西環觀龍樓上行3分鐘！高水準港式炸雞髀卿記工房焦糖色脆皮＋入味嫩滑雞肉隱身長命斜馬路邊！

要於今時今日嘅香港找尋逐漸消失嘅港式炸雞髀並唔容易，今次E.A.Two帶大家到西環去食一間隱身於西環馬路邊嘅炸雞髀小店。小店表面好似唔近中心點，實際上距離堅尼地城地標觀龍樓只有3分鐘步程。而呢間係E.A.Two私心評分好高嘅香港炸雞髀小店，因為真係我哋想食嘅港式炸髀，值得推畀大家拍拖兩個人前往，到底炸雞髀有咩特別呢？

由西環堅尼地城體育館徒步至觀龍樓，轉左上行士美菲路一條好似長命斜嘅斜路，大概3分鐘就可以抵達呢間馬路邊嘅炸雞髀小店！雖然表面好似同該區中心位置有一段距離，實際上只係咫尺之間。該店招牌寫有「卿記工房」，其實係來自於樓下堅尼地城士美菲路街市內嘅「卿記豆腐」，所以有唔少食材都係佢自己嘅。

「卿記工房」嘅炸雞髀係E.A.Two近年食過嘅炸雞髀店中水準數一數二最高嘅一間，真係一山還有一山高！唔好成日批評香港小店，其實依然有好多用心同有誠意嘅小店繼續努力當中。據悉，呢間小店係來自於90後年輕人經營，以香港街頭小食為主，其中最多街坊大讚嘅就係其生炸雞髀，由2023年開業至今，甚至被稱為港島東區最強炸髀！

要食好嘢就一定要畀啲時間等候，如果唔使等嘅炸雞髀，畀都唔好食啦！雖然該店有預先落單服務，但建議直接去店舖落單，喺門口等待雞髀炸起，即刻食先至係炸雞髀嘅黃金時間！因為呢，該店嘅炸雞髀係傳統港式炸髀，拎遠少少已經會爭啲。

主打嘅一定係超脆嫩！生炸雞髀$35，價格同「很得輝」無異，大概多數炸雞髀都係咁上下價錢。其他炸雞類別有脆脆雞球$22、脆脆雞扒$28、脆炸雞軟骨$28，雞嘅小吃就重有滷水雞中翼$25／4隻、高仿乳鴿其實係炸雞翼$15／2隻、花雕雞翼$22／3隻、香辣椒麻雞$38。

其他港式小食有GD燒賣、爽彈陳皮魚蛋，每樣都係$10／6粒，炸燒賣就賣$12／5粒，而煎釀四寶$22／4件，包含豆腐、茄子、燈籠椒、紅椒，食材有唔少都係自家貨源。由於該店來自於其家庭店「卿記豆腐」，所以鯪魚肉、豆腐等都係自家製。

店內嘅生炸雞髀需要等候10至15分鐘，拎上手熱焫焫，紙袋散發香氣，非常誘人！當時單憑呢種香味，已經估計到似係我哋想食嘅傳統港式炸雞髀。唔建議將炸雞髀拎得太遠，最好盡快食用，因為呢種炸雞髀凍咗會感覺爭啲。該店斜對面其實有個小公園，可以入去即時安全地食隻炸雞髀。不過，入去前就要事前做足防蚊措施，皆因有唔少蠓。

呢兩隻炸雞髀大小均等，唔算係極大隻嗰種炸雞髀，size大概係手掌size斧頭髀﹐都唔算細啦。驟眼睇，全隻炸雞髀表面脆皮都係呈現焦糖色，所以可以估計係搽咗麥芽糖。採用麥芽糖炸雞髀嘅方法，E.A.Two記得以前亞視綜藝《開心大發現》入面都曾經教過。而麥芽糖脆炸後，會令到雞髀表皮瞬間變成焦糖色，顏色特別亮麗，真係做到賣相極靚！

炸雞髀唔單止入口香脆，油溫同炸嘅時間控製得恰到好處，而內裏都係好入味，雞肉有醃製過。穿過雞皮之後，會先食到有黑椒味，慢慢品嚐時，會逐漸滲出蒜味、薑味，蒜嘅口感似係蒜汁味，不過味道唔會過重。而雞肉亦軟嫩，甚至有肉汁，呢種質素喺香港其實已經係上乘之作，直頭Best of the Best啦！當然香港嘅炸雞髀係好難同台灣、日本等嘅肉質同肉汁相比，因為根本無新鮮雞！