若然選擇唔堂食，最令人困擾嘅係外賣往往比堂食貴$2，據連登網民所講，部份餐廳即使自備餐盒、餐具，都要加$2外賣費，而有部份菜式則只張堂食，故此拍拖兩個人如要堅持外賣心態，真係一件絕對唔容易嘅事，未有幾多人俾Like支持時，更加係單靠個人意志。編輯最近就於太子發現一間質素不俗而價錢低廉嘅居食屋，最值得支持嘅係店方尊重外賣人士，無多收$2外賣費用。
位於太子荔枝角道嘅佐禾町居食屋，靠近雷生春，門面就以日式原木風格為主調，內有屏風，室內亦採同一風格，更有浮世繪壁畫，牆身貼上餐牌，門口亦放有外賣套餐，價錢透明度高，而每一款外賣竟然比堂食平價，埋單時更發現一毫子外賣費都無多收，以編輯呢段時間長期外賣嚟講，主動唔收真係好罕見。
而每份外賣套餐都會配上麵豉湯、小食，價錢上似乎比堂食更抵食，如果自己重新擺盤，絕對同堂食無分別！菜式當中，刺身定食、魚生飯固然係主要選擇，亦有其他日式丼飯可擇。而每一份都配有麵豉湯及脆炸秋葵作前菜，秋葵經輕輕油炸，表皮略有鬆脆，只係秋葵本身並非黏粉之物，炸粉基本上只係一件外衣，同秋葵有啲格格不入，不過慶幸秋葵係入口清爽，適合作前菜。至於麵豉湯，不單內含海帶，每碗亦有一粒蜆肉，令麵豉湯加添啖啖天然鹹味。
雜錦魚生丼$60 內有兩片三文魚、兩片帶子、兩片劍魚腩、芥辣魷魚、黃金魷魚，份量適中，魚生厚度恰好，唔會太薄，魚類特別出色，有魚油香，三文魚亦似腩位，魷魚亦爽口，而飯量唔算多， 就食完魚生就食完飯嘅份量。而Wasabi份量好似好少，但食落感覺唔簡單，嗰種香味唔似普通Wasabi，似山葵蘑成泥，甚新鮮。
而滑蛋雞肉丼$40 更加係最抵食嘅選擇，呢個價錢有一份套餐，等同港式兩餸飯，都算係窮人恩物，重想點？雞肉、滑蛋、洋蔥皆融為一體，雞肉軟腍，蛋液黏稠，加上啖啖洋蔥香，飯粒微黏，軟硬適中，飯粒無散開。
「兩隻嘢露吓營」是「E.A.Two 兩個人醫吓肚」的一個活動，以步行及搭車方式走勻全港41個官方露營地，記錄所有露營地資訊。
E.A.Tips :
❷ 堂食無加一服務費，外賣更無加$2外賣費。
❸ 外賣質素並不輸堂食。
❹ 店內只收現金。
佐禾町居食屋
太子荔枝角道104號地舖
星期一12:00 – 15:00；
星期二至日12:00 – 22:00
2811 3911
