【區區有小店】大角嘴5間海南雞專門店邊間$43平絕全區？

香港人喜愛食海南雞飯，當中又分為泰式海南雞飯、新加坡海南雞飯，單單一個大角嘴小區就同時擁有兩種海南雞飯專門店，合共有五間小店現時仍然售賣海南雞飯，每份價錢由$50至$70不等，拍拖兩個人可以$100埋單，最平一份更加低至$48，到達係邊間呢？

（1）極品泰國菜館

位處中匯街嘅一間泰國餐館，門面唔突出，唔行入店舖內亦未能發現係由泰國人主理，餐牌內有基本泰國菜式，比如菠蘿炒飯、濕炒河粉等，相當有鑊氣同有水準，但海南雞飯一碟$65，份量極充足，價錢算適中，但油飯偏淡，雞肉唔太嫩滑，相對其他菜式遜色。

延伸閱讀﹕泰國人主理！大角嘴正宗泰國菜館濕炒河粉黏滑可口份量充足

（2）幸福海南雞

座落大角嘴市中心內嘅幸福海南雞，就以新加坡海南雞伋為主，特別加上老火湯，加上油飯、青菜、飲品配搭，尤如一個日本定食套餐，賣相吸睛，一人套餐$70，二人套餐$192。海南雞飯內含雞髀肉、雞胸肉、雞翼，至少肥瘦均勻，油份唔多，無乜雪味。雞皮略嫌爽彈，雞髀肉偏薄，但夠嫩滑，雞翼一般，雞胸肉反而軟嫩有驚喜。油飯份量適中，色調偏白，並非薑黃飯，只係僅僅有油香，望落乾爽，略帶油潤。三色醬料包括蔥油、辣醬、甜醬。

延伸閱讀﹕大角嘴定食版海南雞飯霓虹燈牌現4款招牌菜式

（3）星洲總廚

而同樣位處市中心嘅星洲總廚亦以新加坡海南雞為主打，海南雞配油飯$68，而且包飲品，價錢適中。飯量充足，油飯有油香，雞肉唔少，而且質感嫩滑，雞皮偏厚，略欠爽彈。三色醬汁包括薑蓉、秘製辣椒醬、甜豉油，配搭薑蓉味道比較出色。

延伸閱讀﹕大角嘴街角星馬菜餐廳大大塊厚切豬扒上枱就聞到香味最出色唔係菜式係乜？

（4）Top Thai Thai Food

最寂寂無聞嘅一間海南雞飯，可能係Top Thai Thai Food，顧名思義以泰式海南雞飯為主，係一間街坊小店，唔了解亦唔會知道老闆娘係泰國人，其女兒亦於店內幫手。店內有幾款泰國菜式，選擇唔多，但最貴都只係$50，包括海南雞飯、泰式金邊粉、泰式雞扒飯、香葉肉碎煎蛋飯等。海南雞飯有3款，可以自選部位，分為$43、$45、$50，同時配上冬瓜湯。當中海南雞髀飯$50，油飯有油香，雞肉份量唔少，雞皮爽彈，雞肉嫩滑，而且無骨。醬汁只有酸辣汁，鹹中帶香辣，相當開胃，有時最平嘅未必一定係最差嘅。

延伸閱讀﹕泰國人主理？大角嘴低調泰菜Top Thai Thai Food 海南雞飯分成3款任你揀

（5）海南雞2.0

最後一間係最少人留意嘅海南雞飯，位置上靠近富榮花園，店舖較低調，只有他人加持。店內主打為泰式海南雞飯，係唯一只供應外賣嘅一間，每一款又分為輕量版$48 同豪華版$60，都配上一碗雞湯，又有4款唔同口味任揀，包含薑蔥、麻辣、香辣口水雞口味。以豪華版為例，飯量充足，色調鮮黃，只係油香唔夠，旁邊有約10件雞肉，上層為雞髀肉，下層則為雞胸肉，兩者都好滑嫩，而且唔嚡口。至於沾醬則有兩款，一款係泰式醬油，另一款係微辣醬，醬汁亦有水準。

延伸閱讀﹕大角嘴街坊海南雞秘店低調泰式雞飯2個版本4種口味