最美%Arabica分店！曼谷Empire tower高空咖啡店享180度風景！秘密通道打卡EA牆、天空之鏡！最平110泰銖、可自選咖啡豆

曼谷有唔少受歡迎嘅咖啡店，好多人都慕名去打卡，當中%Arabica分店眾多，有一間分店係近年人氣十足嘅咖啡店，E.A.Two覺得絕對堪稱曼谷最美嘅%Arabica咖啡店，最平110泰銖就可以從高空享受曼谷180度市景，拍拖兩個人前往記得留意建議最佳時間！

曼谷Sathon沙吞區有BTS直達，交通便捷，其中78樓高嘅曼谷「王權瑪哈納功大廈」就係受歡迎嘅景點，可以從高空賞景，入場費為1000至1200泰銖，大概係港幣220至230蚊。不過，該大廈附近其實有一個成本更低嘅地方，同樣可以從高空觀賞曼谷市風景，絕對媲美「王權瑪哈納功大廈」Mahanakhon SkyWalk 觀景台。

乘搭BTS綠線至曼谷Sathon區，兩個站分別都可以抵達「Empire Tower」，位置鄰近「王權瑪哈納功大廈」，該大廈近年轉瞬已成為人氣十足嘅打卡咖啡店，亦算係曼谷最受歡迎嘅「% Arabica」分店。從BTS徒步至又名「帝國大廈」嘅「Empire Tower」，就會抵達我哋今次嘅目的地。該大廈建築來自於Asset World Corporation，於2023年以「Co-Living Collective: Empower Future’ Experience at ‘The Empire（共居：帝國未來）」為題規劃成唔同空間，就等同一幢辦公大樓。

對於E.A.Two嚟講，最特別之處就係大廈有「EA」牆可以打卡，雖然只係大廈名稱，但感覺就係代表住Mr E、Miss A呢！更值得留意嘅地方係依循「EA」指示牌，經過樓底特高嘅中庭，直行至鏡面位置，轉右就可以經秘密通道通往樓上嘅高空賞景咖啡店同餐廳，其中「%Arabica（Percentage Arabica）」就係熱門打卡點。該分店於2023年底先正式開業，我哋於2024年前往，發現該店已經受到中西遊客歡迎，咖啡店內唔單單侷限於當地人。

「Empire Tower」有兩邊，分別最高有62層同58層，海拔皆有227米，大多係辦公室用途。而呢間來自於日本人嘅連鎖咖啡店「%Arabica」分店位於55樓，秘密大堂以全黑設計，附近有裝飾藝術品，一程電梯就可以直達！該層設有「EA Gallery」，「%Arabica」亦設於同一層樓，而「EA Rooftop at The Empire」就位處60樓，有興趣可以同一日前往。電梯門打開之後，55樓純白色設計同樓下風格有強烈對比。

就算呢間「%Arabica」分店唔係曼谷最高嘅Coffee Shop，但朝早時份10點前依然有唔少人坐於咖啡店窗邊。咖啡店左右兩端都係長吧檯，每邊各有10個座位，換言之合共只得20個座位，只係座位後面有少量企位。如果前面靠窗座位滿座，只能夠靠運氣，等前座客人離開後方才可以入座，因為八成客人都係為窗前180度風景而來。玻璃窗前嘅座位更特製鏡面玻璃，鍾意打卡嘅朋友可以天空藍為背景，並輕易拍攝天空之鏡。

店內可以望到白色吧檯內嘅咖啡師沖泡咖啡嘅情況，而咖啡分4個size，可以選擇4oz、8oz、12oz、16oz。今次E.A.Two選擇咗12oz，因為兩杯咖啡最高都係得12oz。Espresso最平110泰銖就有一杯，低至4oz，而Iced Espresso Tonic一杯165泰銖。一杯Caffe Latte亦只需135至165泰銖，另外重有Kyoto Latte同Dark Latte。Non Coffee選擇就有Matcha Latte、Lemonade系列、Water Sparkling等，呢邊係唯一最高有16oz嘅選擇，淨飲水就要70泰銖。

其實熱飲有拉花，但曼谷天氣比較熱，始終係凍咖啡比較適合。今次選擇一杯White Mocha就由170至200泰銖不等，分別有8oz至12oz，入口朱古力味適中，唔會太甜。另一杯就揀咗Drip Based Chemex咖啡則賣185至205泰銖，可以自選咖啡豆，今次詢問店員之後，揀咗Columbia嘅咖啡豆，入口Fruity，令咖啡果味較重，質感係比較清爽，同時咖啡味唔會好苦澀。同一般分店一樣，除咗咖啡，亦有少量輕食，包括丹麥麵包、可麗露，以及110泰銖一個嘅牛角包。店內另有Soft Cream，包括原味、綠茶味，亦有Affogato，價錢由100泰銖起，綠茶味亦只係140至245泰銖。

「Empire Tower」內嘅「%Arabica」分店既位於55樓，於曼谷市內其實都算係頗高嘅樓層，可以經巨形落地大窗180度賞景。於55樓飲住咖啡，從高空視覺環瞰曼谷市內景色，包括樓高84層嘅「Baiyoke Sky Hotel」，高樓美景一覽無遺，天際線亦盡收眼底。咖啡店窗邊景觀遼闊，無論坐櫃檯左邊定右邊，視野同樣廣闊，日落時份大概傍晚6點左右更加係最美嘅時份，隨時可以打卡粉紅色或橙紅色日落景。

不過，黃昏時人流比較多，所以E.A.Two私心建議朝早前往，人流會較少，而且必須於9至10點前抵達咖啡店，環境較清靜之餘，亦大飽眼福，可以安心歎杯晨啡！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭BTS深綠色線至「Saint Louis站」或「Chong Nonsi站」，徒步約10分鐘即達。

❷ 該咖啡店位於大廈內，依「EA」指示牌走，唔需要上樓，直行到底鏡面右邊有條秘道，可以直上55樓。

❸ 雖然黃昏時間係最靚，但人流同樣係最多，建議朝早前往，人流會比較少，最好係10點前抵達，否則就只能外賣企喺度飲咖啡，需要等候前排嘅客人雜座先可以入座觀景。

❹ 店內部份咖啡可以自選咖啡豆。