認證該店攞籌機制，發覺其實唔需要於門口等候，過咗號碼亦無需要補飛。換言之，攞完籌任何時間都可以入場，到底係規矩人性化定係有漏洞？不過，規矩就係規矩，既然定落嚟係咁，只有接受同唔接受，唔能夠質疑同批評。

位於荃灣鱟地坊嘅「江湖小棧」，每日傍晚5點半開始營業，以煲仔飯為主打，就似該店以江湖武俠味為主調設計一樣，早早已經名鎮江湖，受到大眾歡迎。無論係本地人定遊客，都識得慕名而至。對於土生土長嘅香港人嚟講，真係好怕食「江湖小棧」，因為永遠都係大排長龍，恍惚等到天荒地老。今次E.A.Two得閒即管去試吓排隊，6點半到場取籌之後，一直諗可唔可以先離開，又擔心返嚟會唔會過咗號碼。

結果發現，「江湖小棧」嘅排隊方式有別於其他小店，取籌之後係唔需要企門口等候，個號碼只係一個報到作用嘅籌，但唔知點解日日都勁多人企喺門口等候入座。據觀察同事後詢問所得真相，步驟係先取籌，然後等叫號碼，但其間係可以四圍去，即使號碼過咗都唔需要補飛，只要保留當日個籌號、人數，都一樣可以即時報到入座。

舉個例子，當日有人拎住37號飛，走到老遠再折返，號碼已經叫到60號，號碼已經過咗23個；該4位客人即時報到，店員都係安排優先點餐，唔需要再等補飛或幾張檯，當菜式預備好就可以即時入座。就算你係61號籌，都係需要等返轉頭嘅號碼入晒座，先至會輪到你。入座後，一個店員更正另一個店員話75號呀，咁晏重邊會係35號，我哋好想搭嘴，剛才咪就係37號而家先入座囉！當日有好多檯都係咁嘅情況，係合理插隊，結果等候時間係不能預計，足足等咗1.5小時先可以入座，企門口等簡直就係浪費時間。講真，呢個取籌入座無需補飛方式反而好煩，寧願選擇確切地一個個順序排隊入座嘅餐廳，大家一齊等候，反而來得更公平。

不過，呢個方法都係人性化嘅安排，唔需要企門口等，只要憑籌號就可以隨時入座；只係整個排隊機制都係有漏洞，無論食唔食呢間餐廳，如果可以每日傍晚經過荃灣，都可以攞咗籌先算，反正取張籌又無影響自己嘅。只係呢個做法對其他等候入座嘅人嚟講，完全難以預計自己需要等候幾耐時間，變咗有少少對其他人唔公平。只不過，當人人都係咁做…umm…if you can’t beat them, join them.

幾經辛苦入座，該店安排最好嘅地方就係用砂煲盛載嘅煲仔飯等菜式都係已經準備好，而且放上檯面。每款煲仔飯價格基本上都係劃一$90，需時20分鐘。唔單止可以自己加醬油，亦可以自己加豬油，先加一圈豬油，再加三四圈豉油，再焗多兩分鐘左加，就可以開蓋食得。店內嘅豬油係自行煉做，的確係令煲仔飯更醇厚細膩，只係就肥膩咗啲，完全係邪惡豬油煲仔飯。

煲仔飯配料選擇不少，包括有豉汁白鱔、欖角排骨、合時臘味、麵醬鯰魚、蝦膏肉片、田雞排骨、蒜蓉鯰魚、鳳爪排骨、豆豉鯪魚排骨、馬拉盞牛肉、馬拉盞排骨、香菇肉醬、土魷肉餅、榨菜肉餅、北菇滑雞、鹹魚肉片、鹹魚排骨、膿味田雞、臘味排骨、臘味滑雞、蒜蓉排骨、蒜蓉田雞。自選煲仔飯同價可揀1至3款配料，4款就加多$5，除咗上述配料，重有鹹蛋、窩蛋、蝦乾、臘腸、潤腸、臘肉等。

因為剛好前面太多人合理插隊，所以連豉汁白鱔都無晒，只能隨便點次選嘅配料，一煲係田雞排骨，另一煲係自選嘅臘腸排骨肉餅。上檯時，只要自行加入適量豉油同豬油就得，之後再自己撈勻。煲仔飯飯底的確係有飯焦，有飯焦面嘅飯粒的確係帶有焦脆感，質感似脆米，但有啲就略為脆到硬咗啲。而整體白飯都係偏黏身，而非舊時好多年前最出名嘅廟街炭香煲仔飯嗰種乾身，或者係因為而家嘅人比較鍾意食黏身嘅煲仔飯啦！

每份煲仔飯頂端都有大量蔥花，美其名係點綴，但似乎實際上係遮蔽蔥花下面嘅配料？白飯與蔥花之間就係剛才每人所選嘅配料，配料份量其實都真係唔算多，甚至可以或偏少，以田雞為例，將田雞碎上，加埋感覺可能無一隻田雞量，而田雞好似唔算好有彈性，或者真係太遲入場啦，一開始入座應該會更好。

除咗聞名香港嘅煲仔飯，亦可以揀煲仔菜，都係啫啫煲嚟，可以配搭通菜、芥菜、芥蘭、金銀蛋肉碎時蔬；其他人氣菜式有錫紙花甲粉$128、客家黃油雞$178、勝瓜海鮮湯$148、八寶海味糯米飯$168、黃薑海鮮糯米飯$168等。啫啫煲芥蘭上檯的確有煲仔鑊氣，不過不失，只係最大作用係用嚟解除煲仔飯嘅鹹同油膩。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式只接受現金，店內完全唔會收其他付款方式。

❷ 該店以現場取籌模式入座，不設訂座。

❸ 取籌係鬥早，只要17:30攞到籌，就等如已報到，無論幾多點入座都得，唔需要企門口等候叫號碼。而且該店不設補飛，但就可以拎住張籌當日隨時入座，即使遲咗廿幾三十個號碼，一樣可以優先入座。就算夜晚9點、10點、11點，閂門前任何時間都可以隨時入座

❹ 所以，如果唔係17:30攞飛，絕對唔建議前往，就算下個號碼輪到你，但只要有前面任何號碼嘅人突然返轉頭，你都只會見到一堆人遲到插隊入座，所以等候時間絕對係不確定。不過呢個係該店嘅隱藏規則，喺呢個規則之下，攞完籌其實可以唔去，亦可以隨時入座。