元朗巷弄牛肉麵獨特食法沾麵式台灣麵食到底湯汁不淨

元朗國市中心美食眾多，人氣小店亦特別多，單單台灣菜就伸出手指都未數得完。而區內一道後巷內隱藏幾間小店，其中有一間以台式牛肉麵為主嘅香港人小店，無論湯麵、拌麵都有意想不到嘅水準，麵條出色，湯麵食法更獨特，值得拍拖兩個人試試。

位於元朗合益路後巷嘅「二悅」，似乎係取「二月」諧音。店內以台灣菜為主打，包含多款台灣小食，但招牌作品為台灣牛肉麵及拌麵定食，只要品嚐過，就自然知道係心思之作。

台式牛肉麵係去台灣旅行必食item，但要喺香港做到最傳統嘅紅燒牛肉麵就唔容易。元朗巷弄間嘅小店就似有啲反傳統地提供乾濕兩食，當中二悅紅燒牛腱麵$81，牛肉湯以茶壺盛載，儀式感重，讓客人可以按喜好自己將湯汁淋上麵條之上，亦可以先食乾麵，後嚐湯汁，更可以將湯汁倒於小碗當中，似沾麵方式食用。

不過，上述都係編輯自己估計，因為官方餐牌上只係講將牛湯直接放入麵中成為湯麵。以編輯個人喜好嚟講，比較喜歡第三種方式，將台式牛肉麵變成日式沾麵，先將少量牛肉湯放於小碗內，然後夾上少少麵條，放於湯汁內，將麵條沾上湯汁，即可食用，然後再將淨低嘅牛肉湯汁一飲而盡，就可以同時嚐到濃郁牛骨湯同爽滑麵條。

店內湯汁雖然唔係傳統紅燒牛肉湯有種微辣感，但就係特別以牛骨熬煮而成，加上蔬果等，湯汁帶有鮮甜味，醇厚可口，既有牛骨精華，亦有蔬果香甜味，唔會令人口渴，順滑而唔油膩，令人一啖一啖逐漸飲清光。至於麵條亦屬難得，選用台灣製造純手工曬麵，最大優點係健康非油炸，而麵條亦唔容易折斷，爽滑彈牙，能吸附牛肉湯汁。而牛腱肉亦厚切得難以置信，肉質腍滑而唔黐牙，半筋半肉，膠質豐富，牛味濃郁。