【台北景點】神秘迪化街十連棟！走大稻埕碼頭前必訪地衣荒物／日式雪糕屋／醫館古蹟

迪化街、大稻埕碼頭一帶都係台北自由行旅客熱門嘅旅遊勝地，當地人喜愛前往「年貨大街」行逛，旅客又鍾意到日式雪糕屋打卡，碼頭市集更加係拍拖兩個人浪漫賞景地，編輯反而鍾意比較少人前往而又古色古香嘅「迪化街十連棟」，走過「十連棟」有如穿越時空！

迪化街十連棟

「大稻埕碼頭」附近嘅「迪化街」向來都係受歡迎嘅台北景點，但編輯比較推介隱藏於「迪化街」一隅嘅「迪化街十連棟」。同樣位於「迪化街」上，但就靠近盡頭位置，白色築建築背後躲藏意想不到嘅一整排建築物，而且全部都係採用巴洛克式建築設計。

毗鄰「台北橋」嘅「迪化街十連棟」，由外到內古色古香，復古味濃厚。據了解，由迪化街1段348至366雙號連續十棟建築物，都係百年老宅改建而成，於逐漸商業化嘅新簇簇「迪化街」上，竟然出現如此獨特建築物！

「迪化街十連棟」目前依舊為相連門號，而連綿不絕嘅紅磚門廊都獲得完整保留，穿梭其中有如穿越時空！其實，該十棟建築物係來自6大商號家族，包括有5間碾米廠及1間縫衣間。現時，「十連棟」有唔少小店進駐，包含有各文創商店、餐廳等。

十棟相連建築物同樣樓高2層，有超過百年歷史，其中「立面騎樓」亦經過整修後獲得保留。雖然「迪化街十連棟」帶有幾分滄桑感，但獨特嘅磚瓦以至燈籠，都有一番簇新大廈難以取代嘅懷舊味。

迪化街

「迪化街」鄰近「延三夜市」，想要醫吓肚嘅話，不妨到夜市搵食，其中「賣麵炎仔」係當地人喜愛嘅小店，亦係《米芝蓮指南》推薦食肆。不過，要注意小店只係做早上生意，由07:00做到14:30，始後就會關門，想要朝聖就要早啲起身啦！

而「迪化街」一帶有無數古蹟建築物，都係打卡必到嘅地方，比如係「仁安醫院」就係當中重要醫館古蹟。而擁有華麗外表嘅「大稻埕Starbucks」，亦採用巴洛克風格設計，室外有紅磚瓦，室內亦有古典旋轉樓梯，一杯咖啡都可以同時感受復古與奢華並存感覺。至於「屈臣氏大藥房」，亦係「迪化街」上被台北市文化局列為古蹟嘅建築物。

講到最受相機鏡頭歡迎嘅打卡地，應該係「昭和浪漫洗濯屋霜淇淋專売店」呢間日式雪糕店。室內外由招牌到容蓋裝飾，以至日系海報，都完全呈現日本昭和時代感覺，復古味濃。小店只於12:30至18:00開放營業，要買冰品就要睇準時間啦！

事實上，「迪化街」一直被當地人稱為「年貨大街」，因為每逢過時過節，台灣人都會去「迪化街」辦年貨，尤其係「歸綏街」至「迪化街」一帶，糖果、餅乾等乾貨一步到位。當中包括有大量年貨店、紡織店、布料行、乾貨店、中藥材店、茶葉店等，而「霞海城隍廟」更加係重要地標。「迪化街」範圍比較曲折，由南京西路至延平北路四段都可以稱為「迪化街」，亦係「大稻埕」重要商圈。