芫荽迷搶食重荽麵！元朗人氣餃子專門店口味眾多全賣餃子？

本地人似乎都喜愛食手工餃子，價錢平又夠飽肚，而且款式多變，元朗就有一間相當受街坊歡迎嘅手工餃子專門店，以即包手工餃子聞名，更特別之處係餡料豐富，並非單單係鮮肉餃或韭菜餃，倘若拍拖兩個人係餃子迷，就要去試試呢間餃子店啦！

餃子配搭款式眾多，外形飽滿，既有湯餃、煎餃，亦可配上海麵，甚至芫荽麵，亦可以挑選組合形式餃子，一次過品嚐幾款唔同口味嘅餃子。而餃子合共約有9款口味，招牌拼餃就有4款，包括每款2隻嘅大白菜、韭菜、香芹、芫荽。

每隻餃子脹卜卜，呈荷包狀，芝士粟米拼餃、流心芝士粟米煎餃、韭菜鮮肉餃以組合計，$45各有3隻，湯餃清香，餃皮煙韌，厚薄適中，而煎餃呈金黃色，底部香脆，略帶油香，唔算太油膩，煎餃偏向日式風格。其中一款以車打芝士作餡，咬下之後芝士洶湧而出，流心芝士相當邪惡！另一款芝士餃注滿粟米粒，清甜粟米配奶香芝士，相對流心芝士則較單純。

至於最簡單嘅係大白菜鮮肉餃5隻連上海麵$40，餃子皮薄，餡料足料，大白菜切粒作餡，比例上比豬肉少啲，故豬肉味比菜味稍重，菜味較弱，上海麵略有麵香，不過不失，配上老火湯底簡約而高雅。芫茜(荽)鮮肉餃5隻加芫茜(荽)麵$41，不單有鮮肉餡料，而且佈滿芫荽，帶有清香味，芳香撲鼻，食落無咩苦澀味，芫荽、豬肉比例上尚算適中，芫荽麵略帶芫荽清香，味道唔會太寡，香而不膩。

最特別之處係芫荽迷必食嘅要選勁茜(荽)麵$51，即係芫荽刀削麵配芫荽湯，上枱時最意外係全碗滿滿芫荽，起碼有三重芫荽，必可令芫荽迷滿足。而芫荽湯則略帶魚香，芫菨清香中帶有鮮甜味，但魚湯又唔會蓋過芫荽香味。配搭芫荽餃子可吸附湯汁，令整隻餃子有更重芫荽味，而麵底順滑而煙韌，清淡中有濃香芫荽香，對芫荽迷嚟講確係非常吸引。不過，比較有蔬菜甜味嘅反而係韭菜餃，菜汁豐富。