小西灣離柴灣有一小段距離，恍如自成一角，但區內食店唔多，就只有寥寥幾間，除咗西式嘅日常小館之外，重有一間家庭式嘅港式小食店，可以拍拖兩個人到海旁角落自製一個港式下午茶，當中雞蛋仔、格仔餅水準不俗。
位於富景商場入口旁邊嘅家之味小食店，以港式小食為主，店面殘舊，門口車仔嘅招牌飯餐字跡與圖片都已經褪色，連頂頭嘅賣點雞翼都無得賣，現時可見只有幾款小食，例如魚蛋、燒賣$7/5粒、腸粉$9/4條、粉果$9/2隻，價錢上適合學生哥，上述都算係不過不失嘅小食，肚餓會食，但唔會專登搵嚟食。另外，一端亦有撈麵、三文治，細心啲會見到以前原來有款叫魚翅撈麵$25，只係已經被劃去，咁而家到底有乜係好食？
要步行至小西灣海濱公園，相信識得去龍躍徑、黑角頭燈塔嘅讀者一定唔陌生，小公園唔等同海濱長廊，只有一個小角落，一端正對海面，可眺望將軍澳工業邨、東龍島、鯉魚門三家村。
海旁的確比較寧靜，令人心曠神怡，但若然想搵位野餐嘅話，海旁附近有一個小涼亭，不過通常都會係阿伯專用，或者放棄海景，稍移玉步到遊樂場一端，正對藍灣半島，嗰邊座椅會比較少人坐，亦更方便大家之後嘅行程。
當中，要選比較出色嘅小食，一定係雞蛋仔$15、夾餅$15，兩者都係本地傳統嘅街頭小食，尤其雞蛋仔可追塑至50年代，最初只係雜貨舖將有裂痕嘅雞蛋自行與麵粉、牛油混合，形成蛋漿，再放入模具，烘焗後就變成粒粒雞蛋仔，雞蛋仔同夾餅分別在於夾餅內有餡料，含有牛奶、煉奶、砂糖、花生醬。夾餅即係格仔餅，只係以一個圓形模具印出一個個格仔，並分成四份，一般格仔餅除咗有麵粉、雞蛋，都會混合淡奶、砂糖，而小店竟然寫明加入牛奶，而非淡奶，到底有咩分別？
格仔餅烤成金黃色，上手時已經對摺成兩個半圓形，並放於小紙袋內，砂糖、煉奶、花生醬夾於中間，一啖入口，格仔餅好鬆軟，麵糊略帶微甜，確實有少少奶香味。而砂糖、花生醬、煉奶份量唔算多，故此唔會太甜膩。
而雞蛋仔烘烤過後，同樣呈金黃色，只不過分別在於呈現蜂巢狀，頂端有塗抹適量牛油，對摺放於小紙袋內。一粒粒雞蛋仔搣開放入口，外脆內軟，表皮香脆，而內裏又有小蛋糕嘅柔軟，細心啲會發現雞蛋仔內一半中空，另一半紮實而有飽滿感，包含軟綿蛋漿，充滿雞蛋香味，令雞蛋仔內唔會太空虛，都算係街坊價錢而做出水準嘅，每一份都係新鮮烘出嚟，唔會預先整好。
「兩隻嘢露吓營」是「E.A.Two 兩個人醫吓肚」的一個活動，以步行及搭車方式走勻全港41個官方露營地，記錄所有露營地資訊。
E.A.Tips :
❷ 套餐雙併$23，可以配熱奶茶或咖啡。
❸ 小公園為寵物共享公園。
❹ 唔少人會跨過圍欄走出去亂石邊，我哋就唔建議啦。
家之味
柴灣小西灣道18號富景商場地下12號舖
小西灣海濱花園
小西灣小西灣道28號