【台北景點】西門町打卡熱點彩虹斑馬綫紅樓文化交流之地、隱藏景點西本願寺鐘樓

台北西門町係年輕人經常到訪嘅地方，有如韓國明洞、東京原宿或涉谷，當中結合各地流行文化，包括日韓各類文化，多幢商廈店舖都以街頭流行文化為主打，而西門紅樓更不時有創意市集、表演。講到拍拖兩個人必到嘅西門町打卡位，必定要數瞬間為IG爆紅影相位嘅彩虹斑馬線，而另一個躲藏西門町一角嘅影相位為一座獨有鐘樓？

西門町嘅範圍其實好廣，由成麵路、西門里，到峨眉街、康定路，以至內江街、中華路，都係西門町嘅範圍，整個空間都有獨特魅力，就係年青人嘅活力。知名嘅西門町建築物有好多，例如獅子林商業大樓、萬年商業大樓、新世界大樓、西門新宿等。而西門町一帶，更有多道特色街道，包括有美國街、紋身街、川菜街等。

西門町景點﹕彩虹斑馬線

位於捷運站出口嘅斑馬線，瞬間秒變IG網紅打卡地，都係因為地面髹成六色彩虹。呢道六色彩虹馬路被稱為西門町「彩虹斑馬線」，又叫做「6號彩虹 / Rainbow Six」，斑馬線上更有大大隻字寫有「Taipei」，當地人同觀光客都被「彩虹斑馬線」吸引！

西門町一般容納唔同地方嘅文化，包括青少年流行文化，以及日韓流行文化，例如係K-pop流行舞蹈，以至港式美食同港式文化等。無論係餐廳、電影定服飾，都係世界大同，至於「彩虹斑馬線」又有咩特別意思呢？

事實上，「彩虹斑馬線」係有獨特意思，台灣於2019年成為亞洲首個同志合法結婚嘅國家，所以台北市有關當局就於同年9月下旬劃出一道「彩虹斑馬線」。呢道「彩虹斑馬線」既象徵LGBT，亦係代表尊重人權、提倡性別平等、平權進步，體現多元、友善方面，靠各方積極努力先可劃出一道彩虹。由於交通便捷，出站即見到，近年西門町「彩虹斑馬線」嘅「彩虹之美」秒變打卡熱點。

西門町景點﹕西門紅樓

另一個傳統知名景點係「西門紅樓」，特別之處係「紅樓」對出嘅「紅樓廣場」，不單經常舉行創意市集，售賣各類文創產品，支持原創者，而且不時有各地團體表演。夜晚時份，「紅樓廣場」更為熱鬧，皆因「紅樓」一帶有多間酒吧，同志平權後更多咗同志酒吧，更蛻變台北夜生活重要地標，連附近「二二八和平公園」都慢慢演變成同志聚集嘅公園，可見台北文化嘅愈見開放。

據悉，樓高2層嘅「西門紅樓」於1908年建成，早就被列為三級古蹟建築物，外觀上為紅磚舖砌而成，採用西方建築設計，基本上呈十字型加八角，由八角樓、十字樓合二為一﹐設計來自日本人近藤十郎。「紅樓」目前既係演藝場地、文創場地，亦係室內市集，屬藝文空間，同時係購買手信嘅地方，用途廣泛。