露營地終重開!2022直擊人氣插針營地灣仔南 海下灣步行進入VS黃石碼頭搭船?

由2020年3月28日下晝6時起,漁護署以疫情為由將郊野公園露營地點封易,直到近日2022年11月17日終於重開,粗略數數屹今已經連續關閉835日,期間喺非政府露營場露營而被檢控嘅人不計其數,今日終於可以拍拖兩個人合法地去露營啦!今次編輯就於首個禮拜五六日直擊出名插針嘅人氣露營地西貢灣仔南,環境係如何呢?

秋高氣爽是露營季節,漁護署終於10月27日宣佈11月3日會開放返郊野公園,當時42個政府露營場仍然封閉,直到11月17日才正式重開。正式露營場重開後首個禮拜係咩狀況呢?所謂愈危險嘅地方愈安全,編輯於重開後首個前往嘅露營場就係西貢灣仔南,因為灣仔南出名在於被插針。

此灣仔不同彼灣仔,灣仔南並非處於港島區,而係位於西貢一帶嘅灣仔半島南部,屬於西貢西郊野公園灣仔擴建部分,當中灣仔南與灣仔西都係著名嘅露營地,通常初次體驗露營嘅人都會前往灣仔南。灣仔半島嘅歷史其實可追塑至80年代,最初其實係採泥區,表層泥土曾被用作興建馬鞍山新市鎮及大埔工業邨工程用途。要前往灣仔南,可以經陸路進入,亦可以從水路登岸,今次編輯從兩條路線出發,話你知水路定陸路較優勝。

相信最為人熟悉嘅路線一定係由黃石碼頭乘搭街渡前往灣仔南營地,只要於鑽石山乘搭一程約1小時嘅巴士路線,抵達黃石碼頭後,黃石巴士總站一端可見黃石營地及燒烤場,只要於黃石碼頭再轉乘街渡或快艇,大概20分鐘就會抵達灣仔南營地。

而另一條路線就係經陸路前往,由西貢出發,乘搭一程小巴路線,30分鐘即直抵海下村,於海下灣海岸公園一帶出發,經過士多後活小徑前行,依循山路走約30分鐘,從海下自然教育徑走過大灘郊遊徑,就可以到達灣仔南營地。由海下灣前往灣仔南山路雖然並非難行,甚至有樹蔭,但亦非完全平坦,有少量上落,所以若攜同車仔就不宜步行。

前往灣仔南營地前,已經預計到場地會有大量營友,帳篷、天幕隨時佈滿營地,甚至需要「插針」紮營。而原來首兩天人流並唔算多,只係未必有海景位。營地中間草皮非常碧綠,相信只有初段可以見到青翠草綠色嘅灣仔南營地,過多一排應該變得光禿禿模樣,大概係因為營地被封閉幾年,有足夠時間養草。

平日前往灣仔南營地,下晝時間相當舒服,既能觀賞海景,而且人聲不多,日落、晚霞景緻皆非常優美。夜晚亦少有光害,可以觀星,夜晚其他營友於12點已經關燈就寢,晚間喺點點繁星點綴之下,環境非常清靜,睡眠質素提高。

而到咗星期六日周末假期,人流一瞬間增多,左右兩邊開始被瘋狂插針,情況一早預料到。日光時份人聲鼎沸,連浴室都開始變髒,夜晚時份一個又一個帳幕上嘅波波燈一顆顆亮起,非常光亮,閃爍得連天上星星都幾乎難以睇清,凌晨都仍有聲音,場面如同Party Night。

灣仔南營地毗連大海景,靠近大灘海,可於空曠營地觀賞無敵海景,風光如畫,可以眺望塔門及高流灣等地方,營地可令人放鬆兼親親大自然。

西貢灣仔一帶既有灣仔南營地,亦有灣仔西營地,前者最大優點係擁有無敵海景,能吹吹海風;而後者位處灣仔半島西部,相對靠近海下灣海岸公園,並非正對大海景,但就可眺整個海下灣,而且比灣仔南營地面積較大,同樣擁有偌大草地,人群未必如前者多,如果嫌灣仔南多人,自問又屬新手,可以前往灣仔西營地。

灣仔南海邊正對南風灣,從營地一端近浴室位置,可以搵到一個小山路入口。從浴室位置起步,可以前往南風角,繼續前行則可到達望樓仔、三抱石,返回灣仔西營地。此路線為行山路線,雖然10分鐘可以到達南風角,但繼續前往山頂位置則需要30分鐘,先可以抵達望樓仔。

露營記得不忘要支持良心店,今次為傳統港式餅店生隆餅家。

編輯露營花絮﹕

E.A.Tips :

❶ 若星期六、日或公眾假期前往灣仔南,可以於西貢巴士總站乘搭巴士路線94號或於鑽石山巴士總站乘搭巴士路線96R號,都可以於黃石碼頭落車。於黃石碼頭轉乘街渡就可以前往灣仔半島營地。

❷ 若星期一至五前往灣仔南,可於西貢巴士總站乘搭小巴路線7號,直達海下村總站落車。由海下村起步,依循大灘郊遊徑走,大概30至45分鐘步程就可以抵達營地。

❸ 灣仔南營地設施充足,包括有 涼亭、燒烤爐同檯櫈,更有大型浴室及洗手間,以及水喉用作洗滌,適合想露營又需要沖涼嘅營友。

❹ 露營前要做足準備功夫,帶備適量營具及糧水。

❺ 謹記減少浪費,減少廚餘,減少過度屯裝嘅食物。

❻ 倒水請前往洗滌盆,勿將有油嘅污水倒於草地上。

❼ 營地都算係有專人打理,所以都勉強可將垃圾棄置垃圾桶內,但最好都係減少垃圾,帶乜嚟帶乜走。

❶ 生火時要不留痕跡。

❷ 唔好於營地內吸煙,以免煙頭引起山火。

❸ 營地可能會有牛牛或野豬,謹記唔好挑釁或餵食。

❹ 夜晚11點後請將音量收細。

❺ 營地溫差較大,日光時可能會較熱,但晚間時份會瞬間轉涼,需要注意保暖。

❻ 最好唔好使用射燈或波波燈等有光害之物。

❼ 收好個人物品,唔好將垃圾隨處亂放。

❼ 街渡人均$18,而快艇來往黃石碼頭至灣仔南則為$30。街渡好唔好要睇停泊位置而定,如果船頭上船,拎住大量營具會比坐快艇更危險,因為船側係極狹窄,而且容易跌落船,倒不如坐快艇;而若上船位置係側邊,則相對安全。
EATWO
Miss A

灣仔南營地

西貢西郊野公園(灣仔擴建部份)
24hours