【東京景點】陽光60瞭望台隱身池袋！空中公園海拔逾250米高、360度環瞰無遮擋東京全景！人均入場費僅XX円！

東京觀景台有好多，比如「Shibuya Sky」、「東京鐵塔」、「晴空塔」、「六本木之丘展望台」，今次E.A.Two前往池袋區，呢邊都有一個觀景台隱身市區內，適合拍拖兩個人舒舒服服行逛，頂樓位置海拔有250米高，可以360度俯視東京全景！

位於「Sunshine City（太陽城）」內嘅「陽光60瞭望台 TENBOU-PARK」，距離「池袋站」僅有約8至10分鐘步程，交通便利。「太陽城」樓下係一個商場，整為大樓早於1985年已經開業，比「晴空塔」更加早建成，當時被稱為「東洋第一高樓」。喺「晴空塔」建成之前，其實「太陽城」係東京最高嘅展望台，呢個展望台於2023年中先至重新開幕。

「陽光60瞭望台」其實係一座大樓入面，所以全程都係冷氣間，賞景位置都係被玻璃包圍，唔係一個戶外觀景台。展望台宛如池袋空中公園，週圍無咩高樓建築，所以可以於海拔251米高嘅位置360度環瞰東京全景！

行到「Sunshine City」大樓，地下會有指示牌，寫明當中有咩設施，例如展望台、水族館。一直走入商場B1層嘅地下街，直行到通道近後面位置，右邊自然會見到入口處。展望台名稱叫「陽光60瞭望台」，「60」就係觀景台嘅樓層，只要乘搭電梯到60樓，大概半分鐘就可以直達頂樓！

電梯內燈光偏暗，設計恍如星空，抬頭好似睇緊星星。甫踏出電梯，轉個彎就會去到售票處，買飛之後就可以直接用QR Code入閘。E.A.Two到達嘅時間晏咗，但總算係黃昏晚霞嘅Last Minute。建議下晝5點左右前往，就可以從觀景台高點觀賞東京黃昏靚景。

全層都係「陽光60瞭望台TENBOU-PARK」，而且係室內空間，又有冷氣，無論落雨天、夏天炎熱或冬天嚴寒嘅時候，都可以輕鬆觀景，隨時可以順時針走一個圈，360度眺望東京全景！呢個景點既適合拍拖兩個人行逛，亦適台一家大細前往，位置方便，路線簡單，又可以影吓相。

高空大樓內有遼闊空間，觀景台內亦有個叫「展望之丘」嘅空間，其實係一個人工草坪，可以隨便躺平賞景。不過，當日由入口處走到近盡頭位置，會發現被pop up商舖中斷，需要折返原路，但都算近乎一個圈。而中途就有一間小型咖啡店「展望公園CAFE」，如果有時間，可以買杯咖啡坐低chill吓！

60樓位置有251米高，玻璃窗透視東京風景，由於池袋「陽光城」週邊無咩高樓建築物，所以更可以鳥瞰東京景色，唔會被建築物遮擋風景，呢處都算擁有城市獨特視角。無論日景、黃昏景，抑或夜景，都一樣璀燦奪目。窗外可放眼東京天際線，「東京鐵塔」、「東京都廳」、「新宿」等景點一個又一個映入眼簾，壯麗景色都算令人難忘。據悉，呢個位置於晴空萬里嘅情況之下，更有機會遠眺富士山、高尾山等近郊群山景緻！

每一扇窗都近乎落地大窗，好多前面都有座椅，部份有舒適梳發，可以坐低休息或賞景，每扇窗都可以望到唔同方位嘅景色。離開觀景台前，可以到中間通道走一走，當中有多面鏡子同裝飾，利用鏡同光線嚟打造一個迷你萬花筒，除咗外面東京風景，呢邊都算係一個可以打卡嘅地方。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 留意日出時間大概為03:27，而日落時間就大概為18:02。

❷ 乘搭東京地鐵至「池袋站」，徒步約8分鐘即達「Sunshine City」，JR山手線、JR埼京線、地鐵丸之內線、地鐵有樂町線、地鐵副都心線都可以去到「池袋站」或「東池袋站」，後者徒步3分鐘就可以抵達「Sunshine City」。

❸ 去到「Sunshine City」之後，由B1乘搭專用電梯，就可以直達「陽光60暸望台」，直接上到去60樓就可以買飛，前面就係入口。

❹ 觀景台人均入場費1200円。觀景台最終入場時間為20:00。