曼谷懷舊排隊烘焙店人氣極高！逾60年Ama Bakery來自XX、古早味麵包名過於實？

曼谷有唔少小吃都受到當地人同旅客歡迎，鄰近BTS站嘅Silom Road就有一間古早味麵包店，懷舊味濃，人氣極高，經常大排長龍，到底係咪值得拍拖兩個人前往一試呢？

E.A.Two最初只係於Google地圖發現有間叫做「曼谷阿嬤烘焙店 Ama Bakery」嘅麵包店，Google評分有高達4.6分。一查之下發現該店係一間極受歡迎嘅舊式麵包店，屹今有逾60年歷史，懷舊味濃厚。該店座落Silom Road內，唔單止受當地人歡迎，菲律賓賭王胡慧沖亦介紹過，連遊客都慕名而至。

從BTS站徒步至該店，大概只有10分鐘步程，甫抵達門口，就發現門外有一條長長人龍，中西遊客同當地人夾雜，似乎真係名氣十足。據知，該店最為人熟悉嘅係一款香蘭葉custard麵包，大部份都係綜合口味，配搭唔同食材配料。

從玻璃櫃可見，店內基本上同一般麵包店無太大分別，以餐包為主打，只係分別放有唔同餡料。每個餐包大致上由18至24泰銖不等，以單個計算，餡料有蘑菇、豬肉、香腸煙肉、火腿芝士、雞肉等，合共大概只係得9款可以選擇。由於E.A.Two覺得無咩吸引力，所以頂晒龍只係挑選咗其中兩個餐包試試，包括現場比較受歡迎嘅香腸煙肉、火腿芝士口味。

兩款餐包同平時港式麵包店無乜太大分別，甚至可以話香港麵包店嘅麵包更加出色。呢間老字號麵包店內餡只有普通餡料，即刻食咬開亦無爆漿可言，質感亦非滑順或濃稠，反而有啲膩感，結論就係寧願食無餡麵包。

唔係親自到達現場都唔知，原來該店係一間小紅書內好受歡迎嘅麵包店，門口直頭放有大大張poster，寫明同小紅書旅行有關等等。更意外嘅地方係，該店最早並非曼谷人開設，反而係由國內海南移民至曼谷嘅人開設，已經去到第3代，所以其實唔算係地道曼谷麵包店。至於最終選唔選擇食，就有讀者自行決定。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 該店不時大排長龍。

❷ 現場未必有斑蘭麵包，大部份都係普通麵包。

❸ 乘搭BTS至「Saint Louis站」或「Saint Louis站」，徒步約10分鐘即達。

❹ 其實該店麵包唔係想像中咁高水準，反而只係平平無奇，無乜特別，同平常麵包舖嗰啲無乜分別，甚至港式麵包店更好食，所以唔值得專登前往。