唔好拜錯！台南9間必拜廟宇一覽！邊間保祐財運亭通？4大月老廟求姻緣牽紅線？

台南嘅廟宇多如恆何沙數，想要拍拖兩個人去拜一拜台南嘅廟宇，首先要了解自己想求咩，因為每一間廟宇所保祐嘅嘢都唔一樣。今次E.A.Two就歸納返台南其中10間廟宇，到底邊間係求財，邊間係月老廟求姻緣呢？

台南5大求財廟宇（1）﹕佛頭港景福祠

靠近「永樂市場」嘅「佛頭港景福祠」，係一間土地公廟，早於80年代已經被列為三級古蹟建築物，後來就被列為市定古蹟，更加係台南市唯一獲評為古蹟嘅土地公廟。該廟宇係一座閩式平房，屋頂係硬山單簷燕尾式設計，歷史經歷過清朝及日治時期。「佛頭港景福祠」主要係用作求財，想要祈求財運亨通可以試一試。

台南5大求財廟宇（2）﹕台南關帝港開基武廟小關帝廟

位置喺「赤崁樓」、「永樂市場」之間嘅「台南關帝港開基武廟」，又叫「小關帝廟」，亦係一座台南市區嘅廟宇。顧名思議，該廟係供奉住關羽，即文衡聖帝。廟宇有超過300年歷史，據悉該廟前殿部份一早已被列為市定古蹟之一。「台南關帝港開基武廟」係台南一間比較鮮為人知嘅財神廟，比較多於當地做生意嘅人前往參拜。

台南5大求財廟宇（3）﹕蕃薯崎小南天福德祠

而「蕃薯崎小南天福德祠」就係比較近「台南車站」嘅財神廟，位置鄰近「台南大遠百威秀影城」。該廟係一間土地公廟，歷史可追塑至1666年，係一間歷史悠久嘅土地公廟。而「蕃薯崎小南天福德祠」主要係祈求正財運，除咗做生意嘅人，亦有唔少做保險嘅人前往參拜。參拜該廟宇要求取籤詩，但就唔係抽完先擲筊，而係需要先擲後抽，擲筊杯三次。如果擲到一正一反，就係代表「信」；擲到兩正，就係代表「笑」；而擲到兩反，則象徵「陰」，要跟結果嚟抽籤。

台南5大求財廟宇（4）﹕鎮轅境頂土地公廟

至於「鎮轅境頂土地公廟」，位置毗鄰「臺南公園」，亦都係一間好接近「台南車站」嘅廟宇。呢間廟主要供奉福德正神，重有齊天大聖、臨水夫人，兩邊係文武判官，可以祈求功名利祿。前往參拜呢間廟宇，可以祈求招財進寶，保祐求取功名利祿。

台南5大求財廟宇（5）﹕台南下土地總祿境廟

而「台南下土地總祿境廟」同樣係供奉福德正神，入面兩側同樣有文武判官，同樣係保祐求取功名利祿嘅信眾，都係可以祈求招財進寶﹐以及功名利祿。事實上，「台南下土地總祿境廟」同「鎮轅境頂土地公廟」好相似，其實兩者都係相對，位置都好接近，同樣係保祐住祟安街。

台南4大月老廟（1）﹕八吉境寧南坊重慶寺

距離「林百貨」不遠嘅「八吉境寧南坊重慶寺」，同樣係一座歷史建築。呢間寺廟係一座月老廟，亦係四大月老之一，同「大天后宮」、「祀典武廟」、「大觀音亭」並列。不過，要留意四大月老所保祐嘅嘢唔一樣，比如「大天后宮」係保祐相戀男女，可以為感情增溫；「祀典武廟」係保祐單戀人士，可以同心儀對象順理墮入愛河；「大觀音亭」就係保祐即將結婚嘅情侶，堅固兩人之間嘅承諾；至於呢座「八吉境寧南坊重慶寺」，就係保祐變咗嘅感情，只要攪動入面嘅醋矸，就可以挽回感情。

台南4大月老廟（2）﹕臺灣祀典武廟

而「臺灣祀典武廟」，就如剛才所言，呢間廟宇係四大月老廟之一，都係可以保祐姻緣，分別在於該廟係保祐單戀者，能夠盡快同心儀對象相戀。「臺灣祀典武廟」正對知名地標「赤崁樓」，本身係一座台南嘅「大關帝廟」，供奉住祀關聖帝君。呢座廟宇歷史悠久，於1997年被列為國定古蹟之一。

台南4大月老廟（3）﹕臺南祀典大天后宮

繼續「月老」話題，四大月老廟之中，「臺南祀典大天后宮」就係為相戀男女保祐嘅廟宇，如果拍拖兩個人去台南，一定要去呢間月老廟拜一拜，據稱可以為二人感情增溫，保持熱度！而「臺南祀典大天后宮」其實只係毗鄰「臺灣祀典武廟」，同樣距離「赤崁樓」不遠。「臺南祀典大天后宮」入面供奉住「媽祖」，而「媽祖」就係民間信仰當中被稱為「女神」嘅靈魂人物。

台南4大月老廟（4）﹕臺疆祖廟大觀音亭

至於「臺疆祖廟大觀音亭」，就係台南四大月老廟中，最接近「台南車站」嘅一間。呢間廟宇同樣係一座由80年代起被列為三級古蹟嘅建築物，後來更被評為市定古蹟之一。該廟前臨「觀音亭街」，如同一條參拜道。如果拍拖兩個人準備結婚，真係不得不去「臺疆祖廟大觀音亭」，因為呢間廟宇正正係保祐要結婚嘅情侶，可以堅固承諾，月下老人為未婚男女牽紅線，據說相當靈驗。該廟宇主要供奉觀音佛祖，但其實係同「祀典興濟宮」聯合組成，兩間廟係相連。傳聞「祀典興濟宮」其中嘅下壇將軍好鍾意食炸雞，所以係以炸雞供奉，最常見就係KFC炸雞，真係信不信由你。