近屯門碼頭！屯門蝴蝶灣泰國冬蔭功蝦湯奶白變橙紅估吓一碗有幾多隻蝦？

泰國冬蔭功向來受到香港人歡迎，酸酸辣辣口感為味蕾刺激，陣陣濃郁蝦湯味令唇齒難忘，而香港本身就有唔少出名嘅泰國菜餐館，但隱藏於小街道內嘅泰國餐館，有時比大餐館更值得拍拖兩個人一試，比如係屯門呢間離屯門碼頭只係5至10分鐘步程嘅小泰國餐館。

小餐館位於屯門美樂花園，毗鄰蝴蝶灣公園，係住宅區內一間小店，名為冬蔭哥。據了解，老闆擁泰國血統，而其母更加係一位泰國菜廚師，故水準有一定保證。餐牌上，各款菜式價錢都算適中，亦算係街坊能夠負擔嘅數字。從觀察中可見，店內菜式採用泰國東北烏汶府嘅頂級泰國茉莉香米，似乎材料上都有一定要求。

泰國氣候偏炎熱，而且甚為潮濕，加上位處熱帶地區，所以出產特別多水果、蔬菜，而菜式上亦會比較辛香帶辣，皆因較侷促，而且氣溫比較高。泰國菜一般分為五大菜系，包含首都菜、中部菜、南部菜、北部菜、東北菜，本身所有泰國菜共通點都係著重香料、乾材，而且會使用魚露，同時喺五味中取得平衡，但多數都係偏向微甜。南部嘅菜式係香港人較為熟悉，皆因多數會選用椰奶、黃薑，其次東北部菜式就多採用青檸汁。

當中，必揀菜式一定係冬蔭功蝦湯$55至$100，細碗$55、大碗$100，後者大概就係一個車仔麵碗式拉麵碗嘅大細。冬蔭功蝦湯本身為泰國人配上米飯嘅湯水，是次冬蔭功蝦湯可見椰漿與清湯混和嘅畫面，攪勻之後即變成一碗濃郁冬蔭功蝦湯，從奶白色瞬間變成橙紅色，而冬蔭功本身就係泰國首都菜嘅代表作。

Tom Yam 冬蔭功蝦湯等同泰式酸辣湯，配料豐富，包含辣椒、香茅、南薑、酸子、魚露等，經魚露調味後變成乳狀質感，酸中略帶有微辣味，同時有帶上甜味，非常醒胃。碗內更可見檸檬葉、九層塔。蝦湯內固然會加上大蝦，亦有車厘茄、草菇，大蝦更有足足6隻，份量十足，雖然有兩隻較梅，但其餘蝦肉都係爽口彈牙，而且大隻而鮮甜。

本身一份小食拼盤賣$60至$110，包含蝦餅、魚餅、春卷、炸蝦，但款式、數量有不確定因素，故此編輯寧願散叫兩款，當中有泰式豬頸肉$55、吉列炸蝦$12/隻及$30/3隻。豬頸肉一份有10幾塊，甚為香口，肉質軟腍，油脂唔算重，表皮微脆，唔會太乾身，反而增添炭燒香味，至於炸蝦則不過不失，表皮脆口，蝦肉亦算爽口。