台北士林夜市豪大大雞排發跡逾30年成國際化名店！總店特大雞排水準依然、每日仍大排長龍？

豪大大雞排係台灣超人氣雞排店，由台灣開到世界各地，由90年代末起，7年間成為「士林夜市」標誌小吃之一。香港亦曾經喺鬧市有一間直營門市，其他都係特許經營模式，而唯一本土味十足嘅元朗店則於近年結業，想要拍拖兩個人食大雞排就要去台灣食啦！

位於「士林夜市」嘅「士林豪大大雞排HOT-STAR」係總店，該店開設前本身只係於台中一間7-Eleven臨樓售賣大雞排，歷史可追塑至1992年，原名叫「小王大雞排」，皆因創辦人叫王慶隆。而目前「士林市場」旁邊嘅總店，於1999年起營業，本身位於「陽明戲院」一帶，戲院一年後結業，先搬到「士林夜市」內。另外，該店7年時間就已經竄紅，成為知名小吃店。2000年代起，該店陸續擴展業務，唔單止開到亞洲地區，連外國都有代理經營分店。

而香港旺角門市於2010年起開業，係台灣直營門市，位置係旺角弼街，不過而家重係咪就要再查一查。本來「豪大大雞排」元朗店係罕見值得本地人支持嘅特許經營店，但現時已經結束營業。如果想要食大雞排，睇嚟要直接飛去台灣食啦！

雖然「士林夜市」總店嘅「豪大大雞排」已經有超過30年寒暑，成為國際化名店，但今時今日去總店，每日依然大排長龍。到底點解台灣嘅食店就算有光環，都唔會退步呢？大雞排咁多年可以維持水準，既吸引本地人，亦受到中西遊客歡迎呢？香港好多食店結束營業，當然有啲係同食物水準有關，但有大多數結業原因都係同食物水準無關。

言歸正傳，「士林夜市」嘅「豪大大雞排」雞肉處理技術獨特，雞排醃製入味，而且即叫即炸，每塊雞排都係即叫即炸，保留外脆內嫩質感，難怪逾30年都係超人氣夜市美食。炸雞排每塊TWD90，有XXL大，上手熱焫焫，尺寸上唔單止係手掌size，甚至有一塊臉咁大，原塊雞排一律唔切開，整塊長約30cm！

無論去幾多次總店，炸雞排都係即叫即炸，所以等候時間較長，雞排放入油鍋後，夾起一刻已色澤金黃，上手時更加香氣撲鼻。炸雞排係一大片雞胸肉，先經過醃製，再蘸上地瓜粉脆炸，入口酥脆可口，上面有胡椒鹽調味，鹹香十足。雞排厚度十足，肉同骨部份都係咁入味，雞肉就算經油炸，亦依然軟嫩，而且保留肉汁。而外皮同雞肉唔會好容易分離，呢一點其他特許經營店都未必長期保持水準。