【曼谷旅行團】參加一日Local Tour走勻5大景點！遊覽美功鐵道市場／丹嫩沙多水上市場／安珀瓦水上市場！打卡百年教堂／樹中廟／螢火蟲！

去曼谷有時會想join吓local tour，實行拍拖兩個人曼谷一日遊，擔心call車或包車唔安全嘅話，又想去遠少少，倒不如參加非一次性嘅local tour，有導遊介紹景點，亦等如同其他人share車租，最後畀小費導遊同司機就得。

預約KKDAY／KLOOK Local Tour

曼谷水上市場係不得不去嘅景點，「美功鐵道市場」、「丹嫩沙多水上市場」、「安珀瓦水上市場」都係曼谷3大特色市集，皆不乏地道泰國文化。不過﹐呢3個市集與曼谷中心點有一段距離，唔能夠靠BTS或MRT前往。如果擔心一次包車等途徑唔太安全，比較安全嘅方法其實就係找尋有導遊嘅旅行團。今次E.A.Two就實試KKDAY嘅拼車旅行團，該行程並非只有一次，而係一直都有開團，同評價中嘅朋友寫嘅內容無乜太大分別。

所謂拼車團，其實就等如幾個人夾租車，當中更包含一個司機、一個當地導遊。是次一日團有一個泰藉司機，以及一個居泰超過廿年嘅華藉導遊，所以可以用中文溝通。不過，略嫌KKDAY未能提供英文團，皆因我哋比較鍾意跟有西方遊客嘅Local Tour多啲，相對會更放心同安全。

KKDAY同KLOOK有唔少一日團可以選擇，好多都有「美功鐵道市場」、「丹嫩沙多水上市場」或「安珀瓦水上市場」，需要再自行篩選合適自己嘅行程，因為大多數都唔會一次去到3個市場。今次Join嘅一日團除咗可以同一日前往上述3個市集，重包括有聖母院百年教堂、泰拳公園、樹中廟，最後更可以欣賞螢火蟲！

該行程分為平日團同假日團，平日團只到傍晚5點，而假日團就到夜晚9點半，該時間前可以返回曼谷市中心。E.A.Two參加嘅係假日團，只限星期五至日，而平日團係星期一至四，只有2個市場，另外加入網美打卡咖啡店，After the Rain或In Garden Hut Cafe。回程時，有一段路必須要夜晚8點前穿過，所以最後一站一定唔可以遲到，否則會影響時間，如果8點前穿過該路段，無需要9點就能折返起點處。起點同終點都係「Adagio Bangkok旅店」，位置靠近BTS「Phrom Phong站」。

KKDAY行程

KLOOK行程

第1站﹕美功鐵道市場

上車之後，第1站會去到知名嘅「美功鐵道市場（ Maeklong Railway Market）」，落車後可以跟導遊徒步到路軌位置。美功鐵道係泰國曼谷一條真實鐵路，全長有1000毫米，係一道窄軌，由1901年起營運，目前依然運行當中。

「美功鐵道市場」最大特色係火車可以直接穿過街市，由美功站行去曼谷方向，火車來回會穿梭街市兩次，所以大家指定時間至少有兩次機會打卡火車穿過街市嘅畫面。列車路軌闊度其實不足2米，非常狹窄，所以當列車抵達之前，街市地攤必須要將所有物資收起，列車先可以順利通行。

而美功鐵道街市攤販於列車來臨前，迅速收起物資嘅景象，正正係該鐵道市場嘅重要特色。呢個情境已經成為世界奇觀，引得中西遊客慕名而至，當列車來臨前，大家都搵定位企定定，褪入各攤檔入面，所有人必須企喺紅線以內，所以名副其實「請勿超越紅線」！

從路軌抬頭，可見火車車廂內有好多乘客，上方乘客向下俯視，街市途人就抬頭仰望，雙方互相影住對方，甚至互相say hello，畫面有趣。值得留意嘅係，當火車準備到達時，一路會鳴笛，聽到笛聲就要留意，必定要企入攤檔內，否則會被火車撞到，皆因火車同紅線真係好近距離。

街市係曼谷近郊傳統市場，座落路軌之上，火車未到站時，亦係行人可以徒步穿過嘅逍道。當列車離開之後，各攤販就會迅速回復原狀，無論係雜貨舖、鮮魚、鮮肉、蔬果、香料、熟食、小吃、紀念品店等，所有商品都會馬上重新曝光，難怪可以成為奇境。

火車會每日到達「美功鐵道市場」4次，來回共8次，跟一日遊拼車團前往「美功鐵道市場」，想要捕捉到火車路過市場攤販嘅黃金畫面，基本上需要留意嘅時間係11:10、11:30，而其餘進站與出站時間分別為06:20、08:30、09:00、14:30、15:30、17:40。

第2站﹕丹嫩沙多水上市場

離開「美功鐵道市場」，導遊就會帶我團友們前往「丹嫩沙多水上市場（Damnoen Saduak Floating Market）」。導遊特別提到呢個地方係泰國曼谷一個非常之窮嘅地方，但就係好受歡迎嘅水上市場。「丹嫩沙多水上市場」係曼谷5大水上市場之一，係幾獨特嘅市場，市集內有極多木船，一部份係載遊客，另一部份就係賣嘢。

「丹嫩沙多水上市場」一帶本來係來自於曼谷未發展嘅時候，當時陸路交通唔發達，依靠水路嚟促進貿易經濟，故此後來逐漸出現水上市場，並引嚟大量觀光遊客。該水上市場與陸路完全連接，落車後，導遊就安排大家上船，從水路遊覽水上市場。

據悉，該市場來自於19世紀，係「泰皇五世」下令興建，20世紀起使用至今，有逾150年歷史，香港大澳就有「東方威尼斯」之稱，有指呢個市場曾被稱為泰國版嘅「東方威尼斯」，連電影《007》都曾經於忘地取景！遊船期間，唔單止會見到左右兩邊有一架又一架引擎船、手划船，每架都有人負責控制隻船。由於我哋經旅行團遊船，所以係上手划船，後面有船夫划船。

遊船前段基本上都係買賣為主，船隻於河道上做交易買賣，大多數都係小吃，不過條河都幾污糟，其實都有啲怯怯哋。落船後貪得意買咗杯椰子雪糕，岸邊食咗碟蟹肉炒飯等，翌日馬上唔舒服，病徵係發燒、發熱發冷、肚屙、屙綠色屎等，結果影響咗至少一晚行程。

上船其實都有啲風險，上嗰吓左右搖擺，搖搖欲墜真係驚驚哋，恍惚隨時會翻船。直到遊船中段，會比較少見到買賣船隻，反而會見到週邊小屋建築。事實上，水上市場都係當地居民居住嘅地方，河道四通八達，建築設計係一種叫高腳屋嘅小屋。據知呢種建築物亦叫干欄式建築物，大多分佈於東南亞，但台灣、馬達加斯加都會有機會見到，可以參觀水上人嘅生活。

第3站﹕聖母院百年教堂

逛完兩個市場，然後會前往「聖母院百年教堂」，導遊解說好詳細，可以了解到教堂歷史。曼谷一帶有好多古廟，但呢間係一間信奉天主教嘅教堂。該教堂於1860年已經建成，來自於法國傳教士Paulo Salmone。

該教堂係另一個打卡必到嘅景點，從外觀所見，教堂係採用哥德式建築風格設計，據悉該建築物係用咗6年時間先建成﹐教堂有好多來自法國嘅彩繪玻璃，相當華麗。曼谷古廟嘅人流一向較多，但到教堂參觀嘅人流就較少，週邊唔會好擁擠，比一般曼谷古廟清靜。

教堂位處一間小學入面，週邊有體育場，一端有河景，該河景係湄公河，吹吓海風都幾愜意。教堂係一間古老天主教堂，教堂內部都係值得欣賞嘅地方，入面掛有禮儀師嘅照片。不過，呢個景點唔係逗留好耐時間，同埋大部份遊客都對教堂歷史無乜太大興趣，所以好多人都好快上咗車。

第4站﹕泰拳公園+樹中廟

參觀完西方教堂，接下來就會參觀返泰國地道古廟。呢間古廟既位於「泰拳公園」內，亦座落一棵樹入面，所以呢座廟又叫做「樹中廟」。雖然呢間只係一間小廟，但就聚集咗唔少泰國虔誠信仰嘅民眾，廟入面係嚴禁拍照，更特別之處進入廟前必須先除鞋，唔可以穿鞋入內！

「樹中廟（Wat Bang Kung）」座落於「泰拳公園」內，公園內有鬥雞、打泰拳人形雕塑像，亦有供奉泰王鄭信嘅雕像。至於呢個地方有廟先定有泰拳公園先，我哋就不得而知啦，唔記得咗問導遊，有興趣不妨到時問吓導遊啦。

整座「樹中廟」完完全全被一棵樹包圍，週邊有大量植物，樹下就係一座廟，一直被樹根纏繞。廟宇地方不大，只係容納一座滲出金光嘅佛像。入面左右有樓梯，遊人同信徒需要從左邊進入，然後繞過佛像後面，由右邊樓梯離開。該小廟宇至今有逾400年歷史，來自於大城王朝，參拜嘅人都幾多，排隊人潮一直絡繹不絕，據稱係一間曼谷求子、求姻緣好靈驗嘅地方。

雖然該廟主要係聚集當地人，但都有唔少外國遊客，我哋都係跟旅行團前往嘅遊客之一。因為除鞋需要徒步街邊，所以我哋寧願唔進入廟宇內，但從大門口都可以望入去。基本上，「樹中廟」一眼睇晒，廟內只係供奉住釋迦摩尼佛像，好似有一片片金箔，不過就離遠都睇到有啲殘舊斑駁。之但係，一株佛像座落樹入面，又真係幾奇特，有啲似大城區嘅「瑪哈泰寺」。

泰拳公園 Wat Bang Kung／樹中廟

Bang Kung, Bang Khonthi District, Samut Songkhram
https://web.facebook.com/pages/%E0%B8%A7%E0%B8%B1%E0%B8%94%E0%B8%9A%E0%B8%B2%E0%B8%87%E0%B8%81%E0%B8%B8%E0%B9%89%E0%B8%87%20%E0%B9%82%E0%B8%9A%E0%B8%AA%E0%B8%96%E0%B9%8C%E0%B8%9B%E0%B8%A3%E0%B8%81%E0%B9%82%E0%B8%9E%E0%B8%98%E0%B9%8C%20%E0%B8%AD.%E0%B8%9A%E0%B8%B2%E0%B8%87%E0%B8%84%E0%B8%99%E0%B8%97%E0%B8%B5%20%E0%B8%88.%E0%B8%AA%E0%B8%A1%E0%B8%B8%E0%B8%97%E0%B8%A3%E0%B8%AA%E0%B8%87%E0%B8%84%E0%B8%A3%E0%B8%B2%E0%B8%A1/961583520599818/?locale=th_TH

第5站﹕安珀瓦水上市場＋螢火蟲遊船

行程最後一個目的地就係「安珀瓦水上市場（Amphawa Floating Market）」，到達呢個地方嘅時候，其實已經係下晝近黃昏時份，大概係4點幾。當時有部份水上市場攤檔都無開門，到底係未開門定閂咗門，就不得而知啦。更意外嘅地方係剛好遇上水漲，有一段主要路段根本行唔到過去，連天橋另一邊都行唔到過去，兩岸都出現水漲情況，結果大部份時間都係局住困喺起步嗰一段路。本來有一段市集夜晚係黃金時份，但水退之後，只係淨返15分鐘左右，旅行團下站需要集體去睇螢火蟲，所以基本上只能夠快速走馬看花逛一小段市集。

該市集其實係曼谷近郊另一個受歡迎嘅水上市場，與「芭堤雅四方水上市場」、「丹嫩沙多水上市場」齊名，不過同上述水上市場比較起嚟，「安珀瓦水上市場」係較受當地人歡迎，觀光客無咁多。抵達該水上市場嘅時間大概係五點，導遊畀大家自由行逛，不過因為水漲問題，當時大部份時間都被困於起步一段路，只能夠勉強於岸邊坐低食少少嘢，以及從水上市場觀賞河景同夕陽景。

等到傍晚大概6點鐘，該段主要通道終於水退，原來係可以通行市集部份，該段會有較多餐廳同攤檔，同樣係湄公河畔位置。可惜15分鐘後又要集合，結果只可以走馬看花逛15分鐘，大概只見到泰國手工藝品，少數小吃，以及泰國香料等。及後，導遊再帶團友們去體驗搭船，行程唔單止包含上一個水上市場嘅遊船，亦同時連同「安珀瓦水上市場」嘅遊船體驗。上一個行程只係單純地睇棚屋、手划船買賣，但今次正值傍晚時份，睇嘅就係螢火蟲！

上一個水上市場每隻木船只限大概只限4人上船，但呢個水上市場嘅係大船，可以容納團內所有旅人，連同導遊、負責人，人數大概就係14人，船頭位置比較狹窄，比較適合身形嬌小嘅女士或小朋友。「安珀瓦水上市場」嘅螢火蟲並非經常都有，亦非一年四季常見，而且需要睇天氣狀況，所以能否觀賞，或者螢火蟲多寡，全賴彩數！

木造長尾船會逐漸撐離水上市場中心地帶，隨水流前進，一邊遠離木屋同泰國傳統市集，然後向比較暗嘅方向前往。愈暗嘅地方就愈多螢火蟲，頭段會比較少，中段會比較多，後段亦有唔少，恍如穿梭時光隧道。螢火蟲閃爍發光，大部份都係黏附於樹上，就好似一棵棵天然聖誕樹，部份則會飛來飛去，如同夜空中嘅精靈，見到有少數飛到頭頂上方，相當意外。船隻一直前行，比較少停低，相機其實比較難拍攝到螢火蟲模樣，就算用手機拍片都睇得唔清楚，倒不如用眼細心欣賞，留於心中更歷久常新！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 只需要於kkday／klook預約，收到email confirmation，就可以依指示到起點等候，多數都係「Adagio Bangkok旅店」。

❷ 行程會經過「美功鐵道市場」、「丹嫩沙多水上市場」、「聖母院百年教堂」、「泰拳公園及樹中廟」、「安珀瓦水上市場」。謹記每一站都唔好遲到，因為會影響成個行程。

❸ 參與完local tour，記得畀小費導遊、司機，各自100泰銖，換言之每人約畀200泰銖﹐兩個人就約400泰銖起。

❹ 一日遊行程中，導遊同司機會走兩轉油站，畀大家去廁所，包括美功鐵道市場、丹嫩沙多水上市場之間，以及逛完安珀瓦水上市場之前。