鑽石山石礦場+樹屋

鑽石山出發勇闖石礦場!山中秘道探索高聳東南亞樹屋 上中下三條路線直抵城市後山入口

隨行山郊遊人士日益增加,香港秘景愈趨減少,要拍拖兩個人找尋人流稀少嘅秘密境地,變得難上加難,編輯今次就帶大家前往隱藏於城中嘅秘點,環境幽靜,既係歷史遺跡,亦係攝影打卡好地方,遺跡中同時有一座高聳樹屋,充滿東南亞風格,霸氣非常!想知詳細點去?就要密切留意eatwo facebook啦!

有留意eatwo嘅讀者,一定會去過大埔泰國寺背後嘅樹屋,今次編輯就帶大家再深入香港另一座隱藏路邊小山坡背後嘅樹屋,躲藏於鑽石山石礦場之間,位置位於山坡內,亦不至於對居民產生大影響。如果今日之後鑽石山樹屋變成熱門打卡點,被其他平台抄橋或KOL跟隨介紹,希望大家唔好忘記eatwo又一次做咗介紹嘅始祖之一,俾返個Like我哋啦!

基本上,有三條路線可以前往鑽石山石礦場樹屋入口,分別處於石礦場上中下方,而進入小山坡之內則只係走同一條路線,山坡內路面寬闊,路線亦算清晰易走。第一條路線係相對比較正式同唔受阻礙嘅路線,從鑽石山荷里活廣場起步,南蓮園池、廣場之間嘅對面就係小山坡入口,位於天橋底下。入口位處鳳德道路邊山坡,上行至欄杆小路,轉左再直行到底就會到達第二條路線嘅匯合點;而第二條路線可以從黃大仙起步,上行至鳳德公園之後,沿鳳德道走向鳳德社區中心,上行天橋,轉入鳳美徑,就可以上行至山坡入口,可能係比較直接嘅方法,只不過入口鐵閘唔知會唔會長期開住;第三條路線就可以由慈雲山起步,穿過蒲崗村道公園,近慈雲山蒲崗村道學校村,下行至鳳禮苑、鳳德邨,於迴旋處轉左,就可以轉向下方鳳美徑,然後到達小山坡入口,亦係第二條路線嘅匯合點。

於同一個入口轉上小樓梯,依循狹窄梯級直上,然後再轉向右邊小平地,就已經抵達鑽石山石礦場山坡。山坡中最先會見到一個小平地,附近有簷篷,亦有一張張枱櫈,而小平地之上會見到一幅又一幅書法作品,文中有意思,果然高手在民間。據附近居民所講,以上書法作品係來自一位書法老師,早前曾經隱藏於山中編寫,但現時暫時已經離開,其中一張紅噹噹小枱上寫有「如有緣會見」,而每份作品隱約可見一個作者名稱,名為「書陶醉」,望落似古時詩人嘅名字,感覺充滿詩意。

折返小平地,繼續前行,直到靠近盡頭,會見到圍板,右下方係剛才鑽石山入口嘅欄杆小路,轉左再上行,然後繼續向右邊方向走,抬頭就會見到樹屋喺左邊,呢個方位仰望遺跡,加上翠竹夾雜之下,驟眼睇嚟會比較有童話風,如同仙境故事中嘅畫面。鑽石山石礦場喺Google地圖上係無任何記錄,亦無正式路線,連網上資料亦非常罕見,切切實實係一個城中秘地。

點解鑽石山後山會有一座樹屋?事實上,林中位置係鑽石山石礦場遺址,香港九龍東打石業曾一度興盛,石礦場開採幾十年,以開採花崗岩石材聞名,有指係60至90年代其間開採並設立石礦場,據土木工程拓展署資料顯示,原來鑽石山石礦場係當時其中一個政府營運嘅石礦場。其間,更有多間片場,較為人熟悉嘅係一代武打巨星李小龍曾經於嘉禾片場出入為電影進行拍攝工作。只係石礦場早於1982年分階段關閉,並且將一部份興建成鳳德邨,而另一部份就係蒲崗村道公園至學校村,屬於未完全開採嘅位置。

講到鑽石山石礦場,就要先簡單理解「鑽石山」,由於英文為「Diamond Hill」,好多人都會以為鑽石山源由係只同鑽石有關,但其實鑽石山的確係一座被消失嘅小山峰,海拔高約182米,東面為牛池灣,南面為舊時嘅大墈村,西面為竹園,而北面就係慈雲山,只係目前大部份地方已經演變成住宅區。至於點解會有此誤解?其實「Diamond Hill」係從「鑽石山」直譯,英譯中嘅方式比較罕見,有別於平時中譯英。

石礦場遺跡中左邊石屋被樹根纏繞,附近雜草叢生,抬頭則可見小屋簷篷,狀似一座巨型樹屋,滿滿東南亞風格,高聳矗立石礦場之間,非常霸氣!呢座鑽石山樹屋完全符合一眾網紅嘅打卡點條件,但竟然仍舊未有被大眾發現。

依小樓梯上行,可以再轉入小山坡,位置靠近大老山隧道入口,上行至石屋頂端,位置如同廢棄地,頂端石柱躉上殘破不堪,石牆附近相當雜亂,盡頭有幾條石柱拼湊成一個小窗口模樣,多條石柱鋼根外露,底部亦破爛,其實都有一定危險度。站於石屋頂端,可俯視剛才樹屋旁打卡所站立嘅位置,可直視佈滿樹叢嘅樹屋頂端,亦可俯首樹屋底部。

大家唔應該將鑽石山理解成「鑽石」嘅山,唔好以為係一個鑽石礦,因為「鑽」字係一個動詞,而唔係一個名詞,所以應該理解作「鑽出」或「鑽開」,係一座曾經採石嘅小山丘,目前嘅鑽石山已被幾乎完全剷平,大概只係淨低海拔約100高嘅小山坡殘存。

E.A.Tips :

❶ 第一條路線可以從鑽石山起步,於荷里活廣場起步,天橋底對面就係入口,沿路邊山坡上行,然後轉左依循欄杆走,就可以轉入山中,路線比較正式。

❷ 第二條路線就可以由黃大仙起步,上行至鳳德公園,沿鳳德道走,經鳳德商場天橋,前行至鳳德社區中心,再轉入鳳美徑,1分鐘後就會到達入口。

❸ 第三條路線可以從慈雲山下行,經過蒲崗村道公園,就可以下行至鳳禮苑、鳳德邨,轉左至鳳美徑,下行1至2分鐘就會到達第二條路線入口。

❹ 石礦場樹屋蚊蟲極多,謹記做足防蚊措施,最好穿著長袖衫褲。

❺ 石屋係歷史遺跡,請勿破壞。

❻ 謹記自己垃圾自己帶走。

❼ 石屋頂較危險,鋼根已外露,要特別小心安全。
EATWO
Miss A

鑽石山石礦場

鑽石山鳳德道