【氹仔景點】毗連龍環葡韻！全新紅樹林濕地生態園區開放超長S形木棧道放眼氹仔風景

相信大家對氹仔知名景點「龍環葡韻」非常熟悉，近月該住宅式博物館旁邊就有一個全新景點，以紅樹林濕地生態為主。E.A.Two就為大家直擊呢個澳門八景之上嘅新景點，整個濕地空間地方偌大，設有超長木棧道，既可觀賞濕地生態，亦可觀賞氹仔風景！

從「官也街」徒步到「龍環葡韻住宅式博物館」，僅需約5分鐘步程。由1999年起開放至今嘅「龍環葡韻」，既係澳門重要文物建築及文化遺產，亦被列為澳門八景之一，有人更會擇地拍攝婚照。你又了唔了解「龍環葡韻」嘅背景呢？事實上，「龍環葡韻」係葡萄牙殖民地建築，包括有五幢建築物。由於當時葡萄牙人不斷擴張影響力，故興建唔少官方葡式建築物，「龍環葡韻」就係澳門高級官員官邸同澳門土生葡人家庭嘅住宅地。

「龍環」其實係指氹仔，因為氹仔以前叫「龍環」；而「葡韻」就係指葡萄牙嘅建築風格。後來，「龍環葡韻」於90年代改建成博物館，並於1999年開放公眾參觀。該五幢葡式建築物驟眼睇幾乎一式一樣，依然保留葡萄牙式建築設計。實際上，五幢建築物已經變成唔同用途，分別係「葡韻生活館」、「匯藝廊」、「創薈館」、「風貌館」、「迎賓館」。

本身「龍環葡韻」前臨一片濕地，澳門當局未有做整修工作。直到近年，終進行整修，並設立「龍環葡韻濕地科普園地及生態步道」，等公眾可以通過一道木棧步道及水牌介紹，更可以加深認識，了解濕地生態。

「龍環葡韻濕地」可從東南西北側四面進入，生態池開放時間不一。濕地內有大片紅樹林，澳門當局整修後，並無影響本身生態環境，保留當中生態價值，只係於濕地少間空間上加上一條步道。大家可從呢條超長嘅木棧道近距離觀賞紅樹林濕地及各種濕地生物，而西側生態池係重點生態區，生態攝影師必到！

步道上，基本上有五個生應池，五個係互相連接，所以唔係太容易分得出。但木棧道上長約200米嘅觀鳥屏障就較為明顯，中間更有三間觀鳥屋，好彩就會見到雀鳥飛翔。另一端亦有賞荷平台，可觀賞荷花。另外，濕地內有鷺鳥、林鳥、蜻蜓、蝴蝶等，鳥類、昆蟲、水生植物品種豐富多漾。夜晚時份，據說甚至可以聽到黑眶蟾蜍、沼蛙等鳴叫聲。

走過濕地園區步道，唔單止可以觀賞生態物種，打卡天空之鏡，更可以欣賞氹仔風景，因為木棧道中間係可以放間對岸酒店及娛樂場，甚至金光大道嘅繁華熱鬧景色，同濕地嘅清靜構成強烈比。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 龍環葡韻住宅式博物館最後30分鐘停止入場。「創薈館」開放，「迎賓館」則不對外開放。

❷ 龍環葡韻有導賞服務，星期六15:00至17:00。龍環葡韻人均入場費為MOP5。

❸ 乘搭巴士路線11、15、22、28A、30、33、34即達。

❹ 從大潭山俯視會見到心形濕地水池，S形長棧道則為打卡位，運氣好會見到有雀鳥。