香港仔華富邨逾40年歷史麗絲快餐店！真港式漢堡包完勝人氣生炸雞髀！

港式快餐店係本地愈趨少見嘅產物，想要拍拖兩個人搵一間港式快餐店，又要係小店嘅店舖，係難上加難。華富邨係唔少攝影發燒友會前往影靚相嘅屋邨，今次E.A.Two就前往香港仔華富邨，找尋隱藏於邨內嘅真港式快餐店，當中炸雞髀係最具人氣之作，但我哋反而覺得店內嘅港式漢堡包先至係MVP！

無論從九龍區定香港區，都可以乘搭巴士直達香港仔，一係於華貴邨落車，穿梭屋邨至「平民豪宅」華富邨，一係直達華富邨，交通便捷。抵達華富商場之後，沿路前往華富商場二期，就可以搵到呢間由80年代至今、屹今有超過40年歷史嘅「麗絲快餐店」。

時代變遷下，「麗絲快餐店」係香港僅存嘅地道舊式快餐店之一，呢種懷舊味極濃厚嘅港式快餐店，絕對可以令唔少香港人感受到童年回憶！該店位於有超過50年歷史嘅華富邨內，近年曾面臨清拆危機，目前已經走過近半個世紀，依然維持住平民價錢同即叫即做港式快餐。

該店門口招牌寫明「雞髀大王」、「漢堡包大王」，雖然已經從第一代老闆娘轉手，但依舊不失舊時特色。其中，店內最受歡迎嘅係港式生炸雞髀，炸雞髀可單買，每隻$36。下午茶餐有7款，價格都係$35至$51，可以配粉麵、三文治、小食，另亦有港式炒粉麵；而炸雞髀套餐只有配薯條，但依然受炸雞髀關注組關注。

今次點咗一人一隻炸雞髀，竟然出現一大一細，細隻少少嗰隻齋睇外表有啲失望，而大隻嗰隻齋睇個外形真係好驚喜，恍如手掌嘅大小！炸雞髀同樣色澤金黃，油香四溢，肉質亦算嫩滑，但雞髀表面加入黑椒調味，反而感覺係畫蛇添足。不過，大嗰隻就有啲失望，因為最入唔太熟，表面加晒分，入面就變咗大扣分；反而細隻容易熟，原先表面扣分，入面就加返分。簡單嚟講，炸雞髀就係水準唔太穩定。

肚餓少少可以叫炒粉都或雙拼湯粉麵，除咗咖喱牛腩、煎蛋免治牛肉飯、粟米肉粒、葡國雞呢「四大天王」，今次點咗火腿雞翼通粉$37，不過不失，係畫蛇添足多咗啲三色豆。而舊式快餐店必然係寧願加$5叫紅豆冰，紅豆唔算好大粒，但就粒粒軟腍；至於凍檸茶就麻麻地啦，茶底唔得，就只係甜味。

今次真係私心推介漢堡包，寫明特選紐西蘭純牛肉漢堡，人均$28至$33，可以自由選擇牛扒、牛脷、豬扒、魚柳。特厚牛肉芝士漢堡包$32，漢堡包又厚又大件，四四正正，唔會有凹陷狀況。牛肉漢堡扒係即叫即煎，係手打製作，可以選擇配搭茄汁或沙律汁，呢款港式漢堡包的確有舊時風味。麵包上有芝麻香、牛油香，中間有一塊厚切牛肉漢堡扒，質感軟嫩、有牛味，芝士融合漢堡包餡料，唔會好膩，而且真材實料，比連鎖快餐店價錢更抵食，呢種絕對係香港碩果僅存嘅漢堡包！