【澳門交通2024】全新MLRT澳門輕軌開通！實測市內4大交通方法、香港人搭車都有半價！｜附澳門通購買方法

澳門係唔少人週末假期快閃觀光嘅目的地，適合即日來回香港。澳門市內有多種交通方法，近月更開通一道全新輕軌路線﹐方便拍拖兩個人遊走路氹城、氹仔至澳門半島。E.A.Two今次就為大家實測及整合4種澳門市內交通方法，原來而家乘搭市內交通工具，連香港人都可享半價優惠，即睇詳情！

澳門市內交通（1）﹕澳門輕軌

澳門輕軌於上年底已經開通，目前最先開通嘅係「氹仔線」，來往「氹仔碼頭站」至「媽閣站」，全長有12.5公里。據悉，之後重會有「石排灣線」、「橫琴線」、「路氹東線」，不過預料2024至2029年先會正式通車。呢條澳門輕軌線同泰國曼谷輕軌線相似，曼谷嘅輕軌列車叫MRT，而澳門輕軌列車則叫MLRT。而澳門輕軌站只有2卡或4卡車，室內外設計都同曼谷輕軌站有幾分相似，同樣係軌道供電，使用架空電纜，無阻景觀，同時通風透光。

目前，氹仔線全線共有12個車站，由氹仔碼頭站一直行駛至媽閣站，貫穿路氹城，來往氹仔至澳門半島。以往只能搭車過海，現時則可以乘搭輕軌過海，可以避免有時搭巴士人多擠逼嘅情況。而首班車於每日朝早06:30會發車，尾班車大概會於每晚平日23:15、假日23:59停駛。澳門輕軌會由「媽閣站」走向「氹仔碼頭站」﹐或由「氹仔碼頭站」走回「媽閣站」。輕軌中途會經過「海洋站」、「運動場站」、「排角站」、「蓮花站」、「馬會站」、「路氹東站」、「路氹西站」等。

如果想跨海去澳門半島方向，需要去「媽閣站」；「媽閣站」附近有媽閣廟、海事博物館、聖雅各伯小堂、媽閣炮台；而「氹仔碼頭站」可直達氹仔客運碼頭；另有「機場站」可以去到澳門國際機場。如果想去官也街或澳門銀河一帶，可以前往「排角站」；若然想去威尼斯人、巴黎人等賭場群，可以搭去「路氹西站」；如果想去倫敦人、美獅美高梅、新濠天地、永利皇宮等，則要前往「路氹東站」；而若去新濠影匯、氹仔馬場，則要去「蓮花口岸站」、「馬會站」。澳門輕軌每班次大概要等候10分鐘，而車程就同平常曼谷MRT或香港鐵路時間相近，都係2分鐘左右車程，唯獨跨海段則需要4分鐘。

澳門輕軌票價人均由MOP6至MOP12，大概每3個站一個票價，換言之每逢乘搭首3個站，票價為MOP6，乘搭6個站則為MOP8，乘搭9個站即為MOP10，而乘搭全程12個站就需要MOP12。不過，現時使用澳門通，乘搭澳門市內交通工具都可享半價優惠，包括澳門輕軌，所以人均車費其實只係MOP3至MOP6，另有輕軌通售賣。如果無澳門通，可以到澳門輕軌嘅售票機購買車票，選定起步點及目的地就得，但就需要畀車費原價。

澳門市內交通（2）﹕澳門巴士

澳門巴士以往一直係市內最常見嘅交通方法，至今依然係澳門主要嘅公共交通工具，多數班次頻密。澳門有兩間巴士公司，合共有約90條巴士線。想要容易啲查看巴士路線，不妨下載「巴士報站」app，又或者開「Google Map」，都可以睇到澳門巴士路線，點對點睇睇當時需要乘搭邊條巴士路線。

車費同澳門輕軌無異，基本上都係劃一收MOP6，大小同價，現時使用澳門通則可享半價優惠，每程只係MOP3，連香港人使用澳門通都可享半價優惠。香港巴士有轉乘優惠，而其實澳門巴士一樣有轉乘優惠，有部份路線上車再落車，然後轉乘其他巴士路線，收費為MOP0！

澳門市內交通（3）﹕澳門的士（「黑的」／「電召」）

如果行程太趕急，澳門的士不失為接駁嘅好辦法。而澳門的士分成兩種，一種係Call車App嘅的士，即「澳門電召」app；另一種係黑色的士，俗稱「黑的」。同香港搭的士一樣，乘客上車後，司機就會直接駕駛至目的地。

所謂「黑的」，唔係香港成日講嘅黑心的士，而係因為的士車身為黑色漆油為主，車頂為奶白色，所以只係黑色的士嘅簡稱。的士一般都可以來往澳門半島、氹仔、路氹城、路環嘅道路，亦可以去澳門國際機場。E.A.Two實試澳門「黑的」，一般等候時間唔算太長，車程係按錶收費，正常澳門上落車係無咩附加費用，係運載行李先會收附加費。

「黑的」基本起錶價為MOP21，其後每220米就會跳錶一次，每跳錶一次就會多MOP2。不過，編輯覺得澳門「黑的」個錶跳得頗快，似乎未夠220米就跳咗1次。以實際情況計算，由倫敦人酒店大門口起步，直到對岸澳門半島倫敦街，車費由MOP21跳錶跳到MOP101。以Google Map計算，車程大概係15分鐘，距離為8.5km。

另加多一個例子，由澳門銀河Galaxy Hotel起步，直到澳門消防博物館，由MOP21跳錶跳到MOP83。以Google Map計算，車程約為17分鐘，距離則為8.4km。「黑的」都可以用港幣付款，只不過港幣對澳門幣係1:1，到底抵唔抵搭，大家自己計一計啦！

澳門市內交通（4）﹕酒店發財車

於澳門市內乘搭公共交通工具其實都幾方便，重有一個方法就係免費乘搭嘅酒店「發財車」。由於「發財車」係免費乘搭，所以以往人數頗多，無時無刻都需要排隊乘搭。不過，現時澳門「發財車」似乎乘搭嘅人數少咗，所以有機會有位坐。

澳門酒店穿梭巴士又叫「發財車」，可以來往該酒店同各入境口岸、碼頭同機場，多數「發財車」最早班次都係09:00，最夜班次則為23:00，大概要預計每15分鐘一班車。

以當日從澳門十六浦酒店回程為例，從酒店返回港珠澳大橋澳門口岸，夜晚9點幾竟然無咩人搭車。「發財車」於09:26開車，中途無需停站，竟然於09:39已經抵達澳門口岸，比站站停又無位坐嘅澳門巴士路線101X更快同坐得舒服。

澳門通票價及購買方法

於澳門乘搭輕軌或巴士路線，的確可以畀現金，無論港幣定葡幣都接受作付款方式。不過，更多人會選用「澳門通」、「輕軌通」，當中「澳門通」就係最常見又最抵用嘅澳門交通卡。購買澳門通後，亦可以註冊「MPay」app，用手機連結實體「澳門通」，可以睇到3個月內嘅100條交易記錄，但app就要記名，好似香港嘅「八達通」咁。

最直接購買「澳門通」嘅方法，就係於澳門當地便利店、各大超級市場，或者澳門通客戶服務中心購買，無需記名，每次最多買9張卡，增值上限為MOP300至MOP500。一張普通版「澳門通」售價為MOP130，價錢已經包含MOP30卡費，以及MOP100充值額。不過，要留意澳門口岸最近巴士站嘅7-Eleven便利店係會賣貴啲，一張「澳門通」售MOP140，比正常價貴MOP10。

「澳門通」就好似澳門版「八達通」，可以乘搭巴士、輕軌繳付車資，亦可以於多數食肆、超市等商戶付款，就好似香港人用「八達通」一樣。萬一朋友無「澳門通」，如一張卡俾車費之後，需要等待2分鐘後先可以再次緻付車費。每張卡最高可以增值MOP1000，而最少就要增值MOP50，港幣兌澳門幣都係1:1計算。如果喺巴士上拍卡之後，顯示「E09」，即係已重複付款；如果顯示「E07」，就即係負值卡，需要增值先可以繼續使用。

現時，於澳門使用「澳門通」搭車，無論係乘搭巴士定輕軌，都可享半價優惠。換言之，若車費係MOP6，經「澳門通」付款，只需要畀MOP3，又或者MOP4乘搭快線，比香港搭1個站更平！只要使用「澳門通」就可以享有優惠，減省旅途開支，香港人一樣適用！

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 雖然巴士同的士係可以用港幣，但輕軌係唔接受港幣買票，需要去櫃檯買票。

❷ 輕軌尾班車為凌晨12點前。

❸ 巴士報站app可以睇到澳門巴士路線，但其實google map一樣可以睇到巴士路線同到站時間，只不過app巴士位置比較即時啲，google map有少少參差。

❹ 澳門call車app一般香港人未必可以call到，但黑的就可以隨手截車。澳門無uber服務，所以只能搭的士。