旺角上海街活化大廈頂樓天台嚐一汁三菜人氣Cafe最大問題係咩？

旺角人氣Cafe有好多，其中經過活化嘅上海街618號內就有幾間，唔少人都鍾意拍拖兩個人上去Cafe打吓卡。該幢大廈頂樓就有一間環境不俗嘅餐廳，小小空間竟然有3種唔同雅座。菜式上以一汁三菜為主，水平穩定，但最大問題卻出現於飲品上？

以日式家庭料理為主嘅「蟲二Poach」，為旺角區內一間樓上咖啡店，身處旺角知名地標「上海街618」。小店位於經過活化嘅大廈之頂樓，環境舒適，皆因為全層連花園。雖然地方唔大，但就劃分為3個空間，包括日式居室、戶外露天茶座，以及室內雅座。

既然係一間中日家庭料理嘅Cafe，用「一汁三菜」便當作主打，都係比較穩陣嘅選擇。菜式中包含有漬鯖魚，亦有大阪燒風味黑胡椒烤雞塊配牛油野菜$150、清酒醬燒鰻魚$165、烤芝士漢堡扒伴海苔肉鬆$150，厚切漢堡扒質感軟腍，配有芝士、燒汁，算有肉汁，水準正常，鰻魚亦不過不失，而大阪燒作底嘅烤雞肉就相對較有創意。

每一份「一汁三菜」便當都包含開胃前菜、63度慢煮蛋、醬油炊飯，全set更附有一塊小木板教你點食。前菜只係簡單配菜，每份都有一壺高湯，湯汁入口為鰹魚昆布茶高湯。根據指示，可將高湯倒於配菜表面，再於白飯面放入63度慢煮蛋，再將高湯可倒入炊飯中，再同時送入口，令飯粒加添濕潤感同滑溜感，有如茶漬飯。

另外，最近亦有一款小食，名為大信燒嘅十小麻辣花椒豚肉燒薯餅$128。小食以薯仔磨成薯蓉，煎成厚切薯餅，同剛才嘅漢堡扒有如同一個模樣。雖然聲稱十小辣，但辣度只屬微辣，算係老幼咸宜，只係價錢上較高，的確令人卻步。

雖然店內現時有自家製麵包，例如黑啤農夫包，但供應時間就有限制。至於甜品選擇唔多，其中以伯爵茶或桂花麻糬班戟 $108 最受歡迎，甚至可以被稱為人氣之選。方才發現店內大多數食物都以圓形設計，班戟同漢堡扒size差唔多，恍如同一個模製作出嚟。甜品以麻糬作餡料，包裹於傳統班戟內，有如日式糯米糍。頂端再加上一球雲呢嗱雪糕，微暖麻糬與冰冷雪糕口感構成對比。伯爵茶味適中，但麻糬份量較少，而班戟就唔似班戟，蛋糕質感反而似戚風蛋糕。

Drink list中選擇眾多，當中有酒精飲品及無酒精飲品，包含有自家製造酒釀、雞尾酒，亦有伯爵可可等等。不過，一次品嚐多款無酒精飲品，只有一個字總結，就係「伏」！其中有蟲二酒釀桂花啡$65、百里香檸檬梳打$58、櫻花忌廉草莓泡泡啤$65。

蟲二酒釀桂花啡似乎係招牌作，咖啡混合大量桂花，加上以酒釀咖啡，組合雖然新鮮，但甚為奇怪，咖啡帶酸甜，但又唔會平常原始咖啡豆嘅酸味。酒釀咖啡似乎爭少少，桂花配搭咖啡亦唔太配合，而且桂花並唔香。而百里香檸檬梳打齋睇應該好解暑，而且係比較穩陣，但酸爽感一般，未知到底係檸檬定百香果出事，兩者都無咩果香。至於十級中伏嘅必選櫻花忌廉草莓泡泡啤，原以為既能打卡，而且係比較穩陣嘅草莓特飲，點知原來同已經結業、編輯曾經於早期批評過嘅「雪山咖啡館」一樣，半粒草莓都無，取而代之係用果醬沖泡飲品！味道如何？經驗太差，已經唔想再多講！話好飲𠴱啲到底係味覺出現咗咩問題？