全港3間分店！油麻地樓上泰國菜用App買外賣享9折優惠芒果糯米飯宛如當地水準

講到香港本土人氣泰國菜，「泰COOL」都可算係數一數二受歡迎嘅泰式食店，編輯好早期幫襯嘅將軍澳店已經結業，現時只係淨低鰂魚涌、觀塘、油麻地3個地區設有分店，今年油麻地分店更一度因為疫情而暫停營業，而目前已復業，更可使用外賣App選擇外賣自取，獲得折扣優惠，想拍拖兩個人買外賣平過堂食，其實唔難！

事實上，外賣相對堂食有較多好處，至少唔會有限時用餐，加上現時叫外賣都好方便，用App點選外賣自取，更可享折扣優惠，以一款菜式嚟計，外賣享有9折優惠，等同平幾蚊，如果買幾款菜式，已經平至少$10。

「泰COOL」係本土著名泰國菜餐廳，泰國菜式、燒烤小食固然應有盡有，比如係青咖喱燒春雞、泰皇咖喱軟殻蟹配巨型麵包、海南雞飯、炒金邊粉、生菜包等，而冬蔭公亦係去泰國一定試嘅菜式，呢間小店可以揀淨冬蔭公，亦可以選擇冬蔭公湯河$78，再揀選海鮮或海南雞、河粉或金邊粉。

一碗海鮮份量都算充足，內有兩隻大蝦、兩隻青口，亦有魷魚、小蕃茄、芫荽等，芽菜、秀珍菇更為海量，蝦肉鮮甜彈牙，青口亦爽口。只不過相對將軍澳店，似乎有所退步，冬蔭公辣味不足，基本上係無辣味，亦無香茅、青檸味，香料味亦較少，就只有微微酸甜味，飲落大部份都係椰奶味，椰香味十足，但就缺少冬蔭公神韻。又或者，可能賣椰香味嘅咖喱係比冬蔭公湯出色都唔奇。

海南雞飯$78 係另一款受歡迎嘅菜式，都算不過不失，就比上不足、比下有餘嘅狀態，雞肉唔算嫩滑同厚身，但就唔嚡口，油飯略有油香，整體味道稍淡，好處係唔油膩，要求唔高嘅話其實可以接受。只不過如果要食海南雞飯，編輯會寧願行遠少少去大角嘴買，皆因該區好多間海南雞飯都好出色。

點解講到好似無嘢好食？其實，編輯從來覺得一間食店唔會無嘢可取，亦唔會係完美，只係關乎揀選嘅菜式正唔正確，一次覺得唔好，可能只係揀錯菜式，除非揀好多次都錯，食晒全部都係差，先會叫做差。

而小店內嘅芒果糯米飯$58，就係幾高水平嘅菜式，夏天芒果當造，特別香甜，並無酸味，果肉夠香，黑白糯米都夠煙韌，啖啖有咬口，灑上花生碎令糯米飯更有層次，味道僅為微甜，如果要嚴格啲講就係椰汁淋得唔夠靚。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 油麻地分店位於Le Chateau，同CASA HOTEL DELUXE酒店為同一幢樓，只需乘搭電梯上1樓。

❷ 午餐時間11:30至17:30，亦有下午茶時間。

❸ 堂食用餐限時90分鐘。

❹ 無另加外賣錢。

❺ 用拎得APP選外賣自取會平啲。

❻ 將軍澳翩匯坊分店已結業，見前只有3間分店，地址為觀塘鴻圖道48號新榮大廈1樓、油麻地彌敦道483-485A號Le Chateau1樓、鰂魚涌英皇道1001號10樓1號舖。

❼ 店內目前無卡機，需要俾Cash。