【曼谷新商場】Siam Scape主吸年輕人？設屋頂花園、室內大量木階梯休息賞日落！

曼谷不時有新商場，Siam一帶商場林立，購物中心比比皆是。今次E.A.Two就前往該區一個新落成嘅商場，內有大量休憩空間，有木階梯，亦有屋頂花園，受到當地年輕人歡迎。如果喺市區逛街行到攰，不妨拍拖兩個人去休息一下啦！

「Siam Scape」係曼谷Siam區全新商場，來自於Shma Company Limited，內有唔同主題。其中，天台就以「Sky Forest Scape」為主題，打造一個城市空間，內有綠化地帶、聚會地方，以及步行道等，近年先正式開放！

徒步進入商場之後，一直依循扶手電梯上行，會發現有一條步行道，據知名為「Bio Street」，將翠綠植栽同多孔板融合，鋪成類似乾式窪地，一直可以上行至10樓。呢個空間需要經扶手電梯﹐但若然嫌悶同多餘，其實直接搭電梯到頂樓都無咩損失。

中層其實無咩商舖可言，直到近頂樓處先有少量商舖，其中10樓就係一啲藝術學院、補習社等。而頂樓天台位置就係一個屋頂花園，日光時間可以容許公眾免費進入。從屋頂花園下瞰，可俯視曼谷中心地帶市景，Siam區風景亦一覽無遺。據悉，該綠地空間落成後，曾榮獲2024年金點設計獎。

屋頂花園下其實有大量休憩空間，包括木階梯，可以隨意坐低休息，當地有唔少年輕人都坐低傾偈，甚至玩遊戲，令此處變成一個新式公共空間。木階梯之下，另一端會見到一間7-Eleven，呢間都算係最美7-Eleven，唔單止座落高層，而且偌大落地玻璃窗完全透視曼谷Siam街景，黃昏時份更可享日落景呢！

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭BTS至「Siam站」或「National Stadium站」，徒步約5至10分鐘即達。呢個商場好近Siam大街，亦靠近MBK Center商場。

❷ 無論係屋頂花園定室內木階梯，都要特別小心上落，因為室內每個梯級都係不規則設計，而室內就好大級，差錯腳就隨時仆落地面。

❸ 商場其實唔係太多嘢睇，比較適合單純迆或到天台觀市景。

❹ 中間樓層有好多都無嘢，所以係可以直接搭lift上落。