中環鬧市地庫藏日式石燒牛食堂半自助式套餐最平$48！

要數只能夠堂食嘅類別，除咗拉麵重有咩？事實上，日式石燒牛扒同拉麵一樣，都係一種無得外賣、只能堂食嘅類別，如果拍拖兩個人無得堂食，睇怕之後都食唔到，謹記好好珍惜剩低可以堂食嘅日子呀！中環有一間平價日式石燒牛扒，100g牛扒最平只係$48，豬牛羊雞任君選擇，適合食肉獸。

要係中環高尚地區揀選平民食堂，其實唔難，鬧市地庫就有一間以日式石燒牛扒為主打嘅小店，價錢貼地，水準正常。除咗石燒牛扒，亦有蛋包飯、丼飯、石鍋料理等，選擇都有唔少。

安格斯窄身西冷200g為$105，大概每塊牛扒為100g，牛扒放上熱石上之後，生熟度自由控制，不過由3成熟燒到6至7成熟已經足夠，否則就會太過乾柴，而西冷牛扒嘅牛味無咁明顯，但都算軟腍，肥瘦適中，較有咬口。扒類不單有西冷牛，亦有牛肩扒、日本岩手A5和牛三角肩、美國穀飼豬梅頭扒、雞扒、紐西蘭羊鞍，甚至全素美國植脂牛肉。

想特別啲嘅，可以挑選薄切鹹牛脷，又或者鴨肝+滿滿牛扒，後者200g賣$128，牛扒為肩胛美國牛，比西冷牛扒較有牛味，比西冷厚肉，而肉質亦較軟嫩，不過筋位亦較多。滿滿牛扒同時附由一塊鴨肝，而鴨肝Size本身唔細，但放上熱石後已收縮，鴨肝有豐富油脂香，入口即融化。而鴨肝於熱石上滲出油份，令牛扒都沾有鴨肝油香。

套餐係半自助式，可以自由去自助沙律吧取沙律、例湯如椰子蘿白湯、6款醬汁，可以無限添加，而套餐包含一碗白飯，若加$5就可配搭滿滿紫菜飯、咖哩飯，不過兩者都只屬不過不失。

醬汁當中有生蒜、黑松露生蒜、韓式辣醬、芝士汁、羅勒醬、花椒辣油，始終係蒜蓉最配合牛扒，為牛扒點睛，而羅勒醬都幾清新，黑松露生蒜有新鮮感，花椒辣油、韓式辣醬不過不失，芝士汁就比較遜色。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 巴士路線6X,780,788,930A, 934,961S,969B皆可到達中環。

❷ 100g最平$48，但只能當少食多滋味，一般200g先夠食。

❸ 套餐係半自助式，出面有沙律吧、醬料、餐湯可以自取。

❹ 飲品需要加錢，餐飲加$10，茶飲加$12至14，否則只能取清水。

❺ 套餐本身有白飯，但加$5可以配滿滿紫菜飯、咖哩飯，其實都係一般貨色。

❻ 留意有有加一服務費。

❼ 如果塊熱石唔夠熱，可以請店員幫手換過塊。

❽ 每位都有圍裙提供，燒牛扒時要小心被熱石上嘅油彈親。

EATWO

Miss A

【區區有小店2024】荔枝角23間尚存本土餐廳推介！肉蛋吐司／脹卜卜餃子／工廈Cafe｜荔枝角美食推薦2024

兩個人旅吓行

專題

E.A.Tips :

滿滿食堂