大角嘴迷你威尼斯西餐廳Risotto出色中西合璧加臘味賣Fusion？

大角嘴係一個隱藏小區，真小店眾多，美食應有盡有，當中一個商場就雲集多間食店，每間都係值得拍拖兩個人一試再試嘅餐廳。當你以為呢啲商場微舖唔會有西餐廳嘅時候，編輯又可以話你知，商場側小街道都有一間隱藏版西餐廳，價錢等同一份現時香港麥記快餐嘅水平，但同等價錢就已經可以享用一份西餐。

威尼斯係一個意大利東北部城市，威尼斯城位於威尼斯潟湖淺灘，主要嘅食物即係意大利料理，小店以威尼斯命名嘅小餐廳，門口放有風景畫，一望而知係賣意大利料理。的而且確，Menu內至少有7至8款意大利麵條、意大利飯、牛扒、羊架可擇，原來小店係由一對年輕情侶默默經營。

每人每款都會配上香草蜆肉忌廉湯，忌廉湯呈純白色，加添香草點綴，忌廉湯內有幾粒蜆肉，湯底滑溜偏稠身，貌似手打兼自行調味，有濃厚奶油味，鹹中有甜，入口至少唔係漿糊狀。

編輯認為Menu上比較特別嘅款式有兩種，其中一款係胡椒鴨墨汁意大利飯$66，鴨肉係典型包裝鴨胸肉，表面有胡椒粒，係有啲失望嘅。Risotto比較驚喜，墨汁配上意大利飯，色調濃黑，只係墨魚味唔太重，飯粒黏身，質感煙韌，並非好硬身，意大利飯中央有粒粒菇菌、洋蔥粒，似乎菇菌係偽墨魚狀，只係意大利飯食到尾段會覺得好滯。