【區區有小店】跨灣大橋直達！將軍澳康城The Lohas 3間僅存食肆點只咖啡／茶飲店有1間冰室只限住客！

將軍澳日出康城原先恍如一個孤島，只有少數巴士路線及地下鐵路可以出入，但早前跨彎大橋正式通行，終於可以拍拖兩個人從將軍澳市中心徒步至康城一帶，今回就講吓康城美食，好多人以為康城無啖好食，其實當中仍然有3間小店，只不過2間為於商場內，而1間就只限住客用餐！

日出康城（LOHAS Park）與商場「The LOHAS 康城」相連，都係屬將軍澳小赤沙一帶，其實地方比市中心嘅PopCorn更大，但「區區有小店」康城篇就只會講3間食肆。

跨彎大橋落成，並於近月正式啟用，一般人可從將軍澳市中心徒步或踩單車來往康城，交通唔再只限車輛或巴士、地下鐵路，較以往必須經環保大道方便。不過，有部份人踩單車出入康城，將單車停泊商場外，卻被無公德心之人將單車籃當垃圾桶，而事實上垃圾桶只係離幾架單車不遠，單單環保大道與跨彎大橋分岔路口就有2個垃圾桶。

Interval

位於商場一角嘅咖啡店「Interval」，於2021年先進駐康城，而其他地區如薄扶林都有少量分店。店內以悠閒風格為主，明顯係典型Cafe設計，不過裝潢上整體就似一間茶餐廳模樣，可見設計真係唔係係人都做到。

店內係寵物友善餐廳，既有室內雅座，亦有戶外陽台座位，菜式包含意式料理、咖啡、酒品、麵包小食等，據悉特別與來自丹麥嘅Coffee Collective合作精品咖啡，似乎名副其實係Coffee Bar。

沙律、意粉、蛋糕、咖啡都係一間香港Cafe常設選項，其中Caffe Latte $45 外賣並無拉花，咖啡豆烘焙味唔重，質感Creamy，咖啡中有啖啖奶香。

迷客夏

另一間同樣位於商場內嘅係香港分店眾多嘅「迷客夏」，來自台灣南部嘅茶飲店，以鮮奶炮製茶飲，甚至公開指唔用奶精等添加劑。當中，招牌作有大甲芋頭鮮奶、珍珠手炒黑糖鮮奶、手感芋圓芋泥鮮奶、牧場鮮奶茶、台灣鮮豆奶等。

珠記冰室

至於最後一間則並非位於商場內，亦唔係一間係人都入得嘅餐廳，因為「珠記冰室」康城分店係位於日出康城領都住宅clubHouse範圍內，所以係只限住客嘅餐廳。對住客嚟講，的確係用餐時少咗閒雜人等，只係一般人前往康城就少咗一間食肆可以選擇。其實有去過將軍澳「日日食美食廣場」嘅讀者，應該會記得「珠記冰室」，而現時就只淨2間分店，其中一間位於康城，而另一間就選址觀塘工廈一帶。