明星級庶民大排檔！民聲冰室馳名肉餅山／客家手撕雞內外兼備

對於香港人嚟講，「民聲冰室」早已經係拍拖兩個人眾所週知嘅小店，當中以「肉餅山」最為人熟悉。餐廳一直以來都係一間明星級飯堂，唔少藝人朋友都曾經光顧，而且不時大排長龍。不過，上年一度面臨結業，慶幸今時今日依舊屹立銅鑼灣大坑區。

「民聲冰室」位於大坑浣紗街一角，一度受香港客人歡迎，更一度有外地遊客慕名而至。不過﹐現時竟然不敵鄰近茶檔，食飯時間大量遊客於隔離非本土店拉人龍。至於本土店，則只有寥寥可數嘅食客，當然對於編輯嚟講係好事，因為唔需要等候太長時間，但對小店嚟講就不得而知。始終係小店，食客數目恰好就足夠，太多人亦可能令小店應接不暇。

室內地方不大，只有數張檯櫈，每次只可以同時應付5至6檯客人，客人數目雖然不及附近遊客喜愛到嘅茶檔，但食客數目依然尚算一個接一個，只係並無拉長人龍。「民聲冰室」其實都係一間歷史悠久嘅小店，已經經歷有超過60年光景。不過，該情況或者係一件好事，遊客有遊客食喜愛嘅餐廳食肆，香港人有香港人喜愛去嘅小店，大家河水不犯井水，雙贏。

午市套餐中只有7款可擇，包括鹹蛋蒸肉餅$58、叉燒韭黃炒蛋$58、鮮帶子蒸豆腐$60、客家鹽焗手撕雞$65、金鈎梅菜蒸勝瓜$58、蝦仁韭黃炒蛋$62、蒜蓉豉油豬扒飯$68﹐每份都有白飯一碗﹐恍如套餐一樣，就似食家常便飯。

最受食客歡迎嘅菜式必然係鹹蛋蒸肉餅$58，幾乎無檯都會點選。平常鹹蛋蒸肉餅飯都係呈扁平狀，但「民聲冰室」嘅鹹蛋蒸肉餅就有「肉餅山」之名，出其不意地將鹹蛋蒸肉餅堆疊成一座山！肉餅始終係人手剁先有獨特風味，將新鮮豬肉屠屠疊高先拎去蒸熟，肉感十足，豬肉脂肪比例亦適中，油脂豐腴，但絕不肥膩。

相對於平常嘅蒸肉餅，質感係比較鬆化，並非實淨。鹹蛋圓潤，蛋黃爆油，鹹度適中，鹹蛋香向來已經係伴飯之選，為肉餅增添鹹香。蒸肉餅配搭菜汁、粟粉、糖之餘，亦有秘製甜豉油調味，絕對令人一口又一口白飯往嘴裏送。

而客家鹽焗手撕雞$65亦係另一款受到食客歡迎嘅菜式，與鹹蛋蒸肉餅共通點係同樣堆疊成一座山，就似聖誕節嘅聖誕樹一樣！手撕雞最頂係層層雞肉，而最底層則以雞骨托底，令整棵手撕雞聖誕樹能屹立不倒。雞肉以客家鹽焗方式炮製，最初口感冷冰冰，等多陣先會食到當中味道。雞肉為原雞撕出條條肉絲，雞肉沾有芝麻香，入口嫩滑，有保留鮮味，味道唔會好鹹，不過就似麻油雞多過鹽焗雞。