台南自由行必備7大重要App！公車輕鬆穿梭景點、交通／美食／天氣／導覽不求人！

台南係一個台灣古都，擁有豐富歷史文化特色，美食小吃、古蹟眾多，係一個值得拍拖兩個人深入探索嘅城市。不過，台南係並無捷運穿梭市區，想要於台南自由行，記得要準備定各台南交通App。當然唔少得在地人美食推薦App，以及當地即時天氣預報啦！不過，到底可唔可以於台南直接Call Uber呢？即刻睇E.A.Two台南旅遊實試經驗！

台南必備App（1）﹕雙鐵時刻表

有留意E.A.Two都會知道，「雙鐵時刻表」係經常於台灣使用嘅交通App，「雙鐵」指嘅台鐵同高鐵。不過，去台南基本上比較少需要使用高鐵，多數都只係乘搭台鐵，皆因台鐵就係直達市區嘅交通方法。App內操作簡單，只有選擇乘搭公車嘅日子、時間，再選擇起點同終點，系統就會顯示當時最近嘅列車。若要乘搭台鐵﹐只需要於指定時間之前抵達月台等車就得。不過，要留意無買指定席車票嘅話，即係使用悠遊於入閘，望到「區間車」先好上車。皆因有部份列車係指定席或快車，但多數列車都係「區間車」。

台南必備App（2）﹕大台南公車

台南公車係市內一種重要交通工具，基本上大部份地方都可以直達。公車路線看似複雜，其實好簡單。初到台南建議結合「Google Map」一併使用，望吓目的地有咩公車抵達，然後打開「大台南公車」或「公車時刻表」，輸入返該公車號碼，自然會睇到該條公車路線動態資訊。實試過後，E.A.Two覺得「公車時刻表」於台南唔算太方便，反而「大台南公車」係最實用嘅公車App！

「大台南公車」App內既有路線資料，亦有時刻表等資訊，更有公車即時動態，打開App就會見到想要乘搭嘅公車目前到達邊個站點，重有幾耐進站。要留意有部份公車雖然有時刻表，實際上到達時間可能有唔同，因為要視乎當時交通情況。比如「台灣好行」98號公車，時刻表上寫嘅到達時間同現場架車到達時間隨時相差超過半小時！不過，只要睇實「大台南公車」App，就會知道架車即時位置，起碼有所預算，公車唔對路都可以轉陣去其他景點。

台南必備App（3）﹕中央氣象署W

去旅行絕對要留意住當地嘅交通狀況，台灣嘅「中央氣象署W」App就係當地嘅天文台，W代表Weather，可以睇到即時情況，以及72小時至一星期嘅天氣預報，方便schedule即時旅遊行程。

台南必備App（4）﹕中央氣象署E

台灣一直位於地震帶，除咗天氣報告，「中央氣象署E」都係有需要下載嘅App，E代表Earthquake。呢個地震App同「中央氣象署W」嘅天氣App皆為台灣當地官方嘅App，提供即時資訊。打開App後，可以查看所在位置嘅情況，亦要知道一旦發生地震應該點做。App內會見到即時震央位置，台灣嘅地震分為1級至7級，大多數地方其實都係1級，基本上1至2級都係無咩影響。如果見到數字去到4級或以上就要注意，唔好逗留喺海邊或山區，要盡快離開轉移到開揚嘅地方，旅程最緊要安全。

台南必備App（5）﹕愛食記ifoodie／食在方便

而在地人對於選擇餐廳上，都有自己嘅台灣版Openrice，其中有兩個常用嘅餐廳推薦App，包括「愛食記ifoodie」、「食在方便」，兩個都可以用嚟搜羅台南地道餐廳。由於呢兩個App比較相近，所以一次過講啦！基本上，兩個App都係類似一個餐廳位置同食評平台，既可以睇到每一間餐廳嘅位國，即時篩選自己想食嘅類別，亦可以睇到在地人對每間餐廳嘅評價，甚至評分。台灣人寫食評好多好似E.A.Two咁寫成Blog一樣，內容詳盡，而非香港Foodie嘅簡潔同過於重視相片同影片。如果要兩個App去選擇，E.A.Two比較鍾意睇「愛食記」。

台南必備App（6）﹕呼叫小黃／55688

除咗公車之外，台南最常見嘅就係Call車，而當地就有專用嘅Call車App，包括「呼叫小黃」、「55688」。不過，E.A.Two實試登記，發現「55688」未能以香港電話「+852」嚟登記，所以如果有在地台灣電話嘅話，可以試吓用呢個Call車App。而「呼叫小黃」就係一個在地好常見嘅Call車App，呢個係民宿主人都推薦使用。「呼叫小黃」反而可以自行登記，不過登記前係需要先付TWD1！

打開「呼叫小黃」App，會有地圖睇到所在地點附近有無司機接單。只需要於App內輸入上落車地點，選擇叫車服務，以及付款方式等。另外，更有接機或送機服務，可以自行輸入提示，令司機可以容易搵到你，其實就好似Call的士一樣。

台南必備App（7）﹕Uber

另一個E.A.Two覺得更方便嘅方法係Call「Uber」，因為只需要直接使用平時用開嘅國際版「Uber」App就得！使用方法與平常無異，於所在地點Call車，然後輸入想要前往嘅目的地，自然會見到所需車費預算，亦可以見到附近有無司機接單。當有司機接單，只需要留喺原地等待上車就得。市區等待時間會較短，而且比較多車。