概念大膽新穎！曼谷安全套主題泰國菜餐廳隱身窄巷！Cabbages and condoms restaurant宣揚Safe Sex！

泰國曼谷不時有趣味十足嘅餐廳，今次E.A.Two於市中心搵到一間以安全套為主題嘅泰國菜餐廳，位置鄰近BTS站，隱身於巷弄之間。唔單止裝潢滿佈Condom，設計大膽新穎，食完飯每人重會送一個安全套，Gimmick十足！原來該店係為咗宣揚Save Sex，比香港更識得推廣性知識，喜愛嘗鮮嘅朋友不妨拍拖兩個人去試試呢間泰國菜餐廳！

以安全套為主題嘅「Cabbages and Condoms Restaurant 」，距離「Asok站」只有約5分鐘步程，於大街上會見到該店指示牌，只要轉入小巷，一直前行就會搵到呢間特色泰國菜餐廳。踏入餐廳，方才發現該店有頗多西方客人，華人係比較少前往，或者西方人係比較開放啦。

餐廳大門口招牌非常清楚，只要踏入餐廳範圍，由走廊開始，自然會發現週邊佈滿Condom擺設。唔單止門口有拆開嘅Condom，所有擺設都係以Condom鋪砌而成，包括人形公仔上嘅衫、天使裝飾、吊燈上嘅燈罩等，全部都係由一個又一個Condom組合而成，相當前衛！

入到餐廳，不難發現週邊有以Condom砌成嘅花形裝飾，連餐檯上嘅原子筆都套有安全套裝飾。事實上，呢個Gimmick背後，都係為咗宣揚Save Sex，走廊內嘅海報都寫明「Savety First」。該餐廳係來自於泰國當地嘅家庭計劃組織，全名為「Population and Community Development Association（PAD）」，由1974年起已經宣揚安全性行為、預防愛滋病、促進人權等，據悉曾獲「Gate Award for Global Health」，觀念比香港更開放同正確。

甫於餐廳內坐低，店員指原我哋可以坐窗邊位，更指外面舞台於用餐期間有表演睇。點餐前，餐檯上有店員送嘅一小籃蝦片，有兩款唔同顏色嘅蝦片，味道無咩分別，不過就略嫌唔夠香脆。

雖然該店以Condom為主題，但實際上好難搵到同Condom有關係嘅菜式或飲品。如果要勉強搵同名稱上有啲關係嘅菜式，就係Condom Salad，一碟220泰銖。不過，撇除Condom主題﹐該店其實就係一間普通泰國菜餐廳，主打都係泰國菜。比較特別嘅係泰式炸魚、咖喱龍蝦，後者一碟賣2450泰銖；另有950泰銖嘅泰式軟殼蟹、950泰銖嘅燒河蝦、200至450泰銖嘅蛋包金邊粉等等。而冬蔭功湯低至每碗110泰銖，木瓜沙律亦只係180泰銖，大多數都係可接受嘅價錢。

今次兩個人只係選擇幾碟菜式，其中一款係原個菠蘿炒飯，最細碟只係200泰銖，份量唔少，足夠兩個人食用，炒飯本身都係乾爽同香口，擺放菠蘿內的確係可以令炒飯滲出微微菠蘿香甜味。一碟蝦醬炒通菜就賣180泰銖，去泰國通常好少食菜，叫一碟菜都唔算太貴，而大廚亦炒得幾有鑊氣，鹹度亦適中。

整體菜式唔算太大驚喜，只係不過不失，比較吸引嘅係泰式蒸魚，一份560泰銖。該蒸魚名稱叫Pla Ka Pong Nueng Ma-Now，寫明係Sea Bass配搭辣椒青檸等。上檯時，蒸魚係擺放火爐上面，所以係一直翻滾，保持熱度，鮮魚肉質嫩滑。同時，上咗檯先會加水煲魚湯，後來發現精華就係嗰啲魚汁，非常鮮甜！

用餐期間，戶外舞台方向有表演者嘅音樂表演，外面就好似一個叢林餐廳，室內就有冷氣提供。幾位舞者一直攞住燭台表演，雖然有啲唔太睇得明，但表演者會走到每一檯客人面前繼續表演，都算有誠意嘅。

店內一杯酒最平只係150泰銖，大部份同菜式一樣同Condom無咩關係，比較似有關係嘅係Blue Condom，一杯230泰銖，內含Tequila、Blue Curacao、Scotch Whisky、Triple sec、Pineapple Juice，上檯係湖水藍色，好搶眼，飲酒嘅話真係打卡必備！另有餐廳與Cibid品牌聯乘飲品，有奇異果青檸口味，亦有菠蘿椰子口味，該牌子係一款梳打汽水，每支只需100泰銖，不過味道有啲奇怪，純粹自己唔鍾意呢陣味。

至於甜品，其實有好幾款雪糕，亦有唔同配搭糯米飯，除咗去曼谷必食嘅芒果糯米飯﹐每份150至380泰銖，亦有一款係加入榴槤嘅榴槤糯米飯，一碟90泰銖，適合嘗鮮。兩個人用餐埋單總數最後1500泰銖有找，折合港常無需400蚊，換言之人均200蚊內有交易！最後最後，店員會為每人送上一個Condom，離開時會發現餐廳一隅都有得免費攞Condom，更有4款唔同Size可以選擇，包括Military size、Politician size、Coup D’etat size、Brand new democracy size，不過拆開發現4個好似無乜分別。雖則佢係宣揚Save Sex，但感覺免費嘢都係唔太可靠，大家了解性知識就算啦！