【台南美食】永樂市場3大隱藏美食！極臭臭豆腐／甜蜜紅磚布丁／古早鍋燒意麵！逾60年老店豬飼料柑仔店玩味爆谷！

「永樂市場」係台南知名地標之一，好多人去台南都會拍拖兩個人去逛一逛。E.A.Two走過台南唔同景點，大多數地方都見唔到香港人，但「永樂市場」就係少有會見到香港人嘅地方。今次行過美食同商店眾多嘅「永樂市場」，好多都受到在地人同旅客歡迎，找尋3間隱藏美食，另外重有2間頗有趣嘅商店，不妨去試吓啦！

永樂市場

「永樂市場」距離另一個知名地標「赤崁樓」僅有約500米；而從「台南車站」出發，乘搭公車77號，8分鐘車程即達，交通便利。事實上，該市場係台南一個傳統零售市場，毗連「水仙宮市場」，都係樓高2層嘅磚造建築物。該市場一直係台南地標之一，有大量美食攤檔，連日本雜誌《BRUTUS》都曾以「永樂市場」為封面。

基本上，「永樂市場」就係介乎於國華街、民族路，主要大樓分為南北兩幢建築物，兩端以天橋連接，而國華街三段更加有大量美食攤檔可以選擇，好多都位於騎樓之下。

永樂市場隱藏美食（1）﹕臭豆腐

台北「永樂市場」有「永樂臭豆腐」，而台南「永樂市場」內亦有一間隱藏版「臭豆腐」。國華街內嘅「臭豆腐」令E.A.Two非常意外，食店門面只係寫住「脆皮臭豆腐」，大概就可以叫做「台南永樂脆皮臭豆腐」。

臭豆腐一份賣TWD70，寫明素食者都可以食用，店內只係得一個份量可以選擇。臭豆腐即叫即炸，所以需要幾分鐘等候時間。一碟臭豆腐份量適宜兩個人一齊食用，臭豆腐旁邊有泡菜。另外，重有一碟醬汁，呢碟醬汁真係臭豆腐靈魂，入面同時有蒜蓉、微辣醬，非常配合臭豆腐。

該店嘅臭豆腐聞落好夠臭味，臭豆腐於油鍋內翻滾，即刻炸起嚿嚿都係熱焫焫，每嚿都好似骰子狀，色澤金黃，就似一口臭豆腐。臭豆腐雖然外面係炸得香口酥脆，但入面唔會太乾，依然帶有少少水份，每粒臭豆腐外酥內軟。而伴碟泡菜實感爽脆，入口則酸酸甜甜，有少少果香，幾開胃，都可以解膩。泡菜適合配搭臭豆腐，亦適宜夏天食用。

永樂市場隱藏美食（2）﹕紅磚布丁

另一間「永樂市場」嘅小吃店係「紅磚布丁」，店舖位於十字路口，非常顯而易見。該店嘅布丁並非即叫即整，反而似係手信一樣，係一嚿嚿直接買，一買就可以即刻食，亦可以返飯店或旅館先食。

「紅磚布丁」有6款口味，包括有傳統焦糖、蜂蜜黑糖、香蕉牛奶、觀音拿鐵、芝麻、抺茶，可以選擇袋裝或盒裝，前者僅可以保冷1至3小時，而後者則可以保冷4至6小時，如果返高雄機場搭飛機返香港做手信，都勉強係可以保冷。每份分4件、6件、10件、12件，價格由TWD180起，最貴都係TWD540。不過，唔記得單買一件幾錢，總之一定唔使TWD100。

焦糖布丁入口香甜，有焦糖味，布丁質感綿密，同平常嘅好滑溜布丁有少少分別。每件布刊都係長方形設計，就似紅磚模樣，難怪叫做紅磚布丁。

永樂市場隱藏美食（3）﹕古早味鍋燒意麵

而「古早味鍋燒意麵」則為另一間令E.A.Two覺得好有驚喜嘅食店，鍋燒意麵睇落好似普通麵，但就係台南特色小吃之一。該店選擇唔多，只係得鍋燒意麵、鍋燒大麵、鍋燒米粉，價格介乎於TWD75至80，折合港幣都係HKD20有找！如果唔清楚意麵、大麵同米粉嘅分別就要留意啦！事實上，意麵指嘅係一種彎彎曲曲嘅黃澄澄麵條，米粉就同一般嘅米粉無異，而大麵就唔係意麵嘅粗麵版，反而係好似平常大家食日式烏冬。大麵質感係比較滑順，而意麵質感就比較爽彈。

所謂鍋燒意麵，就係鍋燒嘅麵條，係台南人古早味嘅麵條。該店嘅鍋燒意麵真係有濃濃燒香過嘅味道，連湯汁都係別具風味，入面係柴魚高湯，有微微柴魚香，入口鮮甜清爽，真係可以食完麵之後再飲埋碗湯！而每一份鍋燒麵都會配上一小碟嘅醬料，麵條可以沾醬食，味道唔算突出，似普通比較淡身嘅醬油溝咗某啲嘢。

強烈推介選擇意麵，因為單單聞一聞就感覺到意麵同大麵嘅分別，大麵味道係比較淡身，但意麵真係好濃郁，麵條入口更加香濃，真係馬上鍋燒嘅香味。每碗麵條入面都有唔少配料，例如係中間隻半熟蛋，另有2隻炸蝦、1塊好似旗魚嘅炸魚，其他配料就有魚板、竹輪等，有啲都唔知佢咩嚟，有嚿好似浸淋咗嘅麵包質感。炸物一定要盡快食用，因為擺喺湯汁太耐嘅話，表皮會浸軟，失去脆口質感。

永樂市場隱藏商店（1）﹕窄房子

「永樂市場」一隅有一間隱藏版Sanrio店，該店入面有好多日本直送Sanrio商品公仔。雖然地方不大，但玻璃牆身就擺滿公仔，入面亦有唔少Sanrio商品可以選擇。而價錢都係適中，以一隻小型Hello Kitty公仔計，大概就係TWD600至700，換言之係HKD160至180，就嚟收檔，所以老闆娘平咗TWD50。不過，該店表面唔可以隨便觸碰商品，當編輯想拿下心頭好時，老闆娘一而再而三指唔可以掂，但當編輯表明想購買時，老闆娘就笑笑口，並繼續推介其他Sanrio商品，認真現實。

永樂市場隱藏商店（2）﹕豬飼料柑仔店

而「永樂市場」同一條街道上，有一間叫「豬飼料柑仔店」嘅商品店，以售賣爆谷為主，該店於台南有2間分店，分別位於友愛街同國華街。該店係一間有超過60年歷史嘅老字號商店，最特別之處係其爆谷既有唔同獨特口味，亦有唔同嘅宣傳包裝，罐罐創意十足，非常有趣！所謂台南伴手禮，唔一定要購買好出名嘅名產，呢款爆谷買返香港做手信嘅話，絕對唔失禮。

當中，有一款爆谷叫做「告白爆米花」，包含有焦糖味、朱古力味可以選擇，每一罐賣TWD170。而其他爆米花口味亦令人驚奇，除咗有焦糖味、朱古力味，更有珍珠奶茶味、鹹酥雞味、玉米濃湯味、彩虹味等，包裝精美，部份罐裝上面有一隻可愛貓咪，萌爆！每一罐爆米花就大概係TWD130，買多幾罐平均就會平啲。今次只係選擇咗鹹酥雞爆米花，外觀其實同一般爆谷無太大分別，但上面就有少少調味料，入口又的確有鹹酥雞嘅味道，大概就係調味料作怪，爆谷味道同鹹酥雞嘅調味料極相近。