灣仔天橋旁、喜居生活樓上咖啡店！The Corner Coffee堅持採用越光米！椰香咖喱豬扒／紅酒燴牛肋肉／炸雞芝士漢堡

「喜居生活」係本地一個網購平台，實體店位於灣仔，旁邊原來有一間休閒咖啡店，處於灣仔角落，有午餐、下午茶可以選擇。雖然座位唔算太多，只屬正常咖啡店size，但環境頗清靜舒服，可以拍拖兩個人前往。

香港網購平台有好多，「喜居生活」係其中之一，唔單止有網購平台，灣仔亦有實體店。該店既支持有機、本土產品，亦特別支持公平貿易、永續生產，提供社區經濟互助平台，同「細味公平」屬姊妹店。店內唔少產品都係生活必需品，而非無乜用處嘅消費品。

毗鄰「喜居生活」雜貨店嘅「The Corner Coffee」，又叫「H….Coffee」或「H Corner」，顧名思議就係一個角落咖啡店，於2023年先開設。店內以木質為主調，主打風格都係偏向休閒，甚至滲出少少露營風，因為有露營檯櫈。咖啡店本身都有售賣產品，例如精品咖啡同啤酒。

該店Lunch Set只限星期一至五12:00-14:59，晚餐就係18:00後，換言之週末假期係無套餐提供。另外，有款英式下午茶可擇，包括4款鹹點、4款甜點，以及飲品。難得係該店特別標明使用富山縣產越光米，而非其他產地嘅稻米，起碼睇到有誠意。套餐飲品只有普通熱飲，每日有唔同款式，當日為接骨木花茶，客人都可以正價減$10，轉其他咖啡或特飲。

午市定食套餐基本上就只有8款菜式提供，比如係法式紅酒燴牛肋肉定食$118、卡邦尼蘑菇芝士煙肉意粉$108、酸辣蘆筍雞髀菇乾炒意粉$108、澳洲和牛蜜糖芥末醬芝士漢堡配黑松露醬薯條或沙律$142。價格上有少少偏高，套餐最平嘅都要$98，分別有經典雜錦pizza、無花果青提雜菜沙律配意大利黑醋醬。可以選擇加小食，每款由$10至$32不等，包括日式吉列蝦$30、日式吉列蠔$30等，有6款可擇。

今次選擇兩款套餐，一款係厚切香茅豬扒配秘製椰香咖喱定食$108，標明含花生碎，套餐有麵豉湯、越光米。定食重有兩件精緻嘅玉子卷，造型似足港式餅店嘅卷蛋。咖喱飯擺盤精美，味道上帶有微辛感，唔係純粹日式咖喱嘅甜味，入口都係惹味。厚切香茅豬扒份量亦合理，質感亦夠軟腍。而白飯軟硬適中，咖喱汁適宜撈飯食，醬汁量唔會太少。

其實和牛漢堡係比較多人選擇嘅菜式，不過今次選擇咗另一款漢堡，就係秘製辣醬炸雞芝士漢堡配黑松露醬薯條或沙律$108。漢堡包造型巨大霸氣，麵包唔會乾身，表面令身有牛油香﹐入面就夠鬆軟。內餡雖然係炸雞，但質感都係軟嫩，唔會太油膩，炸雞都唔係炸到乾爭爭，加上芝士、生菜、蕃茄，令burger層次更豐富。薯條就係伴菜，都炸得香脆，加上黑松露醬香令薯條升級，邪惡又滋味，好快已經蘸晒啲醬。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受現金、八達通、PayMe。店內無加一服務費。

❷ 位置係近灣仔天橋，到祥友大廈之後，於對講機撳右邊「往1樓請按」鍵，等人開門就得。

❸ 座位大概只係得十零廿個，係寵物友善cafe。該店採自助形成，所以記得食完收好餐盤到指定地方。

❹ 咖啡店隔離就係喜居生活現成雜貨店，有網購選擇。