裕隆城設全台北最大誠品生活！毗鄰24小時家樂福、樓底特高天井書店！

台灣「誠品生活」向來係知名品牌，唔少人都會去逛吓街，近年新北市就有一間全台最大嘅「誠品生活」進駐「裕隆城」。該分店唔單止地方偌大，而且天井書店樓底特高，書籍數量繁多。商場更有眾多餐廳、商舖，可以拍拖兩個人慢慢閒逛。

由捷運「七張站」出發，徒步約10分鐘就會抵達「裕隆城」。該商場本身就有超過200個品牌進駐，地下有美食街，1樓有Starbucks、CAFE!N等咖啡店，2樓有UNIQLO、plain-me、LEVI’S、uniarts、PUMA、niko and…、Vacanza Accessory等品牌，3樓有展演空間及多個知名運動品牌服裝店，5樓有無印威品、nitori家居品牌等，而6至7樓基本上就係威秀影城。

商場內嘅「誠品生活」，完全包辦B1層至4樓空間，每一層都有唔同主題。B1層以「嬉．食趣」為題，1樓、2樓以「薈．生活」、「綻．風格」為題，前者係餐飲為主，後者就多為生活用品。而3樓就係「競．遊樂」主題，野花園、實驗場、服裝店，顧客服務中心亦位於呢層。

至於4樓，就係「光．閱讀」主題，基本上主要嘅誠品書店就座落呢一層樓，想要睇書或搵書可以直接上行至4樓。而5樓、6樓、7樓主題就係「裕．美好」、「威秀商場」、「威秀影城」，前者都係生活消閒嘅地方，最高兩層就係電影院、遊樂場等。

現時座落新店區嘅「誠品生活」，於2023年底已經登陸商場「裕隆城」。該分店地方偌大，有超過67.6萬平方呎，而天井書店樓底就有30米高，一隅甚至有野花園露台，係亞洲最大嘅「誠品生活」。呢間分店設計係來自於「誠品生活」吉隆坡店建築師簫博文，入口有一個12米高巨型圓拱門，以橋樑連結各層，中間好似有十字軸設計嘅街道，亦有50米閱讀大道，據悉原意係打造一個立體城市、閱讀窗景模樣。

雖然「裕隆城」於夜晚9點半會閂門，但對面就有一間24小時營業嘅「家樂福」，建議逛完「裕隆城」同「誠品生活」，可以去對面好大間嘅「家樂福」逛一逛，然後先搭車返飯店。事實上，唔少在地人都喜歡24小時營業嘅「家樂福」，據悉通常半夜都依然有顧客行逛，皆因人流比較少。除咗西門町附近嘅桂林店，其他分店嘅「家樂福」都係比較少觀光客。