【台南交通】98號台灣好行穿梭市區！一日票$20全日任搭、即睇上車位置！取票小心1個陷阱！

台南市區並無捷運站，基本上只能夠依賴公車、台鐵來往唔同景點，台南有一條特別適宜旅客乘搭嘅公車路線，唔單止可以穿梭市區，更可以前往多個超過16個台南景點，對拍拖兩個人遊覽台南嚟講係非常便利。該路線有一日票券可以選擇，只要HKD$20就可以全日任搭，到底實際上係咪值得購買呢？即睇該路線上車位置、取票方法！

台灣每個城市都有「台灣好行」公車路線，台南都唔例外，今年之前有兩條「台灣好行」路線，包括88號同99號，但2025年兩條路線都已經被取消，變成一條路線，即係98府城台江線。該98號「台灣好行」公車路線基本上同之前嘅99號路線嘅車站差唔多。

98府城台江線係「台灣好行」台南路線，頭站為「臺南轉運站」，甫踏出台鐵就可以徒步至該公車路線車站。該路線既可以穿梭市區一帶，亦可以前往安平區，經過多個知名景點，比如係台南市區嘅「林百貨」、「鄭成功祖廟」、「赤崁樓」、「中正商圈」，亦包括安平區內嘅「億載金城」、「原住民文化會館」、「安平老街」週邊、「安平蚵灰窯文化館」、「安平古堡」、「德記洋行」、「安平樹屋」。呢條路線最遠更可以去到「觀夕平臺」、「台江國家公園」、「四草生態文化園區」、「四草野生動物保護園區」、「鹿耳門天后宮」，甚至係「臺灣鹽博物館」、「七股鹽山」。

要乘搭台南市「台灣好行」98號公車，可以預先到KKDAY或KLOOK購買車票，網上預訂每張票人均約HKD$20，車票係「台灣好行」一日票，可以全日任搭！抵達「臺南火車站」之後，只要前往火車站旁邊嘅「全家便利店」，近門口位置為「台南松興租車站前店」，角落位置有一部隱蔽自助換票機，呢個位置原來就係取票處！只要依指示，提供網上預訂記錄同QR Code，系統確認後，就會列印出紙本票，可以拎車票去對面車站搭車。不過，上車前記得同站頭服務處或司機確認。

▲ 唔係kkday買完可以取票嘅機。

到底唔買一日票係咪一定蝕底呢？事實上，E.A.Two實測之後發現，就算預訂車票都無咩損失，而且網上預訂再取票重有一個大陷阱！離開「臺南火車站」後，原先打算先取票，翌日再經該路線前往安平區。取票地點得一個地方，取票之後方才發現車票上有一個日子，只限當天使用！而呢一點，兩個網上平台都無提過，都算係一個昆人陷阱。換言之，如果唔係當日多次乘搭該路線，一定唔可以提早取票。

▲ 呢部先係kkday買完可以取票嘅機。

「台灣好行」官網有清楚列明88號公車路線所到達嘅車站，以及時間表，一定要睇咗時間表先搭車，基本上「臺南火車站」發車時間都尚算準確。由台鐵「臺南火南站」落車，取票後經隧道到馬路另一端，自然會見到車站位置，而呢條路線其他站點其實都可以於Google Map睇得到確實位置。不過，需要留意台南公車每一個站未必一定跟官網嘅時間表，有機會係會延遲，比如E.A.Two打算於「安平古堡」上車，再前往「七股鹽山」，但班次遲遲未抵達，最終只能更改行程，徒步走完安平區其他景點及美食。

如果想要更準確地得知個別公車抵達時間，甚至係當刻位置，強烈建議下載「大台南公車」App！可以即時睇到公車動態同路線規劃，比如輸入「88」，揀去程路線，然後會睇到每一個站尚餘幾多分鐘到達。App內有部份站點如果有咩事會寫明「交管不停靠」，若然架公車嚟緊，會寫住「即將進站」，到達時會有個小站牌logo，表示架車目前喺邊個站。Download定呢個公車App，旅遊就更加方便啦！

於網上平台預訂一日券車票，人均為HKD$20，台幣就大概係TWD77，可以同一日無限次怎乘搭該88號公車路線。不過，其實「台灣好行」公車路線係可以直接使用悠遊卡，以98號公車計算，每程人均價格為TWD18，折合港幣約為HKD4.6。如果想要計算抵唔抵，有無需要買車票，就要睇自己當日行程會唔會多次搭呢條路線，若然係4程以上，第一程乘車前又可以隨時去到「臺南火車站」旁邊取票處，咁咪買囉。否則，其實係未必需要購買一日票，因為市區有好多地方可以徒步前往，而安平區主要景點亦可以徒步抵達，唔需要隔硬等下一班車，再去下一個站點，最長路線其實只係台南市區至安平區嘅一段路。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 「98府城台江線」於kkday或klook都可以預先購買「台灣好行」一日票。kkday預訂網址﹕https://www.kkday.com/zh-hk/product/30619；klook預訂網址﹕https://www.klook.com/zh-HK/activity/37288-tainan-tourist-bus-number-98-day-pass/。人均車票為HKD20，換言之台幣係約TWD77。

❷ 留意該一日票只限當日使用，所以唔可以今日攞定聽日用。E.A.Two實試張一日券前一晚取票，翌日係已經過期。除非即日去安平區一帶，或者住台南車站附近，否則其實唔值得買呢張一日券，因為取票地點只係得一個地方。

❸ 所謂「台灣好行」公車，其實就咁上車都得，唔一定要買一日票，每程為TWD18，折合港幣約為HKD4.6。詳細時間表﹕https://www.taiwantrip.com.tw/Frontend/Route/Select_p?RouteID=R0117 。

❹ 除非肯定自己一定搭好多程車，例如4程以上，又可以隨時行到去「台南車站」旁邊「全家便利店」，否則未必需要買一日券。遊覽安平區嘅話，實際上好多景點都係徒步可以抵達，E.A.Two到最後只係搭到2程「台灣好行」公車，最多只係畀多咗TWD18，即HKD4.6。