台南神農街、海安路藝術街愈夜愈靚？鄰近河樂廣場、燈會有花燈隧道

台南市區有唔少值得去嘅景點，好多景點都係日光時間最靚，但有部份景點係夜晚反而愈夜愈靚，比如係鄰近「新光三越」嘅「藍晒圖文創園區」。另外，重有以下呢幾個市區景點，夜晚比日頭更靚，當中有燈會嘅時候，路上掛滿花燈，搖身變成一道花燈隧道，拍拖兩個人可以夜晚去打卡！

神農街

台南「神農街」距離「永樂市場」僅有約400米，位置其實係舊時五條港中央，即係南勢港以北，所以以前又叫北勢街。「神農街」內有各式古蹟建築物、廟宇，入面有好多老行業，穿梭其中，會感受到一片古色古香。最特別嘅地方，係呢條街將舊時原味完整保留，就算經歷咗超過200年，依然轉變不大，「神農街」更加係全台最完整保留嘅清朝街道。

走過由海安路到康樂街一段嘅「神農街」，會見到週邊樓宇質樸味濃厚，多數樓高2層，係鋪瓦街屋風格，唔單止係清朝風格，更夾雜少少日治時代建築風格。而整道「神農街」其實全長都只係得100零米，闊約4米，轉瞬間已經走完。街道上有市定古蹟「金華府」，亦有「台南藥王廟」，歷史悠久「永川大轎」，係一道充滿復古風嘅老街。

海安路藝術街

同「神農街」僅有約500米距離嘅「海安路藝術街」，都係市區另一個夜晚景點。如果剛巧有燈會舉行，週邊會懸掛好多花燈，街道上閃爍璀燦。比如同「海安宮」聯乘嘅「海安燈會」，就有花燈、猜燈謎等活動。

平常嘅「海安路藝術街」，其實就等同一條廢棄街道，只不過牆壁由各藝術家繪畫過，打造成一種街頭藝術風，就似一個微型街區。

河樂廣場

至於「河樂廣場」，距離「海安路藝術街」僅有280米，徒步可以輕鬆走完3個地方。「河樂廣場」其實白天只係一個小公園，有露天淺水池，週邊都係造景綠草，簡單嚟講就只係林蔭步道，或者台灣人所講嘅親水公園。

公園於2020年先開幕，英文叫「The Spring」，將湧泉與春天融合，同時注入生命力，概念來自於荷蘭設計師，曾經獲得《富比世雜認》捧為「世界七大付人期待公園」。不過，現場望落其實無乜特別，只係可以3個地方順序走過，唔需要刻意去搵呢個地方。而夜晚會有燈光，水中可以見到燈光倒影，配合週邊風景，其實都有啲復古感嘅。