天水圍天一商場2間罕見堂食店！Cafe抵食下午茶+港式焗豬扒飯完勝連鎖店

若然拍拖兩個人前往天水圍，有咩好食呢？對於天水圍良心小店美食，大多數人只會諗到新北江商場，內裏蹤橫交錯，非區內人隨時會盪失路，但商場內的確有唔少平價食店，有如葵涌廣場或旺角中心，但就唔係間間都有座位同坐得舒服。天水圍區內其實重有另一個叫天一商場嘅地方，距離濕地公園不遠，商場內有2間小型咖啡店，有啲港式拼西式嘅感覺，店內嘅焗飯、下午茶水準不俗。

事實上，編輯本身想前往商場內嘅Bello Dining嘅Cafe，結果走錯路行咗去呢間叫Bello Food Stop嘅地方，原來去錯餐廳，幸好一查之下發現舊店叫牛風，只係以新面目見人。事實上，兩間其實係同一間食店，行多兩步，距過齊柏林熱狗店，就會見到一間Cafe。

Bello Foodstop

位於天一商場內嘅Bello Food Stop，同Bello Dining選擇相近，都係以Cafe模式經營，並以意粉、焗飯為主，都有港式下午茶，如多士、炸雞薯條等。

每份意粉都有如連鎖店嘅焗豬扒飯，就先挑選蕃茄忌廉汁豬扒焗意粉$54，驟眼睇的確似鮮茄焗豬扒飯，但質素就好得多。芝士平舖意粉表面，烤焗後好香口，配合蕃茄酸甜味，意粉亦爽滑彈牙，唔係一餅嘢或太淋。醬汁係茄醬同忌廉混合體，但又出奇地唔會食到膩。

另一款係松露白汁魚柳焗長通粉$58，白汁同樣平舖長通粉之上，醬汁亦唔會好膩，魚柳軟嫩，開頭以為無松露，原來松露放置意粉之間，要摷到落底先會發現松露蹤影。長通粉同意粉一樣爽滑彈牙，好掛汁，松露咁放置好似被長通粉包圍住，亦滲透其中，令長通粉更香，唔會浪費咗松露。

Bello Dining

原來上述Bello Foodstop同隔兩個舖位嘅Bello’s Dining係同一間嚟，難怪名稱咁相似。相對於前者以焗飯為主打，後者就更加似一間Cafe，因為係以意粉、西式美食為主，除咗焗飯，亦有Pizza等選擇。

於天水圍一帶嚟講，的確係比較少既係堂食，而又平民價嘅餐廳。講到該區最出名嘅食肆，通常一定會數新北江商場，只不過商場同葵涌廣場、旺角中心等無太大分別，都係立食或環境參差。而天一商場內，兩間小店都能夠舒舒服服用餐，而2017年先開幕嘅Bello’s Dining比較光猛，就坐得更Chill。

以下午茶Tea Set為例，當中有迷你卡邦尼意粉+牛角包$40，睇埋平昤午餐、晚餐價，可以稱得上平民化有水準嘅西餐。店內其實有多款意粉可擇，例如青醬雜菌、鮮茄龍脷柳等，當然Cafe唔少得嘅一定係卡邦尼意粉。意粉有濃稠芝士醬，醬汁濃厚，意粉黏滿芝士汁，好香口，麵條亦順滑，軟硬適中。雖然唔大碗，但好快就有飽肚感。而牛角包亦經過烘烤，上枱微暖，特別有酥香。

下午茶亦有意式烤雞焗軟包$46，有如熱狗包，內裏包裹住意式烤雞，雞肉軟嫩，調味頗輕，相牛角包較Light。至於玫瑰蜜糖雞翼5隻$42，雞翼經烤焗後，被淋上蜜糖，再灑上玫瑰花瓣，但只係點綴作用，基本上係無玫瑰味，因為蜜糖味較重。飲品可配可樂$0等汽水，亦有同樣$0嘅蜜桃紅茶等冰茶，而加$14可點薄荷朱古力等特飲，甜度同味道都不過不失。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受現金或八達通。

❷ Bello Foodstop午餐時間為12:00至18:00、下午茶時間為14:00至18:00。飲品有咖啡或茶、亦可揀柚子蜜，其他有包裝飲品、汽水。

❸ Bello Dining用餐時間限時1小時，20分鐘前會截單，店方提醒唔好浪費食物，食唔晒要叫少飯少麵。午餐時間為18:00前，下午茶時間為14:00至18:00，晚餐時間為18:00後。套餐可加餐飲、蛋糕，需睇價錢，部份加$10至$14。

❹ Bello Dining另有到會可以選擇。