【台北夜市】南機場點只《米芝蓮》推介山內雞肉！13間隱藏在地人麻油雞／爆漿雞蛋糕／臭豆腐／肉羹麵星級街頭小吃！

台北夜市選擇不少，香港人大多數會去士林夜市、饒河夜市、西門町夜市等，而南機場夜市則為近年受台灣人歡迎嘅夜市之一。該夜市雖然與捷運站有一段距離，但每個攤檔都有一定水準，值得拍拖兩個人專程前往。即使隨便揀一間都唔會中伏，即睇E.A.Two為大家整合嘅13間南機場夜市美食小吃推介！

南機場夜市位於台北中正區，佔地不大，但種類繁多，不止於《米芝蓮指南》星級推介，重有好多在地人嘅排隊店，美食絕對毫不輸蝕其他熱門台北夜市。該夜市可從捷運「小南門站」或「龍山寺站」徒步前往，但就需要約20分鐘步程，當然都可以轉乘的士，5分鐘車程就會到達夜市一帶。

而南機場其實來自於日治時代，本身係日軍軍用機場，年期係松山機場之前，用作飛機上升降。後來演變成台北眷村及住宅，附近就有南機場公寓。其後，再發展成一個在地人喜歡嘅台北南機場夜市，雖則觀光遊客並唔多，但CNN、NHK都曾經有報道過。雖然南機場夜市只係一個台北小型夜市，但地名歷史悠久，美食選擇亦眾多，路面亦寬闊好行，CP值極高！

南機場夜市美食（1）﹕山內雞肉

位於南機場夜市入口旁嘅「山內雞肉」，為夜市中最為人熟悉嘅一個攤檔。「山內雞肉」由2018年起曾經連續5年獲得《台北米芝蓮指南》街頭小吃推薦（台灣叫《臺北米其林指南》），至今依然係人氣十足嘅排隊店，想要避開人流，編輯建議5點至6點必定要到達。

「山內雞肉」主要售賣白切雞，每日即劏即賣，選用台灣溫體雞，一出爐即以冰鎮方式處理。而店內員工開檔後亦全程都斬緊雞，無停過手，據悉即切可以減少肉汁流失。當中，以雞髀飯最受歡迎，其次重有招牌山內雞肉假，雞肉份量頗多，而台灣人鍾意配搭椰菜，即高麗菜TWD40。雞肉飯淋上特製醬油、雞汁，加上當歸清雞湯或桂竹筍湯特別滋味。當中，金針湯、下水湯、桂竹筍湯、香菇湯每碗TWD20。

一份含雞油飯嘅山內雞肉飯TWD110、雞腿飯TWD120，若單買山內雞肉則為TWD100，一碟雞腿肉就賣TWD110。雞肉不僅量多超值，而且雞皮爽彈，肉質嫩滑，啖啖肉不乾柴，調味適中，配搭特製辛辣醬汁特別醒胃，鹹甜有致，絕對係雞肉飯點睛之筆！

南機場夜市美食（2）﹕陳記豬血糕

同一條街道上，夜市小吃不少，其中近分岔路口有間「陳記豬血糕」。小車上只賣豬血糕，以獨家醬汁製作，表面撒下大量花生粉及芫荽，香口又飽肚。據悉，呢間豬血糕店有超過55年歷史，單純賣豬血糕，僅分大與小嘅份量，價格為TWD30至TWD35，而TWD100則可買3支，名副其實古早味。

老闆娘從木盒模樣嘅蒸籠中取出大大支豬血糕，然後於上面摸上海量花生粉及芫荽，據悉每日隨時賣過百支！豬血糕入口煙煙韌韌，滲出芫荽香之餘，亦滿嘴花生香，豬血糕自身帶有啖啖米香，只帶微甜，配搭特製甜辣醬帶有蒜香，特別惹味。

南機場夜市美食（3）﹕橘太郎爆漿雞蛋糕

位於南機場夜市大街上一隅嘅「橘太郎爆漿雞蛋糕」，係南機場夜市必食嘅隱藏小吃，將日式與台式風格混合。該店嘅雞蛋糕受到在地人喜愛，亦曾經受到台灣蘋果日報推薦！平常雞蛋糕都係一袋袋，但呢間嘅雞蛋糕就一盒盒咁賣，食唔晒甚至可以放入雪櫃保存，下次取出再放入焗爐或微波爐翻熱食用，而小店後方則有少量座位可以即時坐低慢慢歉！

雞蛋糕一盒有8件，由TWD60至TWD70不等，一盒可以同時選擇兩款口味。雞蛋糕有至少3款口味可以選擇，包括招牌奶油、芝士、朱古力及藍莓，口味誘人非常。不過，藍莓口味就只有星期三、四限定供應！

每件雞蛋糕上都印有可愛小雞圖案，老闆娘將蛋漿倒入模具內，再加入餡料，模具瞬間散發雞蛋糕香味。雞蛋糕粒粒厚實，大過粒乒乓波，而內裏卻又非常鬆軟，一啖咬落去，餡料馬上洶湧而出，質感滑順，唔會太甜膩，果然係爆漿雞蛋糕！

南機場夜市美食（4）﹕禾甲蒸臭豆腐

臭豆腐係南機場夜市另一款必選嘅小食，而夜市內就有多間售賣臭豆腐嘅小攤檔。其中，「禾甲」為在地人喜愛嘅臭豆腐店。平常食臭豆腐，尤其係港式臭豆腐，都係採用油炸方式，表面臭到飛起，內裏卻香噴噴，惹味無比。而「禾甲」卻選用蒸臭豆腐方式，對香港人來說顯得別樹一格。

蒸臭豆腐同炸臭豆腐分別在於並非油炸，入口亦非酥脆感，反而係有臭豆腐味，卻變成滑溜鬆軟口感。清蒸臭豆腐配有湯汁，可以自由加辣，據悉湯汁重有蕃茄湯可擇。

南機場夜市美食（5）﹕小陳魚翅肉羹

位於橫巷中嘅「小陳魚翅肉羹」，提供肉羹湯、滷肉飯等小吃。該店並非人氣店，亦非遊客店，只係有台灣人向編輯推介該店嘅肉羹麵，更豎起手指公讚賞，故當日決定試一試。

台灣肉羹其實就恍如香港碗仔翅，都係傳統湯羹，同樣係模仿50至60年代人食魚翅，將魚翅貴價食材變成平民小吃。台式肉羹就將香菇加瘦肉變成肉羹，瘦肉、豬肉及魚漿攪勻之後，就變成肉羹，然後加入以柴魚熬煮嘅湯底，令台式肉羹入口有啖啖柴魚清香，一般台灣肉羹都會加入竹筍、香菇、黑木耳、蘿蔔絲等材料。肉羹同碗仔翅一樣，加入烏醋食用會更能夠提味。

一碗滷肉飯只賣TWD30，一碗肉羹湯賣TWD45，而一碗肉羹麵則賣TWD60。肉羹麵嘅麵條就等同陽春麵，肉羹湯上檯熱焫焫，味道偏甜，包含純肉肉羹，麵條與肉均份量十足，肉羹對女士們來說有可能太多，有機會食唔晒。

南機場夜市美食（6）﹕捲捲村花生捲冰淇淋

「捲捲村花生捲冰淇淋」為南機場夜市內其中一間人氣排隊店，加上唔少媒體加持之下，該店更受歡迎。店內以天然手工雪糕為主打，製作上無添加，既有獨家自創嘅tiramisu雪糕，亦有古早味雪糕，味味不少。以餅皮及花生捲起雪糕球，表皮煙韌，內裏實在，食雪糕時會有機會食到花生碎粒口感，層次豐富。不過，編輯非星期一多次去都未有營業，絕對無緣。

南機場夜市美食（7）﹕好佳蚵嗲

而「好佳蚵嗲」則為另一間超人氣小吃店，有幾分似香港人嘅炸蠔。店內已炸物為主，主打固然係蚵嗲，亦有蕃薯片、芹菜捲，亦有甜米糕等。好佳蚵嗲內有大量韭菜、高麗菜、青蔥及蚵仔，表皮金黃酥脆，內裏有鮮嫩蚵仔，重有甘甜蔬菜，最好加上味噌醬一齊食用，入口甜辣。

南機場夜市美食（8）﹕八棟圓仔湯

夜市小吃一般係鹹點為主，亦有少量甜點店，其中「八棟圓仔湯」就係南機場夜市內嘅知名甜點店，甚至獲得台北十大湯圓及台灣網絡票選全台第一名湯圓榮譽。店內以花生湯圓、油釀甜蛋芝麻湯圓最具人氣，可雙拼選擇，湯圓軟糯，入口有濃濃芝麻花生餡料，甜湯溫順香甜，酒釀餡料更溢出紫米穀香。

南機場夜市美食（9）﹕好吃炸雞

另一間南機場夜市人氣小店為「好吃炸雞」，開業已超過10年，顧名思議以炸雞排為主打，特別係無骨鹹酥雞。雖然係排隊店，但炸雞係一早炸定，並非即時蘸上粉炸。價格上，一隻雞翼TWD25，雞腿就TWD55，而一份無骨鹹酥雞則賣TWD40。

南機場夜市美食（10）﹕阿吉豆漿紅茶

而「阿吉豆漿紅茶」位置算近「好佳蚵嗲」，該店比較多係在地人選擇，其中紅茶豆漿每杯僅約TWD25至TWD30﹐將紅茶同豆級融合，清香豆漿與紅茶嘅茶香，為夜市隱藏之物。

南機場夜市美食（11）﹕廣記台南鱔魚麵

「廣記台南鱔魚麵」位於南機場夜市入口後方，至今已營業超過10年，店內以炒鱔魚為主，另布生炒牛肉、羊肉、豬肝等。最特別之處係羊肉湯，與中藥材熬煮，味道濃郁。必吃之選為鱔魚燴麵、飯或米粉，以及生炒鯛魚、當歸羊肉湯等。

南機場夜市美食（12）﹕Q麻吉古早味麻糬

南機場夜市近年有一間IG網紅打卡店，名為「Q麻吉古早味麻糬」，門口不時出現人龍。該店主打古早味麻糬，有時亦有季節限定嘅大福，比如係草莓味及提子味。至於麻糬，傳統款式每份TWD50，一份有6粒，亦算經濟實惠嘅甜點。

南機場夜市美食（13）﹕阿男麻油雞

編輯私心推介嘅南機場夜市美食，為「阿男麻油雞」。原來該店不僅係台灣人喜愛嘅麻油雞店，亦曾連續5年獲得《米芝蓮指南》星級推介街頭小吃。編輯於5點幾到達，當時只係少人龍，但食完出嚟，方才發現該店原來係一間排隊店，回頭率極高！

▲ 入店之前（左）及出店之後（右）。

「阿男麻油雞」顧名思議以麻油雞湯為主打，據悉店內採用溫體雞，高湯亦每日熬煮，為台灣人一款養生雞湯，入口溫和順口，帶有清甜雞湯味，但麻油味及酒香其實無其他地方咁重。如果想要較多酒香味，可以自己於自助櫃自取米酒，再自行添加酒味。

麻油雞腿湯一碗TWD160，但就好快售馨；遲咗就只能試麻油雞塊湯，價格上就較相宜，只係TWD130；另有麻油雞佛湯，賣TWD220，算係最貴嘅一碗。而麻油乾麵線、雞油乾麵線分別賣TWD25及TWD30，麵線上灑有油蔥酥，比較乾身，建議加入麻油湯，會較惹味。

麻油雞湯呈金黃色至淺黃色，麻油味、酒味、薑味適中，入口香醇可口，但雞湯唔會好油膩，不過就愈食愈熱。麻油雞塊雖然唔係全部雞髀部位，但其實都有雞髀，其他係雞背、雞胸、雞翼等部位，一樣啖啖肉。雞肉新鮮，肉質彈牙，而且軟嫩入味，一啖入口滿滿麻油雞湯香氣。麻油雞湯香氣撲鼻，絕對能夠成碗飲晒，學台灣人話齋，補充返元氣呀！

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭捷運站松山新店線至「小南門站」或者板南線至「龍山寺站」，徒步約20分鐘即達。而乘搭台鐵至「萬華站」，徒步約15分鐘亦可抵達。乘搭公車12／204／205／212／212直／212夜／223／249／250／670／671／673／藍29至「南機場公寓站」，徒步2分鐘即達夜市。

❷ 夜市並無休息日，但個別小店有機會有休息日，多數都會揀星期一休息。

❸ 大部份夜市小吃集中於中華路二段307至315巷十字路口之間。

❹