【台北近郊景點】平溪支線鐵道一日遊！走訪猴硐貓村／十分天燈／平溪老街／菁桐煤礦地打卡｜附交通路線及票價

台北近郊路線以「平溪線」最為人熟悉，臺鐵方面亦特別設有該鐵路支線，拍拖兩個人走過此近郊路線都好方便，只要購買「一日票」，就可以於一日內走訪多個車站打卡景點，9個站到底於邊幾個站停留好呢？

由「台北車站」乘搭台鐵至「瑞芳站」後，轉乘鐵路支線「平溪線」，即可以走訪9個近郊鐵路景點，除咗著名嘅「十分站」，其實重有其他有趣及值得一遊嘅地方。不過，編輯於一日內只勉強夠時間走訪其中4個車站。

「平溪支線」其實係火車鐵道，曾經遭受廢棄，後來台鐵將深澳線同平溪線合拼，變成台北近郊遊覽重要交通工具。乘搭「平溪支線」，穿梭八斗子至菁桐一帶，可感受當年為運煤而興建嘅火車路，亦可走訪多個知名景點，遊覽鐵道小鎮。大多數路段都有急彎、斜坡，所以搭火車比踩單車方便而安全，即睇火車鐵道之旅！

「平溪線」路線﹕瑞芳站→侯硐站→三貂嶺站→大華站→十分站→望古站→嶺腳站→平溪站→菁桐站

侯硐站

第一站為「侯硐站」，距離「瑞芳站」不遠，最大特色係有大量可愛小貓咪，每個角落都遍佈小貓一個「貓村」連CNN都將「侯硐貓村」列為6大「世界賞貓景點」之一！話明係「侯硐貓村」，固然係人貓共融，當中以「侯硐貓橋」、「侯硐」為主要景點，亦係山中煤鄉內嘅打卡位。另外，「猴硐坑礦業休閒園區」、教育正確養貓觀念嘅「猴硐貓咪資訊站」、展現煤礦歷史嘅「猴硐煤礦博物園區」都為必去景點，各位貓奴絕對不能錯過主子聚集之地！

十分站

而下一站為最高人氣嘅知名景點「十分站」，最特別係於火車門前經過，可以於火車路軌旁邊逛逛街。無論係「十分老街」、原先運送煤礦嘅「靜安吊橋」，可欣賞溪谷風光，抑或係「十分車站」，甚至遠啲被稱為台灣版「尼瓜拉瓜瀑布」嘅大自然景點「十分瀑布」，感受山城氣息，都係必去景點。好多人更會入鄉隨俗，於老街火車路軌上「放天燈」許願，為前往「十分站」嘅指定動作，據說於此處「放天」會得到幸福呢！

平溪站

「放天燈」並非「十分站」嘅專利，其實「平溪站」火車路軌上嘅「平溪老街」同樣係「放天燈」嘅好地方，如果唔想同人逼於「十分站」放天燈，不妨到「平溪站」先至放天燈許願。另外，車站出嚟就係一道老街，當中既有全台最老郵筒，亦可於老街抬頭更可望平溪支線鐵軌。「平溪老街」上更有唔少古早味小吃、阿嬤時代嘅柑仔店，甚至係各式雜貨店、五金店，漫遊其中可感受以往礦工日常及濃濃懷舊感，週遭都係古樸氛圍。如果想走到較少遊客嘅地方，不妨試吓前往日治防空洞，屬平溪一帶神秘景點，原先作用係讓數以百個居民躲避二戰空襲情況，位置近觀音巖。

菁桐站

「平溪線」本身就係為開採礦坑煤礦而興建，路線全長有12.9千米，列車屬區間車，「菁桐站」為支線一端總站。「菁桐站」係比較多同礦坑煤礦有關嘅景點，古色古香。當中，包括懷舊味極濃厚嘅日式木造老車站，以及「菁桐電子天燈館」，甚至山坡中嘅「煤礦紀念公園」。「菁桐站」最為人熟悉嘅地方係電影《那些年，我們一起追的女孩》中，男主角向女主角告白嘅畫面，該日式木造車站亦係現時平溪支線唯一木造車站，旁邊更掛滿許願竹筒，打卡必到！

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

平溪線交通方式及票價

E.A.Tips :

❶ 於捷運「台北車站」轉乘台鐵，至「瑞芳火車站」，車費約TWD350／人。注意列車分幾種，包括復興號、莒光號、自強號，其中自強號列車車程較快，約30至40分鐘就會到達，復興號為區間車，車程約48分鐘，最重要係事前一定要先睇列車時間表。

❷ 乘搭「平溪線」可到達瑞芳站、侯硐站、三貂嶺站、大華站、十分站、望古站、嶺腳站、平溪站、菁桐站，如果係全日只玩「平溪線」幾個站，建議直接購買「一日券」TWD80／人。