台北桃園機場第二航廈隱藏戶外觀景台！置物櫃近出境櫃檯、24小時營業、收費每3小時計算

台北桃園機場係來往香港至台灣最常用嘅機場，多數都係使用第一航廈，如果最後一日想要輕鬆啲，可以先將行李擺放機場置物櫃，每3小時計算。除咗置物櫃，原來重有一個方法可以暫存行李，同置物櫃收費無異，同樣適宜拍拖兩個人旅遊使用。而機場內左右兩端重有兩個戶外觀景台，可以觀看飛機升降，即睇觀景台位置！

從第一航廈到第二航廈，需要乘搭電車，而桃園機場捷運則有分第一航廈站同第二航廈站。平常好多機場都設有觀景台，而台北桃園機場第二航廈內原來有唔止一個觀景台。第二航廈分別有南側觀景台、北側觀景台，前後各一個，下面係出境大廳，上面就係觀景台。

機場觀景台位於5樓，盡頭上行扶手電梯就會直接抵達，比如北側觀景台，唔單止可俯瞰停機坪嘅飛機升降，亦可眺望台灣海峽，甚至望到竹圍漁港彩虹橋、風力發電機等。觀景台距離飛機非常接近，有理由懷疑不足50米，而且同其他觀景台唔一樣，唔需要隔住玻璃或鐵絲網觀看風景，跑道無遮擋，視野遼闊，只不過整個觀景台地方不大。

如果要將行李寄放，可以預先擺放於機場置物櫃內，到時到候直接前往機場check-in，唔使最後先拎行李去機場。機場通道旁有一排又一排置物櫃，有啲近捷運站，有啲就近機場出境大廳。不過，留意桃園機場捷運一出站就會見到旁邊有一排完全無人用嘅置物櫃，雖然價格上係最平，每3小時只係TWD50，但實際上投幣之後，又回退返出嚟，未能成功付款，難怪整排置物櫃都係無人使用。

一直向機場出境大廳走，會另外見到「宅配通」旗下嘅置物櫃，呢兩排自助置物櫃係比較穩陣，每一排都有21個置物櫃，上中下分3個size，數量平均，價格分別係TWD40、TWD60、TWD80，每3小時計算。置物櫃會先收費3小時，取行李嘅時候，到時需再補錢，同樣可以畀現金或悠遊卡。最緊要係留低收據，因為到時取行李係需要收據上嘅密碼，建議即時拍照作記錄。由於之前曾經講過自助置物櫃用法，今次就唔再重複內容啦。

要寄放行李，除咗可以擺放自助置物櫃，其實出境大廳角落有一個「宅配通」嘅櫃檯。該店可以將行李寄返香港，但同樣可以暫放行李，都係24小時營業，只係屬於非自助模式。該店寄放行李可以日子同size計算，有4個size可以選擇。第一日24小時寄放行李價格分別為TWD320、TWD480、TWD640、TWD720，大小就分133cm以下、134至150cm、151至186cm、187cm以上。

「宅配通」都可以斷鐘計，一望價錢表先知道，原來同自助置物櫃價格無異，大中小行李size同樣係分為TWD40、TWD60、TWD80，每3小時計算，大小size同寄放24小時一樣，不過同樣係限40kg以下行李，超重需另外加錢。另外，「宅配通」亦可以寄放高爾夫球套裝，以20kg、30kg計算，價格分TWD330、TWD385。