屯門常嚐素平民創新純素Pizza店！真雙拼口味、含非蛋奶素／純素芝士菜式！

近年好多人都鍾意素食餐廳，素食的確係頗受歡迎嘅選擇，今次E.A.Two就去到屯門一間全素Pizza店，價格極相宜，兩個人買完埋單都唔使$150，絕對係拍拖兩個人平民選擇！

屯門紅橋一帶向來聚集唔少我哋嘅香港小店，該店正正隱身於屯門紅橋。店舖於2013年已經開業，招牌寫住叫「常嚐素（Pizza Veg）」，地方不大，只係座落樓梯旁邊，位置上都係較其他小店隱蔽。而室內座位亦只係得兩張四人檯，所以多數客人都係選擇外賣自取。網上見到有炒稿嘅網絡平台寫要加一服務費，而事實上哪有加一服務費？

套餐中最平嘅係單人套餐，每份$55，有4款焗飯或焗意粉可以選擇，然後再加配1款小食或1塊pizza，可以揀pizza、春卷4件或薯角，重有餐湯或汽水，外賣就加$2。當中，有鮮茄素肉醬意粉、芝士汁雜菌長通粉、香草汁鴨胸螺絲粉、含蔥花嘅粟米汁銀雪魚焗飯。

Pizza口味不少，全部都係素食，包括幾款扮肉嘅素肉總匯、全部蔬菜嘅香蔬比薩、扮有蝦嘅海鮮總匯、素食墨西哥、加入水蜜桃嘅世外桃園、意式蘑菇比薩、加入菠蘿嘅夏威夷、有芝士醬嘅芝士玉子燒、含素三文魚嘅日式芥辣風、有素牛丸嘅BBQ素丸子、有素雞嘅咖哩薯仔、有馬來沙嗲醬嘅馬來素雞pizza、比較傳統嘅意式蕃茄比薩、比較特別嘅照燒素鰻魚、加入千島醬嘅千島夏威夷，合共足足有15款pizza口味！

pizza size有迷你批、普通批、大批，驟眼睇似6吋、9吋、13吋，入面價格分別係$62、$118、$162，入面同出面餐牌價格好似唔同，出面係$72、152、208。而雙拼pizza分別可以加$8、$10、$12，同一個pizza就有2款口味，強烈建議選擇雙拼pizza，可以一份食到兩款口味，而佢唔係分開砌出嚟，真係有誠意地擺兩款口味喺同一份pizza上面。

細心會發現每張餐牌嘅價錢都唔一樣，一張係寫套餐有2人餐$248、3人餐$326、4至5人餐$468，分別有唔同size嘅pizza，再加小食、意粉或焗飯，最後再加餐湯或汽水。以2人餐為例，可以揀2份小食、意粉或焗飯，而餐湯或飲品都可以揀2份。而另一張2人餐價錢就係$179，3人價錢就係$218，而4至5人餐價錢就係$312，價錢上其實唔一致，真係有啲模糊，只係相距並唔算太大。

餐湯有白湯或紅湯，即係忌廉湯或羅宋湯，以港式快餐嚟講，必然係揀紅湯，因為白湯只有好嘅西餐廳先會做得出水準。羅宋湯材料唔少，雜菜量份量適中，自己鍾意佢茄味重。另外，店內重有款焦糖燉蛋$16，可以選擇凍食或熱食，凍食並唔係上面有層硬焦糖，而燉蛋質感就比較似mousee。

該店既以全純素菜式為主，有部份餐牌更有不含蛋、奶、五辛選擇，總而言之就係香港極罕見嘅全素pizza！後來，E.A.Two終於發現價格嘅分別，紅色餐牌係有含蛋奶素嘅選擇，而白色餐牌就係全純素，不含蛋、奶、五辛嘅選擇。

E.A.Two選擇咗一份雙拼pizza，一份單人套餐，小食春卷就無咩特別，但就真係素菜餡料嚟。而鮮茄素肉醬意粉就做得幾似平時啲葷食肉醬意粉，係意粉比較淋身，可能因為外賣拎返去時間有影響。不過，都食到意粉醬汁有啲純素芝士感覺。

至於主食pizza，今次就選擇咗雙拼pizza，於同一份pizza內同時有2款口味，包括自選嘅意式蘑菇比薩、照燒素鰻魚。pizza底有芝士、茄醬，芝士係可以拉絲，亦可以自行加轉米芝士。最意外係佢真係同一時間做，同一塊入面一半擺蘑菇口味，另一半就擺素鰻魚口味，認真有誠意！平時見到有啲蛋糕店將幾件蛋糕砌埋一個圓形當百搭口味蛋糕，總好過將兩個半份pizza砌埋一齊就算嗰啲。