台北內湖在地人數字夜市！美食街隱身737巷、間間平價小食避開遊客﹕無骨排骨酥／塩酥雞／豬血糕／排隊滷味

講到台北夜市，大多數人只會諗到「士林夜市」、「通化夜市」、「西門町夜市」、「寧夏夜市」等，今次E.A.Two走到一個鮮為旅客認知嘅「737夜市」，恍如一個「數字夜市」。單睇名稱相信好多人都未必知道確實位置，想要拍拖兩個人嘗鮮，即刻mark低地址同地道小吃攤檔！

「737夜市」座落內湖區商圈內，呢個區域係台北較少旅客會前往嘅地方，但其實只要乘搭捷運「動物園站」至往「南港展覽館站」方向嘅啡色線，於「港墘站」落車，徒步約5分鐘即達該夜市入口，交通便利。所謂嘅「737」，令名稱有如一個「數字夜市」﹐但其實「737」指嘅只係一條巷弄嘅號碼。從內湖街一段轉入737小巷，自然會見到街道上有一間又一間車仔攤檔平價小吃店，呢一帶就係內湖737商圈。

呢條「737」巷弄日夜有唔同用途，日光時份其實係在地居民嘅街市，叫做「麗山市場」，一到傍晚時份，就自然變成一個夜市美食商圈，吸引唔少在地上班族去買嘢食，連在地媒體《食尚玩家》都曾經推薦，令呢個地方似乎唔再係一個美食沙漠。

737夜市美食（1）﹕富士佳滷味

該「737夜市」巷弄之間有唔止一間滷味店，包括「狀元香滷味」，而最具人氣嘅莫過於「富士佳滷味」，該店位於「737炸烤之家」對面。「富士佳滷味」可以自選餸菜，逐樣計算，滷味類由最平TWD15起，最費都係TWD70，包括有鴨翅、雞腳、鴨舌、雞翅、甜不辣、大豆干、豬血糕、油豆腐、百頁豆腐、蘿蔔、豬耳朵、脆腸等。

737夜市美食（2）﹕轉角雞蛋糕

甫踏有「737美食街／737夜市」，會見到右邊有間頗大嘅「內湖春天藥局」，該巷弄同時係一道車路，而藥局對面就有一間轉角無名雞蛋糕店，車仔攤檔上並無名字，只寫有價錢。雞蛋仔檔外有好多架機車停低等雞蛋糕，每份雞蛋仔只分小份同大份，價格為TWD25至35，相當平民。

737夜市美食（3）﹕藥燉排骨

依循737巷弄直行，會見到一間又一間車仔攤檔，下一個巷弄小街口有間「737藥燉排骨」，對面係「萬華麻油雞」、「阿財蛋包飯」。該店主打嘅係藥燉排骨，亦有藥燉土虱魚頭，湯頭一直吸引在地人。不過，據知該店食唔食到係要睇緣份，皆因唔係成日開門。

737夜市美食（4）﹕台灣第一家鹽酥雞

繼續沿737巷弄前行，就會見到「台灣第一家鹽酥雞」，招牌上寫有沾醬雞排，車仔攤檔內有唔同炸物小吃，旁邊都有價格，每款由TWD15起，而鹽酥雞一份就賣TWD45。

737夜市美食（5）﹕豬大郎豬血糕

再向前走，於同一邊會見到一間「豬大郎豬血糕」，小攤內售賣古早味濃厚嘅純手工豬血糕，可以自選辣度，據知目前一支豬血糕已漲價至TWD45﹐當日見到唔少在地人一次過買3支豬血糕。

737夜市美食（6）﹕炸烤之家

而「豬大郎豬血糕」旁邊就有一間頗受歡迎嘅「炸烤之家」，全名為「737炸烤之家」，位於「富士佳滷味」對面。該店連唔少在地電視台、媒體都曾經推薦過，人氣十足！小攤內一份烤雞排賣TWD85，而炸雞排就賣TWD80﹐最特別嘅係雞排採青炭烤方式，味道更香口，加上據悉有肉骨茶味醬料可以選擇。

737夜市美食（7）﹕居和熹湯包

講到該夜市受在地人歡迎嘅小吃店，「居和熹湯包」就係其中之一，主打係鮮菜肉蒸餃、大鍋貼、水煎包，以及有柴魚底嘅酸辣湯，小籠包一份TWD125，較出面街道上嘅攤車貴少少，但就有得坐低堂食。

737夜市美食（8）﹕吳記現炸無骨排骨酥

於737巷弄近末端有一間「吳記現炸無骨排骨酥」，有4個size可以選擇，價格介乎TWD60至210，主打無骨排骨酥。小攤車內有2款可以選擇，一款係肉條狀，另一款就係排骨狀，入口都係啖啖肉，無骨落地。排骨酥入口外脆內嫩，炸得酥香，而肉質亦保持鮮美，啖啖有咬口。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 雖然「737夜市」呢道美食街位於內湖區，但就並非於捷運「內湖站」落車，反而落車點係前兩個站捷運「港墘站」，徒步約400米即達，大概只係5分鐘步程。

❷ 夜市同時係車路，所以要小心出入。

❸ 夜市位國就係內湖街一段737巷，全長都係大概700米。如果由「碧山巖」行山路線下行，係有權可以直達呢個夜市，但路段就可能較長。

❹ 夜市唔同車仔攤檔分佈於巷弄唔同位置，基本上只收現金。