【野餐隨行】元朗11款人氣名物瀑布蛋治有咩特別？大棠燒烤場變草地野餐場

上大棠唔一定只係得楓香林，亦可以靜靜哋野餐，可以連接行山路線，亦會見證燒烤場頓變草地場嘅畫面。元朗國美食眾多，要野餐最方便嘅選擇當然係三文治、多士，當中有一間躲藏小街道內嘅小食店，一瞬間因為「瀑布蛋治」而變成區內人氣店，另有由Twinings茶葉炮製嘅奶茶，不過拍拖兩個人去買份午餐，隨時要等候20至45分鐘，到底係咪真係值得呢？

龍鳳店室內只有兩張餐枱，座位有張，故大多數人都係外賣，但餐牌上就有11款特色蛋治，全部都包含瀑布炒滑蛋，吞拿魚蛋治、三重芝士蛋治嘅$38至鵝肝蛋治$78，每款蛋治都並非平常可以手拎嘅三文治，必須以盒盛載，然後用叉或筷子食，風格上唔係港式，反而似係日式蛋治。所謂蛋治，並唔係以雞蛋作餡，而係將蛋調出，以雞蛋包裹麵包，即係炒滑蛋覆蓋麵包。

由水車館街步行至元朗千色店附近嘅元朗大棠紅色小巴站，腳程約5分鐘，而15分鐘車程就可以到達大欖郊野公園，即係元朗大棠位置。近年，唔少人前往元朗大棠，都係以大棠楓香林為目的地，但事實上大棠山道同時連接好幾段行山路線。今次帶大家直上大棠野餐，當中燒烤場旁邊一個涼亭並未有圍封，係可以坐低野餐嘅地方。編輯更發現目前燒烤場內已經長滿青草，沙泥盡變翠綠，枱櫈旁邊恍如小花園，而燒烤爐內甚至長出小草，證明長久已經無人使用過。

先試一款蟹膏蛋治$58，價錢其實比較貴，只係特別同睇落出色，原來可以加$5增添特選煙燻芝士，麵包係比較濕潤，而且係偏薄身，唔係厚多士模式。所謂蟹膏，並非內餡有一坨蟹膏，只係塗咗薄薄層喺麵包上，似以蟹膏醬取代花生醬、果醬或牛油，一啖入口係溶於滑蛋內外，蟹膏味道唔太濃，而內餡重有蟹棒，但蟹柳味比蟹膏味重，略帶甘香。

蛋治頂端以大塊嫩滑炒蛋覆蓋，加上蟹籽、日式木魚絲、海苔粉等點綴，色澤搶眼，賣相上的確係較一般蛋治吸引。將蛋治一刀切開，雞蛋呈半生熟狀態，蛋漿略有流心，但被稱為瀑布蛋治就過於誇張，同瀑布狀爭一條街，事實上只係滑蛋多士，而唔係瀑布蛋治，部份位置雖然過熟，但大多數都係軟滑狀態，令蛋治整體充滿層次感。

奶茶都有24款，$25至$38，不過24款入面只係每一種區分成正常甜、少甜、無糖類別，最貴為龍鳳峽奶茶，最平係港式奶茶，$27、$30、$32嘅價錢有伯爵奶茶、桂花烏龍奶茶、玫瑰奶茶、馬騮搣奶茶、泰國手標奶茶、白蘭翠玉奶茶、特選深焙咖啡、Nutella咖啡，另外亦有$8豆漿。最大賣點係奶茶採用Twinings茶葉沖泡，茶香方面的確係比較有保證啲嘅。