【東京住宿】近大車站、極速達江之島！藤澤平價住宿限時免費啤酒、Lawson暗渡陳倉！｜基普酒店湘南藤澤Kipp Hotel Shonan Fujisawa

想要去鎌倉連江之島一日遊，好多人會直接去找尋鎌倉酒店住宿，但E.A.Two今次就選擇嘅酒店住宿，位置就係鄰近交通更方便嘅「藤澤駅」。唔單止一程車直達「江之島」，亦可以乘搭江之電去「鎌倉」，更有JR站可以來往東京市區。呢間酒店價格相宜，每日指定時間有免費任斟啤酒提供，更有秘道直通Lawson便利店，拍拖兩個人落雨去買嘢食都唔使怕淋濕！

對於一般旅客嚟講，「藤澤駅」相對「鎌倉」或「江之島」係比較冷門，但E.A.Two覺得入住呢邊酒店更加便利。今次選擇鄰近「藤澤駅」嘅「Kipp Hotel Shonan Fujisawa」，中文譯名為「基普酒店湘南藤澤」，日文原名則為「キップホテル湘南藤沢」。酒店位置距離JR東海道本線「藤澤駅」僅有2分鐘步程，而呢個站同時連接小田急江ノ島線、江ノ島電鉄線，無論係來往東京市區，抑或去旅遊景點都係方便快捷。

如果乘搭小田急江ノ島線，3個站就可以直達「片瀬江ノ島駅」﹐比江ノ島電鉄線更加近唯一來往「江之島」嘅「江之島橋」。而「藤澤駅」更加係江ノ島電鉄線嘅其中一端終點站，另一端係「大船駅」﹐方便來往鎌倉市任何景點。

據了解，酒店於2024年先開業，設有24小時櫃檯同客房服務，係正常酒店模式，而唔係民宿之類，所以唔使擔心太早或太夜無得登記入住。酒店樓高9層，包含2樓嘅早餐區、投幣式洗衣機、乾衣機、自助販賣機等，多數客房都係集中於3至9樓，而上落需要拍卡進入。

酒店地下設有自助飲品吧，飲料區隔離又有盥洗用品區，但就禁止用水樽斟水，茶水咖啡熱朱古力等只能夠用樓下嘅杯裝嚟飲。除咗有適合朝早享用嘅咖啡機，亦有適宜Happy Hour享用嘅啤酒機，入住客人可以免費任飲生啤酒！啤酒類別應該係一番搾り麒麟啤酒，不過要留意啤酒機供應時間只限5小時，之後就會停止供應。如果wrong timing，可以直接去隔離便利店買，因為隔離就係Lawson，斜對面又有Family Mart，由「藤澤駅」返酒店順路又會見到7-Eleven。

而酒店地面有一條室內秘道，可以直通隔離嘅Lawson便利店，就算足不出戶或遇上落雨情況，都唔使擔遮或淋濕，買完可以直接返上酒店！而酒店附近唔單止便利店林立，連餐廳都有好多可以選擇，居酒屋、拉麵、燒鳥、牛排、壽司、咖啡店等應有盡有，又或者行返去「藤澤駅」一帶，大型商場有更多餐廳，行去「藤澤駅」樓下迴旋處重可以逐條街睇吓有咩適合自己呢！

房間地方唔算好大，但都唔細，算係正常雙人房size，係一間火車站景觀房間。一隅設有窗戶，窗外可以下瞰整個「藤澤駅」。朝早起身嘅時候，敞開遮光窗簾，房間窗戶完全透視每日當地打工仔嘅通勤情況。房入面有usb延長線，可以更方便手機叉電，但就要小心唔好撈亂自己嘅叉電線。不過，係用唔到部空氣淨化機唧。

浴室乾淨整齊，有基本設備，有部份日用品有需要可以直接落返地面大堂自取，位置就係啤酒機、咖啡機、微波爐、櫃檯隔離。一個個小籃入面有盥洗用品，包括牙刷牙膏、浴帽、牙線、棉花棒等。呢度亦有各式護膚品，例如洗臉奶、toner、潤膚露，都係好似tester嘅包裝。另外，呢度重有抹茶粉可以自取，啲抹茶粉沖泡出嚟又幾好飲。

至於酒店提供嘅早餐，就係自助模式，除咗有沙律菜、麵包、蛋餅、果汁等基本菜式，重可以自製「江之島」知名嘅吻仔魚丼，早餐水準不過不失。

酒店房間有142間，以雙人房計，房間每晚入住價格見過最平為HKD287，人均僅約HKD150，有時貴啲都係HKD557，人均大概HKD270，不過早餐需要另外加錢，一間房連埋早餐大概多咗HKD90至100。check-in時雖然要於櫃檯辦理手續，但check-out就唔需要去櫃檯搵職員處理，只需要將房卡放喺櫃檯前面嘅箱入面就得。

即睇【基普酒店湘南藤澤 Kipp Hotel Shonan Fujisawa】住宿價錢及限時優惠﹕Agoda｜ Trip.com｜Booking.com｜Expedia 預訂

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 每日登記入住時間為15:00﹐退房時間則為10:00。

❷ 乘搭JR東海道本線／小田急江ノ島線／江ノ島電鉄線，於「藤沢駅」落車，徒步約2分鐘即達。

❸ 地下啤酒供應時間僅限15:00－20:00。早餐供應時間為06:30－10:00。

❹ 酒店地下有條室內小路可以直通隔離Lawson便利店。