【曼谷交通】遊客必備兔子卡VS一日券！BTS／MRT／機鐵是否全適用？有無需要乘搭Tuk Tuk、Grab？

前往曼谷旅遊之前，當然要預先有所準備，要了解曼谷市區交通方法，拍拖兩個人去逛一逛都會更方便！部份香港人會選擇直截了當乘搭Tuk Tuk、Grab，Call車解決所有問題，但要避免被綁到KK園，安全問題當然唔好搭啦，反正鐵路可以去到九成景點。當中，兔子卡係遊客最常用嘅曼谷交通卡，大家都知道可以用作乘搭BTS，但到底屆時用一日券定直接兔子卡會抵啲呢？MRT又係咪同BTS一樣？機鐵可唔可以用到兔子卡呢？

曼谷交通（1）﹕BTS

以曼谷市內交通嚟講，最常乘搭嘅交通工具一定係BTS，因為來往市中心嘅都係BTS，來往主要景點都係BTS。BTS即係曼谷空鐵，於地鐵路線圖係淺綠色同深綠色，亦即係BTS Sukhumvit Line、BTS Silom Line﹐目前更新增咗一條比較短嘅金色線，即係APM Gold Line。曼谷BTS乘車時間較香港或台灣長，等車時間亦都係較長，只係比MRT已經快少少。至於票價，大多數都係以16泰銖起跳，每搭多一個站就會貴幾泰銖，但去到第八個站就會統一為59泰銖。現時，乘搭BTS可以選擇用Rabbit Card或者購買One-Day Pass。

曼谷交通（2）﹕MRT

另一種最常用嘅交通工具就係MRT，而MRT即係曼谷地鐵，於地鐵路線圖主要以藍色標示，即係MRT Blue Line。現時，已經新增咗幾條地鐵路線，比如係黃色線MRT Yellow Line、紫色線 MRT Purple Line、粉紅色線MRT Pink Line。MRT一般乘車時間同等車時間都係比BTS更長，因為班次通常至少相距5至7分鐘。而MRT嘅票價同樣係由16泰銖起跳，不過就每2至3個站先唔同價，最貴就去到42泰銖。以前，MRT有One-Day Pass可擇，唔需要逐程購票，無記錯每張係120泰銖；但目前MRT已經再無One-Day Pass提供，所以若乘搭MRT，只能夠逐程購票。

曼谷交通（3）﹕ARL／SRT

至於ARL、SRT就係主要來往機場嘅路線，啡色線 ARL Phayathai Line，紅色線就係 SRT Red Line，基本上同MRT差唔多，都係需要另外買飛入閘。

如果係從BKK機場出發，就需乘搭ARL，於「Makkasan站」或總站「Phayathai站」轉車。前者可以經MRT「Asoke」站轉向BTS「Asok站」，機鐵一程係35泰銖；後者則可以直接轉向BTS「Phayathai站」。時間上，後者全程大概係22分鐘，車費則為45至90泰銖，睇你想買特快定普通票。機鐵基本上每班車要等至少10至15分鐘，但時間就比的士或Call「Grab」容易計算，價格化算之集，又一定唔會塞車！

若然係從DMK機場出發，可以搭2個站至「Lak Si站」，轉乘MRT粉紅色線，再搭1個站至「Wat Phra Sri Mahathat」，就可以轉往BTS淺綠色線。又或者從「Lak Si站」搭到總站「Krung Thep Aphiwat Central Terminal Station站」，即「Bang Sue Grand Station」，可以轉往MRT「Bang Sue站」，然後「Chatuchak Park」站，就可以轉后
BTS「Mo Chit站」。今次以目的地「Victory Monument站」計算，經粉紅色線所需時間為9+3+28分鐘，車費為18+21+55泰銖；而經藍色線所需時間則為22+8+10分鐘，而車費就係33+20+40泰銖。邊個抵啲，自己計計啦！

曼谷交通（4）﹕Tuk Tuk

「Tuk Tuk」基本上同「Grab」無異，通常叫「篤篤」或「雙條車」，只係比「Grab」價錢平，大多數都係遊走市區，但佢行嘅路線都係馬路，所以塞車一樣遭殃。以前曾經試過搭「Tuk Tuk」，但其實唔係太安全，行車速度快，但無任何安全設備，隨時會兜路，收費又任佢嗡。如果都係市區玩玩，其實都係搭返鐵路穩陣，唔建議乘搭。

曼谷交通（5）﹕Grab

只需要下載「Grab」App，登記之後就可以直接Call車，呢個係泰國當地人最常使用嘅Call車App。「Grab」就好似香港Uber，都係用App畀錢，預約費用為25至45泰銖，起錶價為35泰銖，每跳一次錶就係2泰銖，以meter計算。不過，曼谷市區塞車情況嚴重，Call車要考慮嘅問題係隨時愈坐愈貴。另外，以前試過搭「Grab」，但因為KK園，而家唔會搭，唔鼓勵搭，雖然市區係比較難綁去邊境。不過，始終係一次乘搭，唔係屢次，如果想要去遠啲嘅景點，建議跟團，join kkday或klook嘅行程，拼團都好過自己Call車，因為佢哋嘅團係屢次，而且會同有牌有經驗嘅公司合作。

Rabbit Card兔子卡 VS One-Day Pass一日券

Rabbit Card即係兔子卡，可以於Klook預先購買，然後到機場兌換實體卡，不過兌換櫃檯位處上機嗰層，需要專登上去；另外都可以去centralwOrld櫃檯取卡。每張卡賣HKD67，換算泰銖即係298Baht左右。One-Day Pass即係一日券，可以於任何BTS站嘅櫃檯服務中心購買，以前係賣140泰銖，但現時每張票售150泰銖，換算港幣即係HKD33左右。

如果全日行程排得密密麻麻，一日搭幾十次BTS，咁One-Day Pass一定係最抵搭；但若然行程上唔係搭多過150泰銖，咁其實Rabbit Card已經夠用。記住呢張票只係計BTS，唔計MRT喎！One-Day Pass亦只限當日使用，一旦過咗凌晨12點就會自動失效。

Rabbit Card係一張儲值卡，一般新卡賣200泰銖，包含有50泰銖按金、50泰銖製作費、100泰銖儲值額，所以可以用嘅其實只係得100泰銖。而經klook購買Rabbit Card，其櫃檯取卡時會同時附上優惠券，每張卡入面係0泰銖，但每張卡都會有200泰銖優惠券，可以自行到BTS櫃檯增值。基本上同香港八達通、台灣悠遊卡、日本西瓜卡一樣，如果餘額已到盡頭，可以到BTS站服務櫃檯或便利店增值，不愔泰文嘅朋友，只要同對方講「Top up the card」就可以啦！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ BTS有一日券，但MRT現時已經無一日券，所以都係需要逐程買飛，或者用rabbit card兔仔卡。

❷ SRT同MRT無異，但SRT同BRT一樣，連兔仔卡都唔用得，來往2個機場都必須逐程買飛。

❸ 只要唔係太遠地方，基本上大部份景點行程BTS、MRT都能夠到達，所以其實唔太需要乘搭Tuk Tuk同Grab，如果想去遠啲嘅地方，寧願跟團，可以上kkday或klook睇吓有無團，因為啲團唔係得一次，而且佢哋會同有牌嘅公司合作。

❹ klook可以買到兔仔卡，但取卡點喺上機嗰層。