【台南住宿】浸浴賞漁光島絕美黃昏日落！安平民宿有點 . 宅全自助入住真實體驗！小訣竅揀四人房定雙人房？

好多人拍拖兩個人去台灣旅行，都會選擇飯店或旅館，比較熟悉台灣嘅人會揀民宿。今次E.A.Two於台南選擇咗一間房間景觀絕美嘅住宿，可以浸浴睇黃昏日落靚景，民宿為全自助方式，入住小訣竅係四人房係完勝雙人房！

今次入住嘅民宿係「有點．宅（U House）」，位於台南安平區，若由臺鐵「台南車站」出發，call車、搭的士或自駕嘅話，大概15至20分鐘就可以抵達，而公車77號都可以去到附近「南台別院」，車程約為25分鐘。而民宿距離台南「家樂福安平店」超市不遠，只有約12分鐘步程，徒步可達，掃貨之後折返民宿都好方便。

最初以為「有點．宅」只係一間台南普通民宿，後來發現呢間於台南係一間非常搶手嘅民宿，好難先可以預訂到一晚！每晚入住限定下晝3點先可以check in，而翌日11點前就要check out，整個過重都係以自助方式辦理。故此，入住之前必須以Line同民宿方面聯絡，唔好到時去到門口先聯絡，皆因民宿內無職員，只有閉路電視，全程乜事都需要用Line聯絡。因為民宿會以個人電話號碼嚟做密碼，入住當日會即時set密碼，僅有其中4個數字，而且限當日使用，保障安全。

大門口採用電子鎖，於大門口輸入個人密碼之後，就可以進入室內，而踏入室內係必須換上民宿內嘅拖鞋。而外出嘅鞋唔可以踩入去，可以選擇就咁擺門口鞋櫃入面，或者自行拎住上樓，但就唔好掂到地面。整座民宿設有電梯，一隅亦有樓梯，全幢無4字樓，樓高6層，每層有兩間房，除咗頂樓。

7樓最高一層一端為天台，另一端就係一間雙人房，同其他層數比係少咗間四人房。出去天台需要換拖鞋，感覺似普通民居天台。平台有得洗衫，亦可外望安平區風景，遠眺漁光島。不過，最大感覺係天台似足吸煙人士最愛嘅食煙位。

今次E.A.TWO入住嘅係3樓，呢間係四人房，地方偌大，有兩張大床，一端有大窗戶，窗外有一個小平台，但就唔可以走出去。房同廁所中間有一級，要小心唔好kick親。房間有提供基本盥洗用品，例如毛巾、沐浴露、洗頭水、牙刷、牙膏、風筒，亦有後備廁紙、兩把座地風扇、衣架、雪櫃、電視等。由於係四人房，所以房內都有4支免費樽裝水。房內插頭都算充足，大床左右都有，檯面亦有，都夠叉電用。

該民宿有雙人房、四人房可以選擇，前者的確係平少少，但其實後者都唔係貴好多。不過，四人房絕對比雙人房有更高CP值。雙人房基本上無乜特別，浴室窗戶比較小，只係似座向東，可以睇日出；四人房空間較多，而且座向西，浴室廁所亦有超大窗戶，浴缸後正對黃昏日落靚景，可遠眺漁光島！

留意民宿規矩，夜晚10點後要保持清靜，而朝早8點前亦要保持清靜，以免影響其他住客。而房間隔音措施亦算適中，聽唔到外面嘅聲音。退房時，必須要關閉房間內嘅電源，除咗雪櫃。民宿地下有一個小型廚房，擺放有微波爐、咖啡機等，亦有餐具、少量零食糖果，可以任食。地下一隅亦有備品可以自取，如果房間唔夠，可以去地下稍作補給。

自駕到安平區呢間民宿的話，可以將車輛停泊於門口停車格，由朝早8至夜晚8點計算，每小時TWD20，其餘時間均免費停車。而call車來往「台南車站」嘅話，車程都只係大概15至20分鐘，徒步一小段路亦有公車可以直達﹐交通都算方便。

「有點．宅」基本上只係設有雙人房、四人房，前者每晚約為HKD377，後者則約為HKD577。雖然價格上係相差約HKD200，但景觀同CP值就差得遠，四人房先有大浴室，而且該房型嘅大窗戶先可以外望西方漁光島日落。

即睇【有點．宅】住宿價錢及限時優惠﹕Agoda｜ Trip.com｜airbnb｜ Line 預訂

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 由民宿行去永華路二段，就有公車可以折返台南車站。由民宿直接call車返去台南車站，車費其實都係TWD200左右。

❷ 留意入住同退房時間，下晝3點後check in，朝早11點前check out。

❸ 呢間民宿係全自助設計，所以必須去之前就要用line用民宿主人聯絡，對方會比一個密碼入住客人，個密碼係每日會set，基本上係用電話號碼嚟set，香港電話都得。

❹ 民宿有電梯，唔需要行樓梯。