西營盤招牌豬扒酸辣米線川味濃郁一碗麻辣湯到底有幾多種辣椒？

提到四川麻辣米線或酸辣米線，通常都難以搵到合心水嘅食店，單靠招牌豬扒配酸辣、麻辣湯底相當足料，一碗已經足以滿足街坊胃口，如果拍拖兩個人行過西營盤，亦不妨一試呢啲街坊餐廳。

巴蜀軒豬扒酸辣米線本身由潮洲魚蛋起家，再開設豬扒酸辣米線專門店，同時以麻辣四川粉為主，曾於筲箕灣、元朗有分店，由灣仔開到西環西營盤，一直以招牌豬扒酸辣米線、豬扒麻辣四川粉為主打，亦其他麻辣鮮香菜式，比如古法手撕雞涼拌撈、紅油雲吞拼菜肉餃等。

招牌中嘅招牌係招牌豬扒酸辣米線$42，湯底有酸菜、芽菜、肉碎等，酸辣湯同麻辣湯嘅配料相似，但味道就有分別，酸辣湯入口酸爽，甚開胃，湯底似乎唔只花椒、辣椒、指天椒、子彈椒等辣椒香料，入口有雞湯鮮甜味，湯底亦有肉香。

至於招牌豬扒麻辣四川粉$44，湯底配料包含榨菜、筍絲、肉碎等，即使係小小辣亦有少嘴唇麻痺感，小小辣等同BB辣，仍然滲出辣香，有種麻而不辣嘅感覺，而中辣則已經辣味十足，湯底更紅噹噹，辣椒氣息令人愈食愈開胃。不過，整碗辣湯感覺就稍為油膩，係有少少扣分。

每碗米線份量恰好，軟硬適中，而四川粉比米線唔同嘅地方係更為煙韌同通透。入到呢間餐廳一定要選擇嘅相信一定係豬扒，豬扒經過醃製，口味豐富，包含花椒、八角香，加上各種調味料，似乎有灑上孜然粉。

豬扒表面略帶焦香，並非酥脆質感，反而似香煎豬扒，相當香口，而且啖啖肉，只係略嫌質感唔太一致，部份位置軟嫩可口，能夠骨肉分離，而部份就略有嚡口，甚至乾柴。不過，豬扒浸入熱湯中，卻又沾唔上辣湯嘅酸辣同麻辣味，只有輕微椒香同香料味。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 灣仔店地址為灣仔駱克道368號百玲大廈地下G1舖。

❷ 店舖位置為德輔道西與水街附近，離海旁僅8分鐘步程。

❸ 可轉配四川粉、日式拉麵、紅薯粉、烏冬，加$1至$2。

❹ 雙拼加$8，追加配料或麵底加$5，套餐飲品半價。

❺ 下午茶14:30至18:00，送飲品。

❻ 辣度有分大辣、中辣、小辣、小小辣、唔辣。

❼ 留意店舖只收Cash。

❽ $20至$22有杯自家煲製桂花圓肉菊花茶。

EATWO

Miss A

【區區有小店】葵芳美食大本營！葵涌廣場尚存22間本土小店匯聚平民小食隨時掃通街｜葵廣推薦2023