【東京美食】「EATWO」撞名意式咖啡店！平塚LUSCA商場內、原名「EAT」創業45年！

「E.A.Two」呢個名係來自於Miss A、Mr E兩個人，希望由本土美食出發，帶大家拍拖遊覽全港，再衝出香港到其他地方。E.A.Two發現日本東京竟然有一間意式咖啡店撞名「E.A.Two」，係一間以「EATWO」命名嘅Cafe and Restaurant！咖啡店隱身一個東京近郊商場內，原名到底叫咩名呢？

今次E.A.Two由JR「御殿場駅」前往「鎌倉駅」，中途會經過「平塚駅」，而呢個駅就有一個連接JR嘅商場，都係位於神奈川縣。平塚表面好似好鄉郊嘅地方，比較少遊客前往，但原來都算係一個大駅，都係一個交通樞紐，可以乘搭唔同交通工具，亦都係鄰近海邊。

而JR「平塚駅」有一個商場連接鐵路，該商場以「LUSCA」命名，樓高7層，加上地牢1層，基本上同一般商場無乜太大分別，係6樓本身有個屋頂庭園，但現場就唔見可以進入嘅路線。不過，只要上5樓，就會見到一間E.A.Two覺得非常特別嘅咖啡廳！

呢間商場咖啡店叫「EATWO（イートゥー）」，竟然同本平台剛巧撞名！翻查資料時發現，該店於1978年開業至今，其實創業已有45年歷史，原名為「EAT」，而「EATWO」就係來自於「EAT」和「Brownsuger」。只不過，呢間咖啡店於2024年4月先登陸平塚市，並改名為「EATWO」，認真有緣！

餐廳為一間意式咖啡店，裝潢新穎，採開放式設計，有42個座位，並以意大利菜式為主打，大致上同一般Cafe無異。不過，有部份菜式就係同平常稍有分別，亦有部份菜式係限時供應。比如係令人心心眼嘅季節限定Strawberry Pancake，一份1380円，連稅1670円，供應時間為14:00-20:00，製作需時30分鐘。重有款蜆肉油菜花意粉，一份1380円，連稅1670円，17:00後則為1880円。

至於Special Lunch供應時間為11:00-15:00，有Risotto、Spaghetti，一個Set賣1080円至1480円，例如有蘑菇忌廉燴飯、Carbonara、Peperoncino，可以再加小食、甜品、飲品。由於當日只係下午茶時間，所以並無選擇太多菜式，決定留返個肚再食其他餐廳美食。

比如今次選擇一款好獨特嘅EATWO風卡邦尼意粉，套餐計一碟1280円，而餐牌入面就係1163円。一杯咖啡加290円，甜品則加440円起。平常食嘅卡邦尼意粉，多數係醬汁狀態，意粉會黏住醬汁，而且有啲膩感。但呢間意式咖啡店嘅卡邦尼意粉擁有獨特風格，竟然係湯汁狀態！

意粉配料煙肉係粒狀，下面醬汁變成湯汁，似足湯汁版卡邦尼意粉，但個湯汁味道又真係正常卡邦尼意粉嘅味道，而且無咁膩。最意外嘅地方係，雖然本身係湯汁，但食食吓又會愈食愈少液體狀。湯汁反而又變返偏杰身，恍如搖身變返醬汁，意粉同湯汁完全融合，果然風味獨特。

一杯Lemon Lime Soda，原價為500円，連稅550円；一杯Caramel Latte，原價為527円，連稅580円。前者只係一杯青檸梳打，無乜太大特別，不過下面有青瓜片，而薄荷味真係好濃郁。後者上面有一球cream，擠埋焦糖醬，感覺似雪糕球，cream下面就係焦糖咖啡，奶喺最底而咖啡喺中間，咖啡入口香濃，唔會味道好苦澀。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭JR東海道本線至「平塚駅」，出站即達「LUSCA」商場。「EATWO」咖啡店位於商場5樓。

❷ 午餐時間為11:00-15:00，下午茶時間就係14:00-17:00，晚餐時間則為17:00-20:00。

❸ 留意部份菜式需要等候30分鐘，而且限時提供。

❹ 該店接受現金、信用卡、Paypay付款。